މާދަމާ އަކީވެސް މި ސަރުކާރު ބަލިކުރާނެ ދުވަހެއް: ޝިފާ
29 މެއި 2018 | އަންގާރަ 07:56މި ސަރުކާރަށް ނޫނެކޭ ބުނުމަށް ލިބިފައިވާ ފުރުސަތެއް
މާލޭ ސިޓީގެ މޭޔަރު އަދި އެމްޑީޕީގެ އަންހެނުންގެ ގޮފީގެ ރައީސާ ޝިފާ މުހައްމަދު
ކޮންމެ އިންތިޚާބެއްގައި ވެސް ރައްޔިތުން ނުކުމެ ބޯކޮށް ވޯޓު އަޅައި ސަރުކާރު ބަލިކުރަމުންދާ ކަމަށާއި ބުދަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީގައިވެސް ރައްޔިތުންގެ ތާއިދު އޮތް މިންވަރު ފެނިގެންދާނެ ކަމަށާއި އެއީ ސަރުކާރަށް ލިބޭ ބައްޔަކަށް ވާނެ ކަމަށް މާލޭ ސިޓީގެ މޭޔަރު އަދި އެމްޑީޕީގެ އަންހެނުންގެ ގޮފީގެ ރައީސާ ޝިފާ މުހައްމަދު ވިދާޅުވެއްޖެ އެވެ.
ހޯމަ ދުވަހުގެ ރޭ ރާއްޖެ ޓީވީގެ "ފަލަ ސުރުޚީ"ގައި ޝިފާ ވިދާޅުވީ މިއަދު މިވަނީ މި ސަރުކާރުން ކުރަމުންދާ އަނިޔާވެރި ކަންތައްތަކަށް ނޫނެކޭ ބުނުމަށް އަނެއްކާވެސް އެމްޑީޕީގެ ޕްރައިމަރީގެ ތެރެއިން ފުރުސަތު ލިބިފައި ކަމަށެވެ.
ކޮންމެ ދިވެހި ރައްޔިތަކަށްވެސް އެމީހަކު ވިސްނާ ވިސްނުން ތަކާއި، ހިޔާލު ފާޅުކުރުމުގެ ޖާގަ ގާނޫނު އަސާސީން ލިބިދީފައި ވާއިރު ރައްޔިތުން ބޭނުންވާ ބަޔަކަށް ވޯޓު ދޭން ރައްޔިތުންނަށް ނުނިކުމެވޭންވީ އެއްވެސް ސަބަބެއް ނެތް ކަމަށް ޝިފާ ވިދާޅުވިއެވެ.
ޕްރައިމަރީއާ ގުޅިގެން ސަރުކާރުން ދައްކާ އެއްވެސް ބިރަކަށް ކަންބޮޑުނުވާ ކަމަށާއި އެމްޑީޕީގެ މެމްބަރުން ނުކުމެ ވޯޓް އަޅާނެ ކަމަށް ޝިފާ ވިދާޅުވި އެވެ.
ޝިފާ ވިދާޅުވީ 2018ގެ ކެނޑިޑޭޓް ދެއްކުން އޮތީ ރައްޔިތުންގެ އަތުގައި ކަމަށާއި ރައީސް ޔާމީނަށް ނޫނެކޭ ބުނުމުގެ ފުރުސަތު ވެސް މިއަދު ލިބިފައިވާ ކަމަށެވެ. އެހެން ކަމުން އެމްޑީޕީން ނުކުމެ ރައީސް ނަޝީދަށް އޮތް ތާއީދު ދެއްކުމަކީ މުހިއްމު ކަމެއް އޭނާ ވިދާޅުވި އެވެ.
