ރާއްޖެ އާއި ސެންޓްރަލް އެފްރިކަން ރިޕަބްލިކްއާ ދެމެދު ސިޔާސީ ގުޅުން ގާއިމުކޮށްފި އެވެ.

ފޮރިން މިނިސްޓްރީގެ ވެބްސައިޓްގައި ބުނެފައިވާ ގޮތުގައި ރާއްޖެ އާއި ސެންޓްރަލް އެފްރިކަން ރިޕަބްލިކާ ދެމެދު ގުޅުން ގާއިމުކުރުމުގެ އެއްބަސްވުމުގައި ދެ ގައުމުން ސޮއި ކުރީ ބުރާސްފަތި ދުވަހުގައި ކަމަށެވެ.

ދިވެހިރާއްޖޭގެ ފަރާތުން މި ލިޔުމުގައި ސޮއިކުރެއްވީ، އ.ދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދު އެވެ. ސެންޓްރަލް އެފްރިކަން ރިޕަބްލިކްގެ ފަރާތުން ސޮއިކުރެއްވީ އ.ދ. އަށް ކަނޑައަޅުއްވާފައި ހުންނަވާ އެ ގައުމުގެ ދާއިމީ މަންދޫބު އެމްބްރޮއިސިން ޕޮންގޯ އެވެ.

ސެންޓްރަލް އެފްރިކަން ރިޕަބްލިކް އާ އެކު ސިޔާސީ ގުޅުން ގާއިމު ކުރެވުމުން، ރާއްޖެއާއެކު ސިޔާސީ ގުޅުން އޮންނަ ގައުމުތަކުގެ އަދަދު ވަނީ 169އަށްއަރާފައެވެ.

ސެންޓްރަލް އެފްރިކަން ރިޕަބްލިކްއަކީ ސެންޓްރަލް އެފްރިކާގެ އެންމެ ބިން ބޮޑު އެއް ގައުމެވެ. އެ ގައުމުގެ އާބާދީގައި ގާތްގަނޑަކަށް 4.6 މިލިއަން މީހުން ހިމެނެއެވެ. ސިޔާސީ ގުޅުން ގާއިމުކުރުމުގެ ކުރިން ވެސް، ދިވެހިރާއްޖެއާއި ސެންޓްރަލް އެފްރިކަން ރިޕަބްލިކް ދަނީ އ.ދ.ގެ ތެރޭގައާއި ބައިނަލްއަގްވާމީ އެހެނިހެން ޖަމްއިއްޔާތަކުގެ މެންބަރުންގެ ހައިސިއްޔަތުން އެކުގައި މަސައްކަތްކުރަމުންނެވެ. އދ.ގެ ސަލާމަތީ މަޖިލީހުގެ ގޮޑިއެއް ހޯދުމަށް ރާއްޖެއިން މިހާރު ވަނީ ކެންޕެއިން ފަށާފައެވެ. އދ.ގެ ސަލާމަތީ މަޖިލީހުން ހުސްވާ ގޮޑިތަކަށް އިންތިޚާބުވުން އޮންނާނީ މިއަހަރުގެ ފަހުކޮޅުގައެވެ.