ރާއްޖެއިން ވާދަކުރާ ސަލާމަތީ މަޖިލީހުގެ ގޮނޑިއަށް ވޯޓު ނެގުން ހުކުރު ދުވަހު
6 ޖޫން 2018 | ބުދަ 14:24އެ ގޮނޑި ކާމިޔާބު ކުރުމަށް ރާއްޖެއިން ދަނީ ވަރުގަދަ ކެމްޕެެއިނެއް ކުރަމުން
އދގެ ސަލާމަތީ މަޖިލީހުގެ ބައްދަލުވުމެއްގެ ތެރެއިން
އދގެ ސަލާމަތީ މަޖިލީހުގެ ކުރިއަށް އޮތް ދައުރަށް މެމްބަރު ޤައުމުތައް އިންތިޚާބުކުރުމަށް ބާއްވާ ވޯޓުލުން ހުކުރު ދުވަހު އޮންނާނެއެވެ.
އަންނަ އަހަރު ހުސްވާ އޭޝިއާ ޕެސިފިކް ގޮނޑިއަށް ރާއްޖެއިން ވާދަކުރާއިރު، ގޮނޑި ކާމިޔާބު ކުރުމަށް ރާއްޖެއިން ދަނީ ވަރުގަދަ ކެމްޕެެއިނެއް ކުރަމުންނެވެ. އެ ގޮނޑި ކާމިޔާބު ކުރުމަށް އދ. ގެ މެންބަރު ގައުމުތަކުގެ ތެރެއިން ތިން ބައިކުޅަ ދެބައި ގައުމުގެ ވޯޓު ކާމިޔާބު ކުރަން ޖެހޭނެއެވެ. ސަލާމަތީ މަޖިލީހުގައި ތިއްބަވާ ދާއިމީ ފަސް މެންބަރުންގެ އިތުރުން ދެން ތިބޭ 10 މެންބަރުންނަކީ ކޮންމެ ދެ އަހަރަކުން ބަދަލުވާ މެންބަރުންނެވެ. ހުކުރު ދުވަހުގެ ވޯޓު ރާއްޖެއަށް ކާމިޔާބު ވެއްޖެނަމަ ރާއްޖެއިން އދ.ގެ ސަލާމަތީ މަޖިލީހުގެ މެންބަރުކަން 2019 ވަނަ އަހަރާއި 2020 ވަނަ އަހަރު ކުރާނެއެވެ. ވޯޓު ކާމިޔާބު ކުރާ ގައުމުތަކުން އދ.ގެ ސަލާމަތީ މަޖިލީހުގެ ގޮނޑިއާއި ހަވާލުވާނީ 2019 ވަނަ އަހަރުގެ ޖެނުއަރީން ފެށިގެންނެވެ.
އދގެ ސެކިއުރިޓީ ކައުންސިލުގެ ނަން-ޕާމަނަންޓް ނުވަތަ ވަގުތީ މަންދޫބެއްގެ ގޮނޑިއަށް މި ސަރަހައްދުން ރާއްޖޭގެ އިތުރުން ދެން ވާދަ ކުރަނީ އިންޑޮނޭޝިޔާއިންނެވެ.
