އެކްސްއެކްސްއެކްސްޓެންޓަސިއޯންގެ ނަމުން މަޝްހޫރުވެފައިވާ ޒުވާން ރެޕް ލަވަކިޔުންތެރިޔާ ޖާސޭ އޮންފްރޯއި ގަޔަށް ބަޑިޖަހައި މަރާލައިފިއެވެ.

އޮންފްރޯއި ގަޔަށް ބަޑިޖަހާފައިވަނީ، ދެކުނު ފްލޮރިޑާގެ ސައިކަލު ވިއްކާ ޝޯރޫމަކުން އޭނާ ނުކުތް ވަގުތުއެވެ. އޭނާ މަރުވެފައިވަނީ، އޭނާގެ ގަޔަށް ބަޑިޖެހުމުން، ހޮސްޕިޓަލަށް ގެންގޮސް ފަރުވާދެމުން ދަނިކޮށެވެ. މަރުވިއިރު އުމުރުން 20 އަހަރެވެ.

އޮންފްރޯއިއަށް ދިން ހަމަލާގައި އެއްފަހަރަށްވުރެ ގިނަ ފަހަރު އޭނާގެ ގަޔަށް ބަޑި ޖަހާފައިވާއިރު، ހަމަލާ ދިން ސަބަބެއް، އަދި ހަމަލާ ދިން މީހެއް ހޯދިފައެއް ނުވެއެވެ. ފުލުހުން ވަނީ މި ހަމަލާދިން މީހާ ހޯދުމުގެ މަސައްކަތް ކުރަމުންދާ ކަމަށް ބުނެފައެވެ.

ޒުވާން އުމުރުގެ ބޮޑު ބައެއް ޒުވާނުންނަށް ޚާއްސަ "އިސްލާހިއްޔާ" އެއްގައި ހޭދަކުރި އޮންފްރޯއި އަކީ ދުނިޔޭގެ އެންމެ ކޮންޓްރޮވަރޝަލް ރެޕް އާޓިސްޓް ކަމުގައި ގިނަ ބަޔަކު ޤަބޫލުކުރެއެވެ.

ފުލުފުލުގައި މޮޅެތި ލަވަތަކަކާއި އެކު، ބިލްބޯޑުގައި ބޮޑު ކާމިޔާބެއް ހޯދި އަލްބަމްތައް ނެރުނު ނަމަވެސް ސަޕޯޓަރުންނަށް ހަމަލަ ދިނުމާއި، ގެވެށި އަނިޔާގެ މައްސަލަތަކާއި، އެފަދަ އެކިއެކި މައްސަލަތަކުގެ ސަބަބުން އޭނާއަށް ގިނަ ބައެއްގެ ފާޑުކިޔުންވެސް އަމާޒުވެގެން ދިޔައެވެ.

އޮންފްރޯއިގެ މަސައްކަތްތަކުގެ ތެރެއިން ފާހަގަކޮށްލެވޭ ލަވަތަކުގެ ތެރޭގައި "ސޭޑް!" އާއި "މޫންލައިޓް" ފަދަ ލަވަތައް ހިމެނެއެވެ.