ސިޔާސީ ތިން ބޭފުޅަކު މަސައްކަތް ކުރާ ވުޒާރާ ބަދަލު ކޮށްފި
ޙާފިޒު ޔޫތު މިނިސްޓްރީއަށް
ތިން ބޭފުޅުން މަސައްކަތް ކުރާ މިނިސްޓްރީ ވަނީ ބަދަލުކޮށްފައި
ތިން މިނިސްޓްރީއެއްގައި ތިއްބެވި ސިޔާސީ ތިން ބޭފުޅެއްގެ މަގާމު ބަދަލުކޮށްފިއެވެ.
ރައީސް އޮފީހުން ބުނީ ފިޝަރީޒް މިނިސްޓްރީގެ ނައިބަކަށް ހުންނެވި އަޙްމަދު ޙާފިޒު ޔޫތު މިނިސްޓްރީގެ ސްޓޭޓް މިނިސްޓަރަކަށް ބަދަލުކޮށްފައިވާ ކަމަށެވެ. އަދި ޔޫތު މިނިސްޓްރީގެ ނައިބެއްގެ މަގާމުގައި ހުންނެވި ޢަބްދުލްމުޙްސިން ޙަމީދު (ޖޭފޯ) ހައުސިން މިނިސްޓްރީއަށް ބަދަލުކޮށްފައިވާ ކަމަށް ވެސް ރައީސް އޮފީހުން ބުންޏެވެ.
ރައީސް އޮފީހުން ބުނި ގޮތުގައި އިސްލާމިކް މިނިސްްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި ޙަސަން ރަޝީދު ހެލްތު މިނިސްޓްރީއަށް ބަދަލުކޮށްފައެވެ.
ހާފިޒު ފިޝަރީޒް މިނިސްޓްރީން، ޔޫތު މިނިސްޓްރީއަށް ބަދަލު ކުރެއްވިއިރު، އޭނާއަކީ މެރިން ރިސާޗް ސެންޓަރު ގައި ވެސް ގިނަ ދުވަސްތަކެއް ވަންދެން ޚިދުމަތް ކުރެއްވި އަދި މަސްވެރިކަމުގެ ދާއިރާއާ ގުޅުންހުރި ދިރާސާތައް ކުރެއްވި ބޭފުޅެކެވެ. އޭނާ ގެންދަވަނީ ދިވެހިރާއްޖޭގެ ގުޅުން (ދިރާގު) ޑިރެކްޓަރުންގެ ބޯޑުގެ މެމްބަރުކަން ވެސް އަދާކުރައްވަމުންނެވެ.
ޔޫތު މިނިސްޓްރީގެ ނައިބަކަށް ހުންނެވި ޖޭފޯއަކީ ވެސް ކުޅިވަރުގެ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވަމުން ގެންދަވާ ބޭފުޅެކެވެ. ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރުކަން ވެސް ކުރެއްވި ޖޭފޯ ހައުސިން މިނިސްޓްރީއަށް ބަދަލު ކުރެއްވި ސަބަބެއް ރައީސް އޮފީހަކުން ނުބުނެއެވެ.
