ޕްރިމިއާ ލީގަކާއެކު ޓޫރޭ ސިޓީ ދޫކޮށްލަން ނިންމައިފި

މި ސީޒަނަށްފަހު އިނގިރޭސި ޕްރިމިއާ ލީގުގެ ޗެމްޕިއަންކަން ޔަގީންކޮށްފައިވާ މެންޗެސްޓާ ސިޓީ ދޫކޮށްލުމަށް އެ ޓީމަށް ކުޅެމުން އަންނަ އައިވޮރީ ކޯސްޓުގެ މިޑްފީލްޑަރު ޔާޔާ ޓޫރޭ ނިންމައިފިއެވެ.

އުމުރުން 34 އަހަރުގެ މިޑްފީލްޑަރު ސިޓީ ދޫކޮށްލާނެކަން އެ ޓީމުގެ ކޯޗު ޕެޕް ގާޑިއޯލާ ވަނީ ކަށަވަރުކޮށްދީފައެވެ. 2010 ވަނަ އަހަރު ޓޫރޭ ސިޓީއާ ގުޅުނީ ސްޕެއިންގެ ބާސެލޯނާ ދޫކޮށް 24 މިލިއަން ޕައުންޑްގެ ފީއަކަށެވެ. އޭނާ ވަނީ މިދިޔަ އަހަރުގެ ޖޫން މަހު ސިޓީއާއެކު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. އެ އެއްބަސްވުން އިތުރު ނުކުރުމަށް ދެ ފަރާތުން ވެސް އެއްބަސްވެފައިވުމާއެކު އަންނަ ސީޒަނުގައި އޭނާ ސިޓީގެ ނޫ ޖާޒީއިން ނުފެންނާނެއެވެ.

ނޫސްވެރިންގެ ބައްދަލުވުމުގައި ޓޫރޭ ސިޓީ ދޫކޮށްލާނެކަން ކަށަވަރުކޮށްދެމުން ގާޑިއޯލާ ބުނީ ޓޫރޭ ސިޓީއާ ގުޅުނީ އޭނާގެ ކެރިއަރުގައި އާ ކަމެއް ފެށުމަށް ކަމަށާއި ސިޓީ މިހާރު އޮތް ހިސާބަށް އާދެވުނީ ޓޫރޭ ކުރި ބުރަ މަސައްކަތުން ކަމަށެވެ. އޭނާ ބުނީ ސިޓީގެ ކޯޗުގެ މަގާމުގައި މެނެއުލް ޕެލްގްރިނީ އަދި ރޮބާޓޯ މަންޗިނީ ހުރި ދުވަސްވަރު އެ ޓީމަށް ލިބުނު ކާމިޔާބުގެ ފަހަތުގައި ހުރީ ޓޫރޭ ކަމަށެވެ.

ބްރައިޓަންއާ ދެކޮޅަށް ބުދަ ދުވަހު ސިޓީގެ އަމިއްލަ ދަނޑުގައި ކުޅޭ މެޗު ވެގެންދާނީ އޭނާ ސިޓީއަށް ކުޅެދޭ އެންމެ ފަހު މެޗަށެވެ. އެކަމާ ބެހޭގޮތުން ވާހަކަ ދައްކަމުން ގާޑިއޯލާ ބުނީ އެ މެޗަކީ ޓޫރޭގެ އެންމެ ފަހު މެޗަށް ވުމާއެކު އޭނާގެ ޝަރަފުގައި އެ މެޗުގައި ހާއްސަ ކަންކަން ކުރުމަށް ނިންމާފައިވާ ކަމަށެވެ. އަދި ޓޫރޭ ފަދަ ކުޅުންތެރިޔަކަށް އަލްވަދާއު ކިޔަންޖެހޭނީ އެންމެ ފުރިހަމަޔަށް އެކަން ކުރާނެ ކަމަށް ގާޑިއޯލާ ބުނެފައިވެއެވެ.

ޓޫރޭ ވަނީ އޭނާގެ ކާމިޔާބު ކެރިއަރުގައި ސިޓީއަށް ޕްރިމިއާ ލީގުގައި 229 މެޗު ކުޅެދީފައެވެ. ހަމައެހެންމެ ޗެމްޕިއަންސް ލީގާއި އެހެން މުބާރާތްތައް ހިމެނޭ ގޮތަށް އޭނާ ވަނީ ސިޓީއަށް ޖުމްލަ 315 މެޗު ކުޅެދީ 82 ލަނޑު ޖަހައިދީފައެވެ. އޭނާ ވަނީ އެ ޓީމާއެކު ތިން ފަހަރެއްގެ މަތިން ޕްރިމިއާ ލީގު ކާމިޔާބުކޮށް ދެ ފަހަރު ލީގު ކަޕް ވެސް ކާމިޔާބުކޮށްފައެވެ. ހަމައެހެންމެ އެ ޓީމާއެކު އޭނާވަނީ އެފްއޭ ކަޕަކާއި ކޮމިއުނިޓީ ޝީލްޑެއް ވެސް ކާމިޔާބުކޮށްފައެވެ.