އެއްބަސްވުމެއްނެތި ކާޑެއްދޫ އެއަރޕޯޓަށް މިލިއަނަކަށްވުރެ ގިނަ ރުފިޔާގެ ތެޔޮ ގަނެފައިވާކަން ހާމަވެއްޖެ
3 ޖޫން 2018 | އާދީއްތަ 06:23އެޕްރޮޖެކްޓެއް ހަވާލުކުރާނެ ފަރާތެއް ހޯދުމަށް ޢާންމުކޮށް އިޢުލާން ކޮށްފައެއް ނުވޭ
އެއަރޕޯޓް: ތެޔޮ ގަތުމަށް އިއުލާން ކޮށްފައެއް ނެތް
އިއުލާން ކުރުމެއް އަދި އެއްބަސްވުމެއް ނެތި ގދ ކާޑެއްދޫ އެއަރޕޯޓަށް މިލިއަނަކަށް ވުރެ ގިނަ ރުފިޔާގެ ތެޔޮ ގަނެފައިވާކަން ހާމަވެއްޖެއެވެ.
އެކަން ހާމަވެފައިވަނީ ޓޫރިޒަމް މިނިސްޓްރީގެ މިދިޔަ އަހަރުގެ މާލީ އޮޑިޓް ރިޕޯޓުންނެވެ.
އޮޑިޓަރ ޖެނެރަލް ހަސަން ޒިޔާތު ސޮއި ކުރައްވާ ނެރުއްވާފައިވާ އޮޑިޓް ރިޕޯޓުގައި ބުނެފައިވަނީ ތަކެތި ގަތުމާއި މަސައްކަތްތައް ކުރުވުމާއި ޚިދުމަތްތައް ހޯދުމުގައި ޕްރޮޖެޗްޓްތަކުގެ އަގު 35000 (ތިރީސް ފަސް ހާސް) ރުފިޔާއަށް ވުރެ ބޮޑުވާނަމަ، އެޕްރޮޖެކްޓެއް ހަވާލުކުރާނެ ފަރާތެއް ހޯދުމަށް ޢާންމުކޮށް އިޢުލާން ކުރަންވާނެ ކަމަށް ދައުލަތުގެ މާލިއްޔަތުގެ ގަވާއިދު (2017/R-20) ގެ 10.31 ގެ (ހ) ބަޔާންކޮށްފައިވީ ނަމަވެސް، ރީޖަނަލް އެއަރޕޯޓްސްގެ ދަށުން ހިންގާ ކާޑެއްދޫ އެއަރޕޯޓަށް ތެޔޮ ގަތުމުގައި ޢާއްމުކޮށް އިއުލާން ކޮށްފައި ނުވާ ކަމަށެވެ.
އޮޑިޓް ރިޕޯޓުގައި ބުނެފައިވާ ގޮތުގައި އިއުލާން ކުރުމަކާއި ނުލައި އެކިފަހަރު މަތިން ގަނެފައިވާ ތެލަށް 2017 ވަނަ އަހަރު ޖުމްލަ 1137939 (އެއް މިލިއަން އެއް ސަތޭކަ ތިރީސް ހަތް ހާސް ނުވަ ސަތޭކަ ތިރީސް ނުވައެއް) ރުފިޔާ ދައުލަތުގެ ބަޖެޓުން ޚަރަދު ކޮށްފައިވާ ކަމަށެވެ.
މީގެ އިތުރުން ދައުލަތުގެ މަސައްކަތެއް ކުރުމަށް ނުވަތަ ޚިދުމަތެއް ހޯދުމަށް އެއްވެސް ފަރާތަކާ ހަވާލު ކުރަންވާނީ، އެމަސައްކަތެއް ކުރުވުމާ ބެހޭގޮތުން ނުވަތަ އެ ޚިދުމަތެއް ހޯދުމާ ބެހޭގޮތުން ވެވޭ އެއްބަސްވުމެއްގައި ދެފަރާތުން ސޮއިކުރުމަށްފަހުގައި ކަމަށް ދައުލަތުގެ މާލިއްޔަތުގެ ޤަވާއިދުގެ 10.52 ގެ (ޅ) ގައި ބަޔާންކޮށްފައި ވީނަމަވެސް ކާޑެއްދޫ އެއަރޕޯޓްއަށް ތެޔޮ ގަންނަ ފަރާތާއެކު އެފަދަ އެއްބަސްވުމެއް ތައްޔާރުކޮށްފައި ނެތްކަމަށް ވެސް އޮޑިޓް ރިޕޯޓުގައި ވަނީ ބުނެފައެވެ.
މިކަމާ ބެހޭގޮތުން އަޅަންވީ ފިޔަވަޅުތަކުގެތެރޭގައި ބުނެފައި ވަނީ ދައުލަތުގެ މާލިއްޔަތުގެ ގަވާއިދުގެ 10.58 ވަނަ މާއްދާގައި ބަޔާންކޮށްފައިވާގޮތަށް ހޯދަން ބޭނުންވާ ޚިދުމަތް ނުވަތަ ގަންނަން ބޭނުންވާ ތަކެތި ހޯދާއިރު ޚިދުމަތް ހޯދުމަށް ހުއްދަދޭ ފޮތް ނުވަތަ ފޯމު ފުރިހަމަކޮށް އެކަމަށް ވެރިއަކު ހުއްދަ ދިނުމުން މެނުވީ ޕްރޮކިއުމެންޓް މަސައްކަތް ކުރިއަށް ނުގެންދިއުމަށެވެ. އަދި ދައުލަތުގެ މާލިއްޔަތުގެ ގަވާއިދު (2017/R-20) ގެ 10.31 ގެ (ހ) ގައި ބާޔާންކޮށްފައިވާ ގޮތަށް، ތަކެތި ގަތުމާއި މަސައްކަތްތައް ކުރުވުމާއި ޚިދުމަތްތައް ހޯދުމުގެ ޕްރޮޖެކްޓްތަކުގެ އަގު 35000 ރުފިޔާއަށްވުރެ ބޮޑުވާނަމަ އެޕްރޮޖެކްޓެއް ޙަވާލުކުރާނެ ފަރާތެއް ހޯދުމަށް ޢާއްމުކޮށް އިއުލާން ކުރުމަށް ދަންނަވާ ކަމަށެވެ. މީގެ އިތުރުން ދައުލަތުގެ މަސައްކަތެއް ކުރުމަށް ނުވަތަ ޚިދުމަތެއް ހޯދުމަށް އެއްވެސް ފަރާތަކާ ޙަވާލުކުރާނަމަ، ދައުލަތުގެ މާލިއްޔަތުގެ ޤަވާއިދުގެ 10.52 ގެ (ޅ) ގައި ބަޔާންކޮށްފައިވާ ގޮތަށް އެމަސައްކަތެއް ކުރުވުމާ ބެހޭގޮތުން ނުވަތަ އެޚިދުމަތެއް ހޯދުމާބެހޭ ގޮތުން ދެފަރާތުން އެއްބަސްވުމެއްގައި ސޮއިކުރުމަށް ވަނީ ލަފާ ދީފައެވެ.
