އެސެޓްސް ރިކަވަރީ ކޮމިޝަނުގެ މުއްދަތު އިތުރު ކޮށްފި
15 މެއި 2018 | އަންގާރަ 10:37މުއްދަތު އިތުރު ކޮށްފައިވަނީ ނޮވެމްބަރުމަހާ ހަމައަށް
ކޮމިޝަން އޮން ސްޓޭޓް އެސެޓްސް ރިކަވަރީ ގައި ތިއްބަވާ ބޭފުޅުން
ދައުލަތަށް ހިޔާނާތްވެފައިވާ ފަރާތްތަކުގެ އަތުން ދައުލަތަށް ލިބެންޖެހޭ ފައިސާ ހޯދަން އުފައްދާފައިވާ ކުންފުނި ކަމަށްވާ ކޮމިޝަން އޮން ސްޓޭޓް އެސެޓްސް ރިކަވަރީ މުއްދަތު އަންނަ ނޮވެމްބަރު މަހުގެ ނިޔަލަށް އިތުރު ކޮށްފިއެވެ.
ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި އެކޮމިޝަނުގެ މަސައްކަތްތަކާއި ބެހޭގޮތުން ވާހަކަ ދައްކަވަމުން ކޮމިޝަނުގެ ޗެއާ އަދި ހޯމް މިނިސްޓަރ އަހުމަދު އަޒްލީން ވިދާޅުވީ މިއަހަރުގެ ޖުލައި މަހުގެ 20އަށް އެކޮމިޝަންގެ މުއްދަތު ހަމަވާނެ ކަމަށް ކުރިން ރައީސް ޔާމީން ނިންމަވާފައިވާކަމުގައި ވިއަސް ނޮވެންބަރު މަހާއި ހަމައަށް ކޮމިޝަނުގެ މުއްދަތު އިތުރު ކޮށްފައިވާ ކަމަށެވެ.
މިދިޔަ އަހަރުގެ ޖުލައި މަހުގެ 20 ގައި އުފެއްދި އެސެޓްސް ރިކަވަރީ ކޮމިޝަނުގައި ތިއްބަވަނީ ހޯމް މިނިސްޓަރު އަހުމަދު އަޒްލީންގެ އިތުރުން ރައީސް އޮފީހުގެ ސްޓޭޓް މިނިސްޓަރު މުހައްމަދު މުޖުތާޒާއި، ހަދީޖާ ހަސަނާއި، ޑރ. އިބްރާހިމް މަހުފޫޒުގެ އިތުރުން ރޭނީޒް އަހުމަދު ސަލީމެވެ.
