ރިޔާސީ އިންތިހާބު ބާއްވާނެ ދުވަސް މާދަމާ ކަނޑައަޅާނެ ކަމަށް އިލެކްޝަންސް ކޮމިޝަނުން ބުނެފި އެވެ.
ދައުލަތުގެ މީޑިއާގެ "ޕީއެސްއެމް ނިއުސް" ގައި ވާހަކަ ދައްކަވަމުން އިލެކްޝަންސް ކޮމިޝަންގެ މެމްބަރު އަހުމަދު އަކްރަމް ވިދާޅުވީ ޤައުމީ ލަފާދޭ ކޮމެޓީގެ ބައްދަލުވުމެެއް މާދަމާ ބޭއްވުމަށް ހަމަޖެހިފައިވާ ކަމަށެވެ. އަދި ޤައުމީ ލަފާދޭ ކޮމެޓީއަކީ އެ ކޮމެޓީއެއްގައި ހުރިހާ ސިޔާސީ ޕާޓީތަކުގެ މަންދޫބުން ހިމެނޭ ކޮމެޓީއެއް ކަމަށާއި، ކޮމެޓީގެ ބައްދަލުވުމަށް ފަހު މާދަމާ އިންތިހާބު ބާއްވާނެ ތާރީހު ކަނޑައަޅާނެކަމަށް އަކްރަމް ވިދާޅުވި އެވެ.
"މާދަމާ ރިޔާސީ އިންތިހާބު ބާއްވާ ދުވަސް ފައިނަލްކޮށް ނިންމާނަން. އަޅުގަނޑުމެން ކޮމިޝަންގެ ބައްދަލުވުމެއް މާދަމާ އެބައޮތް."
އަކްރަމް ވިދާޅުވީ އިންތިހާބުގެ ތައްޔާރީތައް ވަރަށް ބާރަށް ކުރިއަށްދާ ކަމަށެވެ. އަދި އިންތިހާބުގެ ތައްޔާރީތަކުގެ 90 އިންސައްތަ ނިމިފައިވާ ކަމަށާއި، ޝަކުވާ ހުށަހެޅުމުގެ ނިޒާމް ފައްކާކޮށް، އިލެކްޝަންސް ކޮމްޕްލެއިންސް ބިއުރޯވެސް ޤާއިމްކޮށްފައިވާކަމަށް އަކްރަމް ވިދާޅުވި އެވެ.
އަކްރަމް ވިދާޅުވީ މި މަހު ވޯޓާސް ލިސްޓް ހާމަކޮށް، ރީ ރަޖިސްޓްރޭޝަނަށް ހުޅުވާލާނެ ކަމަށެވެ. އަދި އިންތިހާބަށް ކުރިމަތިލުމުގެ ފުރުސަތު އަންނަ މަހު ހުޅުވާލާނެ ކަމަށާއި، އެޔަށް ފަހު ސެޕްޓެމްްބަރު މަހުގެ ތާރީހެއްގައި އިންތިހާބު ބާއްވާނެ ކަމަށެވެ.
އަކްރަމް ވިދާޅުވިގޮޮތުގައި ކުރިއަށް އޮތް ރިިޔާސީ އިންތިހާބަކީ މިނިވަން އިިންސާފުވެރި އަދި ދެފުށް ފެންނަ އިންތިހާބަކަށްވާނެ އެވެ. އަދި އިންތިހާބުގައި ބޭނުންކުރާ ވޯޓު ކަރުދާސްތައް ވެސް ވެގެންދާނީ ސަލާމަތީ ގޮތުން ވަރުގަދަ ކަރުދާސްތަކަކަށް ކަމަށް އަކްރަމް ވިދާޅުވި އެވެ. އޭނާ ވިދާޅުވިގޮތުގައި ވޯޓަރސް ލިސްޓު ވެސް ކުރިން ބޭއްވި އިންތިހާބުތަކަށް ވުރެ ފުރިހަމަވާނެ އެވެ.
ރިޔާސީ އިންތިހާބަށް ތައްޔާރުވަމުން އަންނައިރު، އިދިކޮޅު ފަރާތްތަކުން ވަނީ މިހާރުުގެ އިލެކްޝަންސް ކޮމިޝަނާއެކު މިނިވަން އިންސާފުވެރި އިންތިހާބެއް ނުބޭއްވޭނެ ކަމަށް ބުނެފަ އެވެ. އަދި އެ ކޮމިޝަނަކީ ރައީސް އަބްދުﷲ ޔާމީންގެ އޯޑަރަށް މަސައްކަތްކުރައްވާ ބަޔަކު ތިބި، މިނިވަންކަމާއި ނަޖާހަތްތެރިކަން ގެއްލިފައިވާ ކޮމިޝަނެއްކަމަށް ވެސް އިދިކޮޅު ފަރާތްތަކުން ބުނެ އެވެ.
