ކެންޓަކީގެ ސްކޫލެއްގައި ބަޑިޖަހައި ދެ ކުއްޖަކު މަރާލައިފި
24 ޖެނުއަރީ 2018 | ބުދަ 02:39މަރުވެފައި ވަނީ އުމުރުން 15 އަހަރުގެ ދެ ދަރިވަރުން
ހަމަލާ ދޭން ފެށުމުން ދަރިވަރުން ވަނީ ފިލަން މަސައްކަތްކޮށްފައި | ސީބީއެސަް
އެމެރިކާގެ ސްޓޭޓެއް ކަމަށްވާ ކެންޓަކީގެ ސްކޫލެއްގައި ހިނގި ބަޑިޖެހުމުގެ ހާދިސާއެއްގައި ދެ ކުއްޖަކު މަރުވެ 17 މީހުން ޒަޚަމްވެއްޖެއެވެ.
ކެންޓަކީގެ ގަވަރނަރ ވިދާޅުވީ މާޝަލް ކައުންޓީގެ ހައި ސްކޫލެއްގައި ހިނގި ހާދިސާގައި އުމުރުން 15 އަހަރުގެ އަންހެން ކުއްޖަކު މަރުވަފައި ވަނީ ހާދިސާ ހިނގި ތަނުގައި ކަމަށްވާއިރު 15 އަހަރުގެ ފިރެހެން ކުއްޖާ މަރުވެފައި ވަނީ ހޮސްޕިޓަލުގައި ފަރުވާ ދެމުން ދަނިކޮށް ކަމަށެވެ.
ހަމަލާ ދިނީ 15 އަހަރުގެ ފިރެހެން ދަރިވަރެކެވެ. އޭނާ މިހާރު ވަނީ ހައްޔަރުކޮށްފައެވެ.
އެ ސްޓޭޓްގެ ފުލުހުން ބުނެފައި ވަނީ އޭނާ ހައްޔަރުކޮށްފައި ވަނީ އެ ސްޓޭޓުގެ ގަޑިން އަންގާރަ ދުވަހުގެ 8:00 ހާއިރު ހަމަލާ ދޭން ފެށިތާ 15 ވަރަކަށް މިނެޓްގެ ތެރޭގައި ކަމަށެވެ.
މީޑިއާތަކުން ބުނާ ގޮތުގައި ހޭންޑްގަންއަކުން އެ ދަރިވަރު ހަމަލާދޭން ފަށާފައި ވަނީ ކްލާސްތައް ފެށުމުގެ ކުރިންނެވެ.
މި މައްސަލަ ތަހުގީގުކުރުމަށް އެފްބީއައި އިން އެހީތެރިކަން ދެމުންދާއިރު ހަމަލާދިން ދަރިވަރުގެ މައްޗަށް މީހުން މެރުމާއި މީހުން މަރަން އުޅުނުކަމުގެ ކުށުގެ ދައުވާ އުފުލޭނެ ކަމަށް އޮފިޝަލުން ވިދާޅުވެއެވެ.
