ޕްރައިމަރީއަށް ޕާޓީ ތައްޔާރުވެއްޖެ، ވޯޓްލުން ހުއްޓުވާނެ ކަމަށް ގަބޫލެއް ނުކުރަން: އެމްޑީޕީ
28 މެއި 2018 | ހޯމަ 12:55ވޯޓް ފޮށި ބަހައްޓާ ހުރިހާ ރަށަކަށް ވޯޓް ކަރުދާސް ވަނީ ފޮނުވާފައި
ޕްރައިމަރީގެ ފަހުގެ ތައްޔާރީތަކާ ގުޅޭ ގޮތުން އެމްޑީޕީން ބޭއްވި ނޫސްވެރިންގެ ބައްދަލުވުން
މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީއަށް އެޕާޓީން ފުރިހަމައަށް ތައްޔާރު ވެފައިވާ ކަމަށް އެންޑީޕީން ބުނެފިއެވެ.
ހޯމަ ދުވަހު އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޕާޓީގެ ނާއިބު ރައީސް މުހައްމަދު ޝިފާޒް ވިދާޅުވީ އިލެކްޝަން ކޮމިޝަނުން އަންގައިގެން މި މަހުގެ 30 ވަނަ ދުވަހު ބާއްވާ އެމްޑީޕީ ޕްރައިމަރީ އަށް ފުލުހުން ހުރަސް އަޅާނެ ކަމަށް ގަބޫލުނުކުރާ ކަމަށެވެ. ޝިފާޒް މިހެން ވިދާޅުވި އިރު އެމްޑީޕީގެ ޕްރައިމަރީ ހުއްޓުވުމަށް ފުލުހުންނަށް އިލެކްޝަންސް ކޮމިޝަނުން އަންގާފައިވާކަމުގެ ވާހަކަތަކެއް ވަނީ ފެތުރިފައެވެ. ގަލޮޅު ދެކުނު ދާއިރާގެ މެންބަރު އަހްމަދު މަހްލޫފް ކުރެއްވި ޓްވީޓެއްގައި ވިދާޅުވެފައި ވަނީ އެމްޑީޕީގެ ޕްރައިމަރީ ހުއްޓުވުމަށް އިލެކްޝަންސް ކޮމިޝަނުން ފުލުހުންނަށް އަންގާފައިވާ ކަމަށެވެ. މިކަމާ ބެހޭ ގޮތުން އިލެކްޝަންސް ކޮމިޝަނުން ވެސް ފުލުހުން ވެސް އެއްޗެއް ހާމަކޮށްފައެއް ނުވެއެވެ.
ޕްރައިމަރީ ބޭއްވުމަށް ދެ ދުވަހަށް ވެފައިވާއިރު ވޯޓް ފޮށި ބެހެއްޓުމަށް ނިންމާފައިވާ ހުރިހާ ރަށްތަކާއި ގައުމުތަކަށް ވޯޓް ކަރުދާހާ ވޯޓް ފޮށި ފޮނުވިފައިވާ ކަމަށް ޝިފާޒް ވިދާޅުވިއެވެ.
އެމްޑީޕީންގެ އިންތިހާބާ ބެހޭ ކޮމެޓީގެ މުގައްރިރު މުހައްމަދު އިބްރާހިމް މަނިކު ވިދާޅުވީ ވޯޓުލުމަށް ހަމަޖެހިފައި ވަނީ 30 މެއި 2018 ވާ ބުދަ ދުވަހުގެ މެންދުރު 14:00 އިން 00:00 އަށް ކަމަށެވެ. ވޯޓު ފޮށިތަށް ބަހައްޓަން ހަމަޖައްސާފައި ވަނީ ރާއްޖޭގައި މީހުން ދިރިއުޅޭ ހުރިހާ ރަށަކާއި، ސްރީލާންކާގެ ކޮލޮމްބޯ އަދި ކެންޑީގެ އިތުރުން އިންޑިއާގެ ތިރުވަނަންތަޕޫރަމް (ޓްރިވެންޑްރަމް) އާއި ބެންގަލޫރު އަދި މެލޭޝިޔާގެ ކުއަލާލަމްޕޫރުގައެވެ. މީގެ އިތުރުން އިނގިރޭސި ވިލާތުގެ ލަންޑަނުގައި ވެސް ވޯޓުފޮށި ބެހެއްޓުމަށް ވަނީ ނިންމާފައެވެ.
ޕްރައިމަރީގެ ފަހުގެ ތައްޔާރީތަކާ ގުޅޭ ގޮތުން އެމްޑީޕީން ބޭއްވި ނޫސްވެރިންގެ ބައްދަލުވުން
މާލޭ ރައްޔިތުންނަން ހާއްސަކޮށްގެން މާލޭގައި ފަސް ވޯޓް ފޮއްޓެއް ބެހެއްޓުމަށް ނިންމާފައިވާއިރު، ހުޅުމާލެ އާއި ވިލިމާލޭގައި ވެސް ވޯޓް ފޮށި ބެހެއްޓުމަށް ވަނީ ހަމަޖައްސާފައެވެ. އަދި އަތޮޅުތެރޭގައި ދިރިއުޅޭ މާލޭގެ ރައްޔިތުންނަން ހާއްސަކޮށްގެން އެމްޑީޕީ އޮފީހާއި އެޕާޓީގެ ހަރުގޭގައި ވޯޓް ފޮށިތަށް ބެހެއްޓުމަށް ވެސް ވަނީ ނިންމާފާއެވެ.
އެމްޑީޕީގެ ރިޔާސީ ޕްރައިމަރީގެ ކަންކަން ބެލެހެއްޓުމަށް އެޕާޓީގެ އަސާސީ ގަވައިދާ އެއްގޮތަށް ފަސް މެމްބަރުންގެ ކޮމެޓީއެއް ވަނީ ނަގާފައެވެ. އެ ފަސް މެމްބަރުންނަކީ އެމްޑީޕީގެ ޗެއާޕާސަން ހަސަން ލަތީފާއި، އެޕާޓީގެ ނާއިބު ރައީސް މުހައްމަދު ޝިފާޒާއި، މާލޭ ސިޓީ ކައުންސިލްގެ މޭޔަރ އަދި އެ ޕާޓީގެ އަންހެނުންގެ ރޫހުގެ ރައީސާ ޝިފާ މުހައްމަދާއި، ޒުވާނުންގެ ރޫހުގެ ރައީސް މީކާއިލް ނަސީމްގެ އިތުރުން އެޕާޓީގެ އިންތިހާބާ ބެހޭ ކޮމެޓީގެ މުގައްރިރު މަނިކެއެވެ. އެ ފަސް މެމްބަރުންގެ ބެލުމުގެ ދަށުން ޕްރައިމަރީ ބޭއްވުމަށް ވާންޖެހޭ ފަހުގެ ތައްޔާރީތަށް މިހާރު ވެސް ވަމުން އަންނަ ކަމަށް އެމްޑީޕީން ބުންޏެއެވެ.
އެމްޑީޕީގެ ޕްރައިމަރީއަށް ކުރިމަތިލައްވާފައި ވަނީ ކުރީގެ ރައީސް މުހައްމަދު ނަޝީދު އެކަންޏެވެ. ޕްރައިމަރީގައި ރައީސް ނަޝީދު ވާދަކުރައްވަން ހުށަހެޅުއްވި ފޯމާއެކު، 7،739 މެމްބަރުންގެ ސޮއި ހިމެނޭ ތާއިދު ފޯމުތަކެއް ވެސް ވަނީ އެމްޑީޕީގެ އޮފީހަށް ހުށަހަޅާފައެވެ. އެމްޑީޕީ ޕްރައިމަރީގައި ވާދަ ކުރައްވާ ކެންޑިޑޭޓުން މަދުވެގެން 500 މެމްބަރުންގެ ތާއީދު ސޮއި ހުށަހަޅަން ޖެހެއެވެ. އެމްޑީޕީ ރިޔާސީ ޕްރައިމަރީގައި ވާދަ ކުރެއްވުމަށް "ޖަޒީރާ ރައީސް"ގެ ނަމުގައި ރައީސް ނަޝީދު ވަނީ ދަނީ ރާއްޖޭގެ އެކި ކަންކޮޅުތަކުގައި ކެމްޕެއިން ހަރަކާތަށް ކުރިއަށްގެންދަމުނެވެ.
