ބޭރުގެ މިލިޓަރީ ބޭސްއަށް، ލީބިއާގެ ސިފައިން ފާޅުގަ ނޫނެކޭ ބުނެފި
1 ޖުލައި 2018 | އާދީއްތަ 02:21ބޭރުގެ މިލިޓަރީ ބޭސްއެއް ގާއިމު ކުރުމަކީ ހަމަލާއެއް ދިނުންފަދަ ކަމެއް
ލީބިއާގެ ސިފައިން ހަރަކާތްތެރި ވަނީ
ބޭރުގެ މިލިޓަރީ ބޭހެއް ލީބިއާގައި ހެދުމާމެދު އެ ގައުމުގެ ސިފައިން ދެކޮޅު ހަދައިފިއެވެ. ސިފައިން ވަނީ ބޭރުގެ މިލިޓަރީ ބޭހެއް ކޮންމެ ސަބަބަކަށްޓަކައި ނަމަވެސް ލީބިއާގައި ގާއިމް ކުރުމަކީ އެ މީހުން ހިތްހަމަ ނުޖެހޭ ކަމެއްކަން ފާޅުގައި ހާމަކޮށްފައެވެ.
މި ވަގުތަކީ ގަވާއިދާއި ޚިލާފަށް ލީބިއާ މެދުވެރިކޮށް މީހުން އެހެން ގައުމްތަކަށް ބަދަލު ކުރާކުރުން ހުއްޓުމަށް ޔޫރަޕުގެ ގައުމްތަކުން އެހީ ވެދިނުމަށް މިލިޓަރީ ބޭހެއް އެ ގައުމުގައި އެޅުމަށް ބޭނުންވާ ކަމަށް އަޑުފެތުރިފައިވާ ވަގުތެކެވެ. އެހެން ނަމަވެސް މިކަން އެއްވެސް ގައުމަކުން ރަސްމީކޮށް ހާމަ ކޮށްފައެއް ނުވެއެވެ. ބެލެވޭ ގޮތުގައި މި އަޑު ފެތުރުނު މައިގަނޑު ސަބަބަކީ ފުރާންސްގެ އާ އިމިގްރޭޝަން ބިލާ ގުޅިގެންނެވެ.
ލީބިއާގެ ސިފައިންގެ "ޖެނެރަލް ކޮމާންޑް" މިކަމާ ގުޅިގެން ނެރުނު ބަޔާނެއްގައި ބުނީ ބޭރުގެ މިލިޓަރީ ބޭހެއް އަޅައިފިނަމަ އެވެވެނީ ގައުމަށް ޚިޔާނާތްތެރި ކަމަށެވެ. އެހެން ކަމުން ސިފައިން އެ މަންޒަރު ބަލަން މަޑަކުން ނޯންނާނެ ކަމަށް ބުނެ ވަނީ ވަރަށް ވަރުގަދަ ބަހުގެ ހަމަލާތަކެއް ދީފައެވެ. އަދި މިލިޓަރީ ބޭހެއް އެ ގައުމުގައި އެޅުމަކީ ބައިނަލްއަގްވާމީ ގާނޫނާ ޚިލާފް ކަމެއް ކަމަށާއި އެކަމަކީ ލީބިއާއަށް ވަރަށް ވަރުގަދަ ހަމަލާއެއް ދިނުންފަދަ ކަމެއްގެ ގޮތުގައި ވަނީ ސިފަ ކުރައްވާފައެވެ. އެއާއެކު އެ ބަޔާނުގައި ބުނީ ސިފައިންގެ މަސްއޫލިއްޔަތު އަދާ ކުރާނެ ކަމަށާއި ގައުމަށް އެކަހަލަ ކަމެއްޔަކަ ނުދޭނެ ކަމަށެވެ.
އިޓަލީގެ މީޑިއާއެއް ބުރާސްފަތި ދުވަހު ބުނީ އެ ގައުމުގެ އިންޓީރިއާ މިނިސްޓަރާއި ލީބިއާގެ ބޮޑުވަޒީރާ ދެމެދު މިލިޓަރީ ބޭހެއް އެޅުމަށްޓަކައި މަޝްވަރާ ކުރެވިފައިވާ ކަމަށެވެ. އެ މީޑިއާއިން ބުނާ ގޮތުން އިޓަލީން މިލިޓަރީ ބޭހެއް އަޅަނީ ލީބިއާގެ ދެކުނުގެ ސިޓީއެއް ކަމަށްވާ ގަޓްގައެވެ.
