ކުއްލިއަކަށް މަޖިލިސް ޖަލްސާއެއް ބާއްވައި، ގިނަ ކަންތައްތަކެއް މަޖިލީހަށް ހުށަހަޅައިފި
27 ޖޫން 2018 | ބުދަ 09:41ޖަލްސާ އެންޑާ ކޮށްފައިވަނީ މިއަދު 13:00 އަށް
މަޖިލީހުގެ ރައީސް އަބްދުﷲ މަސީހް
ކުއްލި ގޮތަކަށް މަޖިލީހުގެ ޖަލްސާއެއް ބުދަ ދުވަހުގެ 13:00 އަށް އެޖެންޑާކޮށް، މަޖިލީހަށް ގިނަ ކަންތައްތަކެއް ހުށަހަޅައިފިއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލީހުގެ ރައީސްގެ މޭޒުން ހުށަހަޅަ ކަންކަމުގެ އެޖެންޑާގެ ދަށުން އުއްތަމަފަނޑިޔާރުގެ މަޤާމަށް ސ. ހިތަދޫ، ކޯޒީރައުންޑް ޑޮކްޓަރ އަޙްމަދު ޢަބްދުالله ދީދީ ޢައްޔަންކުރުމަށް ޖުޑީޝަލް ސަރވިސް ކޮމިޝަނުން ރައީސުލްޖުމްހޫރިއްޔާއަށް މަޝްވަރާދެއްވާފައިވާތީ، ދިވެހިރާއްޖޭގެ އުއްތަމަފަނޑިޔާރުގެ މަޤާމަށް ޢައްޔަންކުރުމަށްޓަކައި ސ. ހިތަދޫ، ކޯޒީރައުންޑް ޑޮކްޓަރ އަޙްމަދު ޢަބްދުالله ދީދީގެ ނަންފުޅު ރައްޔިތުންގެ މަޖިލީހަށް ހުށަހެޅުއްވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ އާއި ޤާނޫނުއަސާސީގެ 148 ވަނަ މާއްދާގެ (ހ) ގެ ދަށުން ސުޕްރީމް ކޯޓުގެ ފަނޑިޔާރުކަމުގެ މަޤާމަށް މއ.ވޭސައިޑް 310 ފްލެޓް، އަލްއުސްތާޛު ޢަބްދުاللهދީދީ އާއި ހ.ހޯސްޓްސައިޑް އަލްއުސްތާޛު ޢަބްދުލްޣަނީ މުޙައްމަދު ޢައްޔަންކުރުމަށް ޖުޑީޝަލް ސަރވިސް ކޮމިޝަނުން ރައީސުލްޖުމްހޫރިއްޔާއަށް މަޝްވަރާދެއްވާފައިވާތީ، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމުގެ މަޤާމަށް އެ ބޭފުޅުން ޢައްޔަންކުރުމަށްޓަކައި ރައްޔިތުންގެ މަޖިލީހަށް ހުށަހެޅުއްވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ އެޖެންޑާ ކޮށްފައި ވެއެވެ.
މަޖިލީހަށް ތައާރަފްކުރަންޖެހޭ ބިލްގެ އެޖެންޑާގެ ދަށުން ހަ ބިލެއް ހުށަހަޅާފައި ވެއެވެ. އެއީ ސަރުކާރުގެ ފަރާތުން ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް ހުށަހަޅުއްވާފައިވާ، ރައްޔިތުންގެ މަޖިލީހުގެ އިންތިހާބުގެ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުމާއި ސަރުކާރުގެ ފަރާތުން ގެމަނަފުށި ދާއިރާގެ މެމްބަރު ޖަމީލު އުސްމާނު ހުށަހަޅުއްވާފައިވާ ކުޑަކުދިންގެ ހައްގުތައް ރައްކާތެރިކުރުމުގެ ބިލާއި ދިވެހިރާއްޖޭގެ ބޭންކިންގ އާބެހޭ ގާނޫނަށާއި ސިޔާސީ ޕާޓީތަކުގެ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުމުގެ އިތުރުން ސަރުކާރުގެ ފަރާތުން ފޭދޫ ދާއިރާގެ މެމްބަރު އިބްރާހީމްދީދީ ހުށަހަޅުއްވާފައިވާ ޖިނާއީ އިޖުރާއަތުގެ ގާނޫނަށާއި މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލުގެ ފުރަތަމަ ކިޔުން އިއްވުމެވެ.
ރައްޔިތުންގެ މަޖިލީހުގެ ޖަލްސާތަށް އާއްމު އުސޫލުން ބާއްވަމުން އަންނަނީ ހަފްތާގެ ހޯމަ، އަންގާރަ އަދި ބުދަ ދުވަހުއެވެ. ފަށާގަޑިއަކީ 09:00 އެވެ. ނަމަވެސް މިހާރު މަޖިލީހުން ވަރަށް ތަފާތު އެކިގޮތްގޮތަށް ދަނީ އަމަލު ކުރަމުންނެވެ. ބުދަ ދުވަހުގެ ރަސްމީ ގަޑި ފެށުނުއިރު ވެސް ބުދަދުވަހުގެ ޖަލްސާގެ އެޖެންޑާ ހާމަކޮށްފައެއް ނުވެއެވެ. ނަމަވެސް ކުއްލި ގޮތަކަށް ޖަލްސާ 13:00 އަށް ތާވަލުކޮށް، އެޖެންޑާކޮށް، ޖަލްސާ ވެސް ބާއްވައި ކުޑަ ވަގުތު ކޮޅެއްގެ ތެރޭގައި ވަނީ ޖަލްސާ ނިންމާލާފައެވެ. އިދިކޮޅު ފަރާތްތަކުން މަޖިލީހުގެ ޖަލްސާތައް ދަނީ ބޮއިކޮޓްކުރަމުންނެވެ.
