މިދިޔަ ހުކުރު ދުވަހު ލ. ކައްދު އަށް ދިޔަ މޯލްޑިވިއަންގެ މަތިންދާ ބޯޓެއްގެ ތެރޭގައި ކެބިން ކުރޫއާ ޒުވާބުކުރި މައްސަލާގައި ހައްޔަރުކުރި ތިން މީހުން ހަ މަސް ވަންދެން އެ އެއާލައިންގެ އެއްވެސް ބޯޓެއްގައި ދަތުރުކުރުން މަނާކޮށްފިއެވެ.
އެގޮތަށް މަނާކޮށްފައިވަނީ ހޮނިހިރު ދުވަހު ލ. އަތޮޅު މެޖިސްޓްރޭޓް ކޯޓުންނެވެ.
މިދިޔަ ހުކުރު ދުވަހުގެ ރޭ 7:30 ގައި ކައްދު އަށް ޖެއްސި މަތިންދާ ބޯޓުގައި ތިބި ފަސް ފިރިހެނަކު، ކެބިން ކުރޫއާ ޒުވާބުކޮށް ހުތުރު ބަހުން މުއާމަލާތުކުރި މައްސަލާގައި ކައްދޫ ޕޮލިސް ސްޓޭޝަނަށް ހާޒިރުކޮށް، އޭގެ ތެރެއިން ތިން މީހަކު ހައްޔަރުކުރި އެވެ. އެ ތިން މީހުން މޯލްޑިވިއަންގެ ބޯޓުތަކުން ދަތުރުކުރުން މަނާކުރުމަށް ފަހު ކޯޓުން ވަނީ އެ މީހުން ދޫކޮށްލައިފަ އެވެ.
މައުލޫމާތު ލިބިފައިވާ ގޮތުގައި އެ ތިން މީހުން ދޫކޮށްލީ ހަ މަސް ވަންދެން މޯލްޑިވިއަންގެ އެއްވެސް ފްލައިޓަކުން ދަތުރު ނުކުރުމަށާއި ތަހުގީގަށް ފުލުހުންނަށް އެއްބާރުލުން ދިނުމަށް ޝަރުތުކޮށްފައެވެ.
ރާއްޖެ އެމްވީއަށް މައުލޫމާތު ދެއްވަމުން ފުލުހުންގެ މީޑިޔާ އޮފިޝަލް ވިދާޅުވީ އެމީހުން ކޯޓުން ދޫކޮށްލީ ޝަރުތުތަކެއް ކޮށްފައެވެ. އޭގެ ތެރޭގައި ތަހުގީގަށް އެއްބާރުލުން ދިނުން އެއް ޝަރުތުގެ ގޮތުގައި ހިމެނޭއިރު ކުރި ޝަރުތުތަކުގެ ތަފްސީލެއް ފުލުހުން ނުދެއްވައެވެ.
ފުލުހުން ބުނީ އެމީހުންގެ މައްސަލަ ތަހުގީގު ކުރަމުން އަންނަ ކަމަށެވެ.