ފާރިސަށް ކުރާ ޝަހުސު އޮޅުވާލުމުގެ ދައުވާގެ އަޑުއެހުން މާދަމާ ފަށަނީ
ޝަރީއަތް ފަށަނީ މާދަމާ 11:00 ގައި
ފާރިސް ކްރިމިނަލް ކޯޓަށް ވެއްދި ވަގުތު ސަޕޯޓަރުން އޭނާއަށް ހަނާއަޅަނީ: ޝަރީއަތް ފަށަނީ ގިނަ ދުވަސްތަކަށްފަހު
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫނުގެ މައްޗަށް ކޮށްފައިވާ ޝަހްސު އޮޅުވާލުމުގެ ދައުވާގެ ޝަރީއަތުގެ އަޑުއެހުންތައް ހޯމަ ދުވަހު ފެށުމަށް ތާވަލުކޮށްފިއެވެ.
މިދިޔަ އަންގާރަ ދުވަހު ބޭއްވުމަށް ނިންމި އެ އަޑުއެހުން، ކެންސަލް ކުރުމަށްފަހު ހޯމަ ދުވަހުގެ 11:00 އަށް ވަނީ ތާވަލުކޮށްފައެވެ. މިދިޔަ ހަފްތާގައި ބާއްވަން އުޅުނު އެ މައްސަލައިގެ އަޑުއެހުން ކެންސަލް ކުރީ ފާރިސްގެ ވަކީލުންގެ އެދިވަޑައިގަތުމަކަށެވެ.
ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން، ފާރިސް މައުމޫނު އާ ދެކޮޅަށް އުފުލާފައިވާ މި ދައުވާގެ އަޑުއެހުން ގިނަ ދުވަސްތަކަކަށް ފަހު އަންގާރަ ދުވަހު ބޭއްވި އަޑުއެހުމުގައި ފާރިސް ދިފާއީ ވަކީލް އިބްރާހިމް ޝަމީލް ވަނީ މައްސަލައިގައި ތައްޔާރު ވުމަށް އެކަށީގެންވާ ވަގުތު ނުލިބުނުކަން ފާހަގަ ކުރައްވާފައެވެ. އޭނާ ވިދާޅުވީ ފާރިސްއާ އެކު މިދިޔަ ހަފުތާގައި ބައްދަލުވުމެއް ބާއްވައި ދިނުމަށް މޯލްޑިވްސް ކަރެކްޝަނަލް ސާވިސްގައި އެދުމުން އެ ފުރުސަތު ދީފައި ނުވާ ކަމަށާއި އެ ޝަރީއަތާ ގުޅޭ ގޮތުން މަޝްވަރާ ކުރައްވަން ބޭނުންވާތީ އަޑުއެހުން ފަސްކޮށް ދިނުމަށް އެދިވަޑައިގަންނަވާ ކަމަށެވެ.
އަންގާރަ ދުވަހު ބޭއްވި އަޑުއެހުމުގައި މައްސަލަ ބައްލަވާ ގާޒީ އިބްރާހިމް އަލީ އެދިވަޑައިގެންނެވީ ދިފާއީ ހެކީގެ ގޮތުގައި 47 ހެއްކެއް ފާރިސްގެ ފަރާތުން ހުށަހަޅާފައި ވާތީ، އެ އަދަދު މަދުކޮށްދެއްވުމަށެވެ. އެންމެ މުހިންމު ހެކިން ހުށަހެޅުމަށް ފުރުސަތު ދޭނެ ކަމަށް އޭނާ ވިދާޅުވި އެވެ. ނަމަވެސް، ދިފާއީ ވަކީލު ޝަމީލް ވިދާޅުވީ ހެކިން ކަނޑައެޅުމަށް ގާޒީ ދެއްވީ އެންމެ އެކަށީގެންވާ ވަގުތެއް ނޫން ކަމަށެވެ.
