މިދިޔަ ހުކުރު ދުވަހު ރިލީޒް ކުރި ސަލްމާން ޚާންގެ ފިލްމް "ރޭސް 3" އެޅުވިތާ ފަސްދުވަހުގެ ތެރޭގައި 136.76 ކްރޯޑަށް އަރާފައިވާ ކަމަށް ރިޕޯޓްތައް ބުނެފިއެވެ.

"ރޭސް 3" ވެފައި ވަނީ މިއަހަރު ރިލީޒް ކުރި އެންމެ ކާމިޔާބު ފިލްމުގެ ރެކޯޑް ހޯދަފައެވެ. އަދި ހަފްތާ ބަންދުގައި ދެވަނައަށް އެންމެ ގިނަ އާމްދަނީ ލިބުނު ފިލްމްގެ ރެކޯޑް ވެސް ވަނީ އެ ފިލްމަށް ލިބިގެން ގޮސްފައެވެ. އެ ފިލްމް ރިލީޒްކުރި ފުރަތަމަ ދުވަހު ފިލްމަށް ވަނީ 29.17 ކްރޯޑް ރުޕީސް ލިބިގެން ގޮސްފައެވެ. އަދި ހަފްތާ ބަނަދުގައި އެ އަދަދު ވަނީ 106.47 ކްރޯޑް ރުޕީޒް އަށް އަރާފައެވެ.

"ރޭސް 3" ވެގެން ގޮސްފައި ވަނީ ވޭތިވެ ދިޔަ 10 އަހަރު ތެރޭގައި ނުކުތް ސަލްމާންގެ ފިލްމް ތަކުގެ ތެރެއިން ހަތަރު ވަނަ އަށް އެންމެ ބޮޑު އާމްދަނީއެއް ލިބިގެންދިޔަ ފިލްމަށެވެ.

ސަލްމާންގެ އެންމެ ކާމިޔާބު ތިން ފިލްމްގެ ތެރޭގައި ހިމެނޭ "ސުލްތާން" ، ޓާއިގާ ޒިންދާހޭ، އަދި ބަޖްރަންގީ ބައިޖާން އެވެ.

މެއިން ރޯލުން ސަލްމާން ޚާންގެ އިތުރުން ޖެކުލީން ފޭނާންޑޭޒް، ބޮބީ ޑިއޯލް، އަނިލް ކަޕޫރު، ސާގިބް ސަލީމް އަދި ޑެއިޒީ ޝާހު ފެނިގެންދާ މި ފިލްމަކީ ރޭސް ފްރެންޗައިސްގެ 3 ވަނަ ފިލްމެވެ.

ކްރައިމް ތްރިލާ މި ފިލްމަކީ އާއިލާއެއްގެ ތެރޭގައި ޖެހޭ މައްސަލަތަކެއް ސަބަބުން އެ މީހުން ހިންގާ ޖަރީމާތަކެއް ދައްކުވައި ދޭ ފިލްމެކެވެ.