އަމުރު ހިފައިގެން ދިއުމުން ވެސް، ނަޒީރުގެ ޕާސްޕޯޓް އިމިގްރޭޝަނުން ދުލެއް ނުކުރި
19 ޖޫން 2018 | އަންގާރަ 10:12ޕާސްޕޯޓް ހިފަހައްޓާފައިވާތާ ތިން މަސް
އަދާލަތު ޕާޓީގެ މީޑިއާ ކޮމެޓީގެ މުގައްރިރު އަލީ ނަޒީރު
އަދާލަތު ޕާޓީގެ މީޑިއާ ކޮމެޓީގެ މުގައްރިރު އަލީ ނަޒީރުގެ ޕާސްޕޯޓް ދޫކުރުމަށް ކްރިމިނަލް ކޯޓުން ކުރި އަމުރު ތަންފީޒު ކުރަން މޯލްޑިވްސް އިމިގްރޭޝަނުން ދެކޮޅު ހަދައިފިއެވެ.
ނަޒީރުގެ ޕާސްޕޯޓް އިމިގްރޭޝަނުން އެންމެ ފުރަތަމަ ހިފެހެއްޓީ، ލަންކާގައި ދިރިއުޅޭ އޭނާގެ އާއިލާ ކައިރިއަށް ދިއުމަށް އެއާޕޯޓަށް ގޮސް ހުއްޓާ، މިދިޔަ މާޗު މަހުގެ ތެރޭގައެވެ. އިމިގްރޭޝަނުން އޭނާގެ ޕާސްޕޯޓް އަތުލާފައިވާތާ ތިން މަހަށް ވުރެ ގިނަ ދުވަސްވީ ފަހުން، އޭނާގެ ޕާސްޕޯޓް ދޫކުރަން ކްރިމިނަލް ކޯޓުން ހޯމަ ދުވަހު ވަނީ އަމުރުކޮށްފައެވެ. އެ އަމުރު ފުލުހުން ވަނީ އޭނާއާ ހަވާލުކޮށްފައެވެ.
ނަޒީރު "ރާއްޖެއެމްވީ"އަށް އަންގާރަ ދުވަހު ވިދާޅުވީ އޭނާގެ ޕާސްޕޯޓް ދޫކުރުމަށް ކްރިމިނަލް ކޯޓުން ހޯމަ ދުވަހު ކުރި އަމުރު ހިފައިން އިމިގްރޭޝަނަށް ދިއުމުން ޕާސްޕޯޓް ދުލެއް ނުކުރި ކަމަށާއި އަމުރު ތަންފީޒު ކުރަން ދެކޮޅު ހަދާ ސަބަބެއް ވެސް ނޭނގޭ ކަމަށެވެ.
"ފުލުހުން ބުނެފައި ވަނީ އަމުރާ ގުޅިގެން ފުރިހަމަ ކުރަންޖެހޭ އިޖުރާއަތްތައް ފުރިހަމަކޮށްފައިވާ ކަމަށް. އަނެއްކާ ކޯޓުން އަމުރެއް ހިފައިގެން ދިއުމުން އެ އަމުރު ތަންފީޒު ނުކޮށް، ތިބެގެން ނުވާނެ. މި ފެންނަނީ ގާނޫނުގެ ހަމަތަކާއި ކޯޓުތަކުގެ އަމުރުތަކަށް މި ސަރުކާރުން ކިޔަމަންނުވާނެކަން. މިކަންކަމަށް އިންސާފު ލިބޭނެ ދުވަހެއް އަންނާނެ،" ގުޅިފައިވާ ޕާޓީތަކުގެ ރެލީތަކުގެ މައުލޫމަތު ދެއްވުމުގައި އިސް އިސް ދައުރެއް އަދާ ކުރައްވާ ނަޒީރު ވިދާޅުވިއެވެ.
ނަޒީރުގެ ޕާސްޕޯޓް ހިފަހައްޓާފައިވާތީ، އިމިގްރޭޝަންގެ ކޮންޓްރޯލާ މުހައްމަދު އަންވަރާ "ރާއްޖެއެމްވީ" އިން ސުވާލު ކުރުމުން އޭނާ ވިދާޅުވީ ޕާސްޕޯޓެއް ދޫކުރުމަށް ކޯޓުން ނެރޭ އަމުރު އިމިގްރޭޝަނަށް ނުލިބޭ ނަމަ، ޕާސްޕޯޓް ދުލެއް ނުކުރާނެ ކަމަށެވެ.
ނަޒީރުގެ ޕާސްޕޯޓް އިމިގްރޭޝަނުން ހިފެހެއްޓީ މިއަހަރުގެ މާޗް މަހުގެ 16 ވަނަ ދުވަހު ގުޅިފައިވާ ޕާޓީތަކުން މ. ކުނޫޒުގައި ބޭއްވި ނޫސްވެރިންގެ ބައްދަލުވުމެއްގައި ރާއްޖޭގެ ހުރިހާ ރަށްތަކުން މަގުތަކަށް މީހުން ނިކުތުމަށާއި ސަރުކާރާ ދެކޮޅަށް އަޑުއުފުލައި މުޒާހަރާ ކުރުމަށް ހިތްވަރުދީ، ނަޒީރު ވާހަކަ ދެއްކެވި ކަމަށް ބުނެ، ފުލުހުން ކުރި ތަހުގީގަކާ ގުޅިގެންނެވެ. އެ މައްސަލާގައި ނަޒީރުގެ މައްޗަށް ދައުވާ ކުރުމަށް ޕްރޮސެކިއުޓާ ޖެނަރަލް (ޕީޖީ) އޮފީހަށް ފޮނުވުމުން، އެ އޮފީހުން ވަނީ އެ މައްސަލާގައި ދައުވާ ނުކުރަން ނިންމައި، މައްސަލަ ފައިލްކޮށްފައެވެ.
