ޓެރަރިޒަމްގެ ދައުވާ ވަނީ ހަގީގީ ޓެރަރިސްޓުންނަށް ނިވާފަތްގަނޑަކަށްވެފަ: ރޮޒޭނާ
9 މެއި 2018 | ބުދަ 23:40ރައީސް ޔާމީނާއި ހިޔާލު ތަފާތުވާ ކޮންމެ މީހަކަށް ދަނީ ޓެރަރިޒަމްގެ ދައުވާ އުފުލަމުން
ރައްޔިތުންގެ މަޖލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދާމް
ހަގީގީ ޓެރަރިސްޓުންނަން ފިލައިގެން އުޅުމުގެ ނިވާފަތްގަނޑަކަށް ވެފައި ވަނީ ޓެރަރިޒަމްގެ ދައުވާ ކަމަށް ރައްޔިތުންގެ މަޖލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދާމް ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން މ. ކުނޫޒުގައި ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރޮޒައިނާ އާދަމް ވިދާޅުވީ ދުނިޔޭގެ އެހެން ގައުމުތަކުގައި ޓެރަރިޒަމްގެ ދައުވާ އުފުލައި ޓެރަރިސްޓެއް ކަމަށް ހުކުމްކުރަނީ ބޮޑެތި ކުށްވެރިންނަށް ކަމަށެވެ. އެހެންނަމަވެސް މިއަދު ރާއްޖެއަށް ބަލާލާނަމަ ފެނިގެންދަނީ ރައީސް އަބްދުﷲ ޔާމީނާ ސިޔާސީ ގޮތުން ހިޔާލުތަފާތުވެ، އެމަނިކުފާނުގެ ސިޔާސަތު ތަކާއި ނުރުހޭ ކޮންމެ މީހެއްގެ މައްޗަށް ޓެރަރިޒަމްގެ ދައުވާ އުފުލާ މަންޒަރުކަމަށެވެ.
ސިޔާސީ ވަކި މަގުސަދެއް ހާސިލްކުރުމަށްޓަކައި އެކި އެކި ބޭފުޅުންނަން ޓެރަރިޒަމްގެ ދައުވާ އުފުލައި، ޓެރަރިސްޓެއްގެ ގޮތުގައި ކަނޑައަޅާކަން ފާހަގަކުރައްވާ ރޮޒައިނާ ވިދާޅުވީ އެކަމުގެ ނަތީޖާ އަކީ ހަގީގީ ޓެރަރިސްޓުންނަން ފިލައިގެން އުޅުމުގެ ނިވާފަތް ގަނޑަކަށް ޓެރަރިޒަމްގެ ދައުވާ ވުން ކަމަށެވެ. މިއަދު ބައިނަލްއަގްވާމީ މުޖުތަމައުން ވެސް ރާއްޖޭގައި ޓެރަރިޒަމްގެ ކުށް ސާބިތުވެފައި މީހުންނަކީ ޓެރަރިސްޓުންގެ ގޮތުގައި ނުބަލާކަމަށް ރޮޒައިނާ ވިދާޅުވިއެވެ.
ރާއްޖޭގައި ޓެރަރިޒަމްގެ ކުށް ސާބިތުވެފައިވާ މީހެއްގެ މައުލޫމާތު އެކި އެކި ގައުމުތަކުން ސާފުކުރާއިރު އެންމެ ފުރަތަމަ ބަލަނީ އެ ބޭފުޅަކީ ސިޔާސީ ބޭފުޅެއްތޯ ކަމަށް ރޮޒައިނާ ވިދާޅުވިއެވެ. އަދި ރާއްޖެއާއި ގުޅޭގޮތުން މިހާތަނަން މަޝްވަރާ ކުރި އެކި އެކި ވަފުދުތަކާއި މަދަނީ ޖަމިއްޔާތަކުން ވެސް އެވާހަކަ ބުނެފައިވާކަމަށް ރޮޒައިނާ ވިދާޅުވިއެވެ.
ރޮޒައިނާ ވަނީ ދަނގެތީ ދާއިރާގެ މެމްބަރު އިލްހާމް އަހްމަދުގެ މައްޗަށް ދައުލަތުން ޓެރަރިޒަމްގެ ދައުވާ އުފުލާފައިވާތީ ކަންބޮޑުވުން ފާޅުކުރައްވާފައެވެ. މެމްބަރު އިލްހާމް އަހްމަދުގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާއާ ގުޅިގެން ޝަރީއަތުގެ ކުރިން އޭނާ އެދުނު އެއްވެސް ކަމެއް ކޮށްދެއްވެން ނެތް ކަމަށް ނިންމައި، ޝަރީއަތް ފަށަން ނިންމާފައިވާތީ ރޮޒައިނާ ވަނީ ކަންބޮޑުވުން ފާޅުކޮށް ވާހަކަ ދައްކާފައެވެ.
