އަރިދަފުސް ރޯގާއާއި ޑެންގީ ފެތުރެމުންދާތީ ރައްކާތެރިވުމަށް ހެލްތު މިނިސްޓްރީއިން އިލްތިމާސް ކޮށްފި
ބަލިތައް ޖެޙޭ މީހުންގެ އަދަދު ދަނީ އިތުރުވަމުން
އޭޑީކޭ ހޮސްޕިޓަލް
އަރިދަފުސް ރޯގާއި ޑެންގީ ހަލުވިކޮށް ރާއްޖޭގައި ފެތުރެމުންދާތީ ރައްކާވެ ތިބުމަށް ހެލްތު މިނިސްޓްރީގެ ދަށުން ހިގާ ހެލްތު ޕްރޮޓެކްޝަން އޭޖެންސީއިން އިލްތިމާސް ކޮށްފިއެވެ.
ހެލްތު ޕްރޮޓެކްޝަން އޭޖެންސީއިން ބުނީ ބަލިތައް ދުވަހަކަށް ވުރެ ދުވަހެއް ފެތުރޭ މިންވަރު އިތުރު ވަވުންދާ ކަމަށާއި މިހާތަނަށް ބަލިތައް ކޮންޓްރޯލް ކުރެވިފައި ނުވާކަމަށެވެ. މާލޭގައި ބޮޑަށް ފެތުރެނީ ރޯގާ ކަމަށާއި ރާއްޖޭގެ އެކި ކަންކޮޅުތަކުގައި ފެތުރެމުން ދަނީ ޑެންގީ ހުން ކަމަށް އެޗްޕީއޭ އިން ފާހަގަ ކޮށްފައިވެއެވެ.
މިދުވަސްވަރު ކުރަމުން ގެންދާ ވިއްސާރައާ ގުޅިގެން ޑެންގީ ފެތުރުމުގެ ފުރުސަތު އޮތްކަން ފާހަގަކޮށް، މަދިރިން ރައްކާވެތިބުމަށް ހަށިގަނޑު ނިވާވާ ފޭރާން ލުމަށާއި މަދިރި ލޯޝަން އަދި މަދިރި ރެޕެލެންޓް ބޭނުން ކުރުމަށް ހެލްތް ޕްރޮޓެކްޝަން އޭޖެންސީއިން ވަނީ އާންމުންގެ ކިބައިން އެދިފައެވެ.
ހެލްތް ޕްރޮޓެކްޝަން އޭޖެންސީއިން ވަނީ އާންމު މައުލޫމާތުގެ ގޮތުގައި ހިއްސާކުރަމުން އަންނަ ރައްކާތެރިވުމުގެ ފިޔަވަޅުތައް އެޅުން މުހިންމުކަން ފާހަގަ ކޮށްފައެވެ. އެ އިދާރާއިން ވަނީ ބަޔާނެއްވެސް ނެރެ ރައްކާތެރި ކަމުގެ ހަތް ފިޔަވަޅު އެޅުމަށް އެދިފައެވެ.
ރައްކާތެރިވުމުގެ ފިޔަވަޅުތަކަކީ:
- ރޯގާ ޖެހިގެން އުޅޭނަމަ ކެއްސާ، ކިނބިހި އަޅާއިރު ރުމާ ނުވަތަ ޓިޝޫފަދަ އެއްޗަކުން އަނގަމަތި ފޮރުވުން. އަދި އަނގަމަތި ފޮރުވަން ބޭނުން ކުރާ ތަކެތި ހާމައަށް ނުބެހެއްޓުން
- އާންމު ސާފުތާހިރުކަމަށް، ޚާއްސަކޮށް ސައިބޯނި ލައިގެން އަތްދޮވުން ފަދަ ކަންކަމަށް ސަމާލުކަން ދިނުން
- ބަލިނަމަ މީހުން އެއްވެ އުޅޭތަންތަނަށް ނުދިއުން
- ބަލިނަމަ ކުޑަކުދިންނާ ދުރުގައި ހުރުން
- ދުންފަތުގެ އިސްތިއުމާލް ކުޑަކުދިން ކައިރީ، އެ ކުދިން ތިބޭ ތަންތަނުގައި ނުކުރުން
- ބަލި ޖެހުމުން، ނުރައްކާ ފުރުސަތު ބޮޑުމީހުންގެ ތެރެއިން އުމުރުން 5 އަހަރުގެ ދަށު ކުދިން، މާބަނޑު މީހުން، އުމުރުން ދޮށީ މީހުންނާއި ދިގު މުއްދަތަކަށް ފަރުވާކުރާ ބަލިމީހުން އިންފުލުއެންޒާއިން ރައްކާތެރިވުމަށް ވެކްސިން ޖެހުން، އަދި ބައްޔެއް މިފަރާތްތަކަށް ޖެހިއްޖިއްޔާ ވީހާވެސް އަވަހަކަށް ޑޮކްޓަރަށް ދެއްކުން
- ބަލި މީހާ ޑޮކްޓަރަށް ދައްކަން ދާއިރު ވީހާވެސް މަދު މީހުން ދިއުމާއި ހޮސްޕިޓަލުގައި ބާއްވައިފައި އޮންނަ މީހަކަށް ޒިޔާރާތް ކުރަން ކޮންމެހެން ޖެހިއްޖެ ހާލަތެއްގައި މެނުވީ ކުޑަ ކުދިންނާއި އުމުރުން ދުވަސްވީ މީހުންނާއި މާބަނޑު މީހުން ނުދިއުން
ހެލްތް ޕްރޮޓެކްޝަން އޭޖެންސީއިން މިކަންތަށް ފާހަގަ ކޮށްފައިވާއިރު އޭޑީކޭއިން މިމަހު 23 ވަނަ ދުވަހު ނެރުނު ތަފާސް ހިސާބުތަކުން ދައްކާ ގޮތުގައި މޭ 1 އިން 10 އާ ހަމައަށް ހުން ޖެހިގެން 550 މީހުން އެ ހޮސްޕިޓަލަށް ދައްކާފައިވާއިރު، މޭ 11-21 އަކާ ހަމައަށް ހުން ޖެހިގެން 1394 މީހުން ވަނީ ދައްކާފައިވެއެވެ.
ކޮންމެ އަހަރަކުވެސް މޭ މަހާއި އޯގަސްޓް މަހާއި ދެމެދު ރާއްޖޭގައި ޑެންގީ ފެތުރޭ މިންވަރު އިތުރުވެގެންދާއިރު، މި އަހަރުވެސް އެ މުއްދަތުގައި ރާއްޖޭގެ އެކި ހިސާބުތަކުގައި އެ ބަލި ފެތުރޭ މިންވަރު އިތުރުވެގެންދާނެ ކަމަށް އެޗްޕީއޭއިން ވަނީ ލަފާކޮށްފައެވެ.
