އައިފާ އެވޯޑްގައި ކާރްތިކް ހުށަހަޅައިދިން ފުރަތަމަ ޕާފޯމަންސްއިން އެތައް ބައެއްގެ ހިތްތައް ފަތަހަކޮށްފި

އިންޑިއަން އިންޓަނޭޝަނަލް ފިލްމް އެވޯޑްސް (އައިފާ) އެވޯޑްގައި ކާރްތިކް އާރްޔަން ހުށަހަޅައިދިން ފުރަތަމަ ޕާފޯމަންސްއިން އެތައް ބައެއްގެ ހިތްތައް ފަތަހަކޮށްފި އެވެ.

ގިނަ ބައެއްގެ ހިތްތަކުން ކާރްތިކް ޖާގަ ހޯދަފައިވަނީ އައިފާ އެވޯޑް ހަފްލާގައި އޭނަ ހުށަހަޅާދިން ނެށުންތަކުންނެވެ. މަޝްހޫރުކަން ހޯދާފައިވާ ލަވަތަކަށް ކާރްތިކް ނެށުންތައް ހުށަހަޅާދީފައިވާއިރު އެންމެ ފާހަގަކޮށްލެވޭ ނެށުމަކީ ސަލްމާން ހާން ކުޅެފައިވާ މަޝްހޫރު ލަވައެއް ކަމަށްވާ ސްވާގް ސޭ ސަވާގަތް ލަވަޔަށް ކާރްތިކް ހުށަހަޅާދިން ނެށުމެވެ.

ކާރްތިކްގެ މިރީތި ނެށުމަށް މުޅި އޯޑިއަންސްގެ ފުރިހަމަ ތަރުހީބު ވަނީ ލިބިގެން ގޮސްފަ އެވެ.

ކާރްތިކްގެ މިހުށަހެޅުމުގެ އިތުރަށް އޭނާ ވަނީ އައިފާ އެވޯޑްގެ ބައެއް ސެގްމެންޓްތައް ވެސް ހުށަހަޅާފަ އެވެ. ކާރްތިކް އަކީ އަރަމުން އަންނަ ތަރިއަކަށްވާއިރު އޭނާ އެންމެ ފަހުން ކުޅުނު ފިލްމު ސޮނު ކި ޓިޓޫ ކި ސްވީޓީ އަށް ވެސް އާންމުންގެ ބޮޑު ތަރުހީބެއް ވަނީ ލިބިގެން ގޮސްފަ އެވެ.

އާދިއްތަ ދުވަހުގެރޭ ބެންކޮކްގެ ސިއަމް ނިރަމިތް ތިއޭޓާގައި ކުރިއަށް ދިޔަ މި އެވޯޑް ހަފްލާ ހުށަހަޅައިދީފައިވަނީ ކަރްން ޖޯހަރާއި ރިތޭޝް ދޭޝްމުކެވެ.

މިފަހްލާގައި ކާރްތިކްގެ އިތުރުން ރޭކާ، ރަބީރު ކަޕޫރު، ޝްރައްދާ ކަޕޫރު، އަރުޖުން ކަޕޫރު، ކްރިތީ ސެނޯން، އަނިލް ކަޕޫރު، ކަރަން ޖޯހަރު، ބޮބީ ޑިއޯލް އަދި ލޫލިއާ ވަންތުރު ވަނީ ޕާފޯމް ކޮށްފައެވެ.