ނިންމުމެއް ނުނިންމަން، ރަނިންމޭޓަކު ކަނޑައެއް ނާޅަން: ޖުމްހޫރީ ޕާޓީ
ނުރަސްމީކޮށް ވެސް ރަނިންމޭޓަކާ ގުޅޭ ގޮތުން ގޮތެއް ނިންމާފައެއް ނުވޭ
ޖުމްހޫރީ ޕާޓީގެ ކައުންސިލް ބައްދަލުވުމެއްގެ ތެރެއިން
އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ)ގެ ރަނިންމޭޓެއްގެ ގޮތުގައި ވާދަ ކުރައްވާނެ ބޭފުޅެއް ކަނޑައަޅާފައި ނުވާ ކަމަށް ޖުމްހޫރީ ޕާޓީ (ޖޭޕީ)އިން ބުނެފިއެވެ.
ގުޅިފައިވާ ސިޔާސީ ޕާޓީތަކުގެ ހަތަރު ލީޑަރުންނަން އެއްބަސް ވެވޭ ރަނިންމޭޓަކު ނެރުމަށް ޖުމްހޫރީ ޕާޓީން ނިންމާއިފައިވާ ކަމަށް މީޑިއާގައި ދެކެވޭ ވާހަކަ ތަކާ ގުޅޭ ގޮތުން އެ ޕާޓީގެ ލީޑަރުގެ މަސްއޫލިއްޔަތު އަދާކުރައްވަމުން ގެންދަވާ ޑރ. ހުސެއިން ރަޝީދު ހަސަން "ރާއްޖެއެމްވީ"އަށް މައުލޫމާތު ދެއްވަމުން ވިދާޅުވީ ޖުމްހޫރީ ޕާޓީގެ ކައުންސިލުން މިހާތަނަން ރަނިންމޭޓެއް ކަނޑައަޅާފައި ނުވާ ކަމަށެވެ. ގުޅިފައިވާ ޕާޓީތަކުގެ ރަނިންމޭޓެއްގެ ގޮތުގައި ޖުމްހޫރީ ޕާޓީން، ކެންދޫ ދާއިރާގެ ރައްޔިތުން މަޖިލީހުގެ މެންބަރު އަލީ ހުސައިން ކަނޑައަޅައިވާ ކަމަށް ސޯޝަލް މީޑިއާގައި އަޑު ފެތުރިފައި ވަނިކޮށް، ޑރ ހުސެއިން ވިދާޅުވީ ނުރަސްމީ ގޮތެއްގައި ވެސް ރަނިންމޭޓަކާއި ގުޅޭ ގޮތުން އެއްވެސް ނިންމުމެއް ނިންމާފައި ނުވާ ކަމަށެވެ.
ގުޅިފައިވާ ޕާޓީތަކުން އެއްބަސްވެފައި ވަނީ، އެ ޕާޓީތަކުގެ ރިޔާސީ ކެންޑިޑޭޓަކީ އެމްޑީޕީގެ ކޮންގްރެސްއިން ފާސްކޮށްފައިވާ އެމްޑީޕީ ޕާލަމެންޓްރީ ގްރޫޕުގެ ލީޑަރު އިބްރާޙިމް މުހައްމަދު ސާލިހު (އިބޫ)އެވެ. އިބޫ އާއެކު ނުކުންނަވާނެ ރަނިންމޭޓަކީ ޖޭޕީން ކަނޑައަޅާ ބޭފުޅަކަށް ހެދުމަށް ޕާޓީތަކުން ވަނީ އެއްބަސްވެފައެވެ.
ރިޔާސީ އިންތިހާބަށް ކޯލިޝަންގެ ކެނޑިޑޭޓެއްގެ ގޮތުގައި އިބޫ ކެމްޕެއިން ކުރައްވަން ފައްޓާފައި ވާއިރު، ޖުމްހޫރީ ޕާޓީން ބުނެފައި ވަނީ އެ ޕާޓީގެ ފަރާތުން ކޯލިޝަން ކެނޑިޑޭޓްގެ ރަނިންމޭޓެއްގެ ގޮތުގައި މަސައްކަތް ކުރައްވާނެ ބޭފުޅެއް ކަނޑައަޅެމަށް ހަމަޖެހިފައި ވަނީ މި މަހުގެ 10 ވަނަ ދުވަހުގައި ކަމަށެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އިދިކޮޅު ކޯލިޝަންގެ ރަނިންމޭޓެއްގެ ގޮތުގައި ގުޅިފައިވާ ސިޔާސީ ޕާޓީތަކަށް އެއްބަސްވެވޭ ރަނިންމޭޓަކު ނެރުމަށް ހޮނިހިރު ދުވަހުގެ ރޭ ބޭއްވި ޖުމްހޫރީ ޕާޓީންގެ ލީޑަޝިޕްގެ ބައްދަލުވުމުއްގައި ވަނީ ނިންމާފަވެއެވެ. އެ ބައްދަލުވުމުގައި ޖުމްހޫރީ ޕާޓީގެ ލީޑާޝިޕުން ނިންމާފައި ވަނީ އިދިކޮޅު ހަތަރު ލީޑަރުން ކަމަށްވާ ރައީސް މައުމޫނު އަބްދުލްޤައްޔޫމާއި ރައީސް މުހައްމަދު ނަޝީދާއި ޖޭޕީގެ ކުރީގެ ލީޑަރު ގާސިމް އިބްރާހީމާއި ޢަދާލަތު ޕާޓީގެ ރައީސް އައްޝައިޚް އިމްރާން އަބްދުﷲ ގެ ފަރާތްޕުޅުން އެއްބަސްވެވޭ ބޭފުޅަކު އިދިކޮޅު ރަނިންމޭޓަކަށް ނެރުމަށެވެ.
ޖުމްހޫރީ ޕާޓީން ބުނީ ރަނިންމޭޓެއް ކަނޑައެޅުމާއި ގުޅޭ ގޮތުން އެ ޕާޓީގެ ލީޑާޝިޕްގެ އެއްވެސް ބައްދަލުވުމެއް ބާއްވާފައި ނުވާ ކަމަށެވެ. ނަމަވެސް ޖުމްހޫރީ ޕާޓީގެ ލީޑަރޝިޕްގެ އެކި އެކި ބައްދަލުވުންތަށް އެ ޕާޓީގެ ކޮންގްރެސްއަށް ފަހު ކުރިއަށްދާ ކަމަށެވެ. އަދި ރައްޔިތުން އެދޭ ގޮތަށް އެ ޕާޓީން ރަނިންމޭޓެއް ވަރަށް އަވަހަށް ކަނޑައަޅާނެ ކަމަށެވެ.
