ކެމްޕެއިން ހަރަކާތްތައް ލަންކާގައި ވަރުގަދަ ކުރުމަށް ރައީސް ނަޝީދު ދިވެހިންނާއި ބައްދަލުކުރައްވައިފި

އެމްޑީޕީގެ ކެމްޕެއިން ހަރަކާތްތައް ލަންކާގައި ވަރުގަދަ ކުރުމަށް ކުރީގެ ރައީސް މުހައްމަދު ނަޝީދު ލަންކާގައި ދިރިއުޅޭ ދިވެހިންނާއި ބަދައްލުކުރައްވައިފިއެވެ.

މި ބައްދަލުވުމުގައި އެމްޑީޕީގެ ޗެއަރޕާސަން ހަސަން ލަތީފާއި، އެޕާޓީގެ ނައިބް ރައީސް މުހައްމަދު ޝިފާޒުގެ އިތުރުން ޖަޒީރާ ރައީސްގެ ކެމްޕެއިން މެނޭޖަރެއްގެ ގޮތުގައި މަސައްކަތް ކުރެއްވި ހިތަދޫ އުތުރު ދާއިރާގެ ރައްޔިތުންގެ މަޖިލީހުގެ މެމްބަރު މުހައްމަދު އަސްލަމް ބައިވެރިވެލެއްވިއެވެ. ލަންކާގައި ދިރިއުޅުއްވާ ދިވެހިންނާއި އެކު ކުރިއަށް ގެންދިޔަ މި ބައްދަލުވުގައި އެމްޑީޕީގެ ލީޑަރޝިޕްގެ އިސްވެރިންނާއި ރައީސް ނަޝީދު ވަނީ ލަންކާގައި ކެމްޕެއިން ހަރަކާތްތައް ވަރުގަދަކޮށް ކެމްޕެއިން ކުރިއަށް ގެންދާނެ ގޮތާއި ގުޅޭގޮތުން ވާހަކަ ދައްކަވާފައެވެ.

މިއީ ރައީސް ނަޝީދު އެމްޑީޕީގެ ރިޔާސީ ޓިކެޓް ދޫކޮށްލައްވާ މި އަހަރުގެ ރިޔާސީ އިންތިހާބުގައި ވާދަނުކުރައްވާން ނިންމެވިފަހުން ލަންކާގައި ދިރިއުޅުއްވާ ދިވެހިންނާއި ބައްދަލުކުރެއްވި ފުރަތަމަ ފަހަރައެވެ. ރައީސް ނަޝީދު އެމްޑީޕީގެ ރިޔާސީ ޓިކެޓު ދޫކޮށްލައްވަން ނިންމެވީ މި އަހަރުގެ ރިޔާސީ އިންތިޚާބުގައި އިލެކްޝަންސް ކޮމިޝަނުން ބަލައިގަންނަ އެމްޑީޕީގެ ކެންޑިޑޭޓެއް ނެތިދާނެ ކަމުގެ ކަންބޮޑުވުމަށް އިޖާބަ ދެއްވުމުގެ ގޮތުނެވެ. ރައީސް ނަޝީދުގެ މި ނިންމެވުމާއި ގުޅިގެން އެމްޑީޕީގެ ތިންވަނަ ކޮންގްރެސް އިން އެޕާޓީގެ ރިޔާސީ ކެނޑިޑޭޓަކަށް އެޕާޓީގެ ޕާލިމެންޓަރީ ގްރޫޕްގެ ލީޑަރު އިބްރާހިމް މުހައްމަދު ސޯހިލް ( އިބޫ) ވަނީ ހަމަޖައްސަވާފައެވެ.

ރައީސް ނަޝީދު ލަންކާގައި ދިރިއުޅުއްވާ ދިވެހިންނާއި ބަދައްލުކުރައްވަނީ

އެމްޑިޕީގެ ކޮންގްރެސްގައި ބައިވެރި މަންދޫބުންނާއި ވީޑިއޯ މެދުވެރިކޮށް ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެޕާޓީގެ ރިޔާސީ ކެނޑިޑޭޓަށް ކާމިޔާބު ހޯދާ ދެއްވުމަށް އެންމެ ބުރަ މަސައްކަތްތަކެއް ކުރައްވާނެ އެކްޓިވިސްޓަކަށް އެމަނިކުފާން ވެވަޑައިގަންނަވާނެ ކަމަށެވެ. އަދި އެމްޑީޕީގެ ޕާލިމެންޓްރީ ގުރޫޕުގެ ލީޑަރުކަންވެސް ކުރައްވާ އިބްރާހިމް މުހައްމަދު ސޯލިހު ރިޔާސީ ކެނޑިޑޭޓަކަށް އިންތިހާބުވުމުން މަރުހަބާ ދަންނަވައި ރައީސް މުހައްމަދު ނަޝީދު ވިދާޅުވީ ރައީސް އަބްދުﷲ ޔާމީން ބޮޑު ތަނުން ބަލިކުރައްވާނީ ގުޅިފައިވާ ޕާޓީތައް އެކުގައި ނިކުމެކަމަށެވެ.