ހއ. އަތޮޅުން ފުރައިގެން މާލެ ދަތުރު ކުރަމުންދިޔަ "ޕީއެމްއެމްއޭ އެކްސްޕްރެސް 5" ނަމަކަށް ކިޔާ ބޯޓެއްގެ ބުރަފަތީގެ ބައެއް ބިންދައިގެން ގޮސްގެން އެމްއެންޑީއެފް މާލެ އޭރިއާ ކޯސްޓްގާޑް ސްކޮޑްރަން އިން އެހީތެރިކަން ފޯރުކޮށްދީފިއެވެ.
މި ހާދިސާގެ މައުލޫމާތު އެމްއެންޑީއެފް ކޯސްޓްގާޑަށް ބުދަ ދުވަހުގެ ހެނދުނު 10:26 ހާއިރު ލިބުމާއެކު ކޯސްޓްގާޑްގެ ލޯންޗެއް ވަނީ ހަރަކާތްތެރިވާން ފަށާފައެވެ. އެގޮތުން އެމްއެންޑީއެފް ކޯސްޓްގާޑް ފާސްޓް އިންޓަރސެޕްޓަރ ކްރާފްޓް "ވެލާނާ" ވަނީ މި ބޯޓު އޮތް ސަރަހަށްދަށް ގޮސް ބޯޓުގައި ފަސިންޖަރުންގެ ގޮތުގައި ތިބި އަށް މީހުން ވަނީ މާލެ ގެނެސްފައެވެ. މީގެ ތެރޭގައި ތިން ފިރިހެނުންނާއި ތިން އަންހެނުން އަދި ދެ ކުޑަކުދިން ހިމެނެއެވެ.
އެ ބޯޓުގެ ބުރަފަތީގެ ބައެއް ބިންދައިގެން ގޮސްފައިވަނީ ދަތުރު ކުރަމުންދަނިކޮށް ކ.ކާށިދޫ ކައިރިންނެވެ. އެ ބޯޓު މަޑު ސްޕީޑެއްގައި މާލެ އަށް ދަތުރުކުރަމުންދާ ކަމަށްވެސް އެމްއެންޑީއެފުން ބުންޏެވެ.
އެ ހާދިސާ ހިނގި ވަގުތުގައި ބޯޓުގައި ފަޅުވެރިންނާއި އެކު މުޅި ޖުމްލަ 22 މީހުން ތިއްބެވެ. އެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.