ޕީޕީއެމްގެ ބޮޑު ވަފުދެއް ޗައިނާ އަށް
މީ ޗައިނާގެ ކޮމިއުނިސްޓް ޕާޓީގެ ދައުވަތަކަށް ކުރާ ދަތުރެއް
ޕީޕީއެމްއިން ޗައިނާ އަށް ދާ ވަފުދު
ޗައިނާގެ ކޮމިއުނިސްޓް ޕާޓީގެ ދައުވަތަކަށް، ރާއްޖޭގެ ވެރިކަން ކުރާ ޕާޓީ ޕީޕީއެމްގެ އިސް ބޭފުޅުންގެ ވަފުދެއް ބުރާސްފަތި ދުވަހުގެރޭ ޗައިނާއަށް ފުރައިފި އެވެ.
ޕީޕީއެމްގެ ނައިބު ރައީސް އަދި ޓޫރިޒަމް މިނިސްޓަރު މޫސާ ޒަމީރު އިސްކޮށް ހުންނެވި އެ ވަފުދުގައި ހެލްތު މިނިސްޓަރު އަބްދުﷲ ނާޒިމާއި ރައްޔިތުންގެ މަޖިލީހުގެ ޕީޕީއެމްގެ ބައެއް މެމްބަރުންނާއި އެ ޕާޓީގެ ކައުންސިލްގެ ބައެއް މެމްބަރުން ހިމެނޭ ގޮތަށް 18 ބޭފުޅަކު ބައިވެރިވެވަޑައިގަންނަވަ އެވެ.
މިއީ ކޮންމެ އަހަރަކު ވެސް ޗައިނާގެ ކޮމިއުނިސްޓް ޕާޓީން ޕީޕީއެމަށް ދޭ ދައުވަތެކެވެ. މި ފަހަރުގެ ދަތުރުގައި، ދެ ޕާޓީގެ ހިންގުން ހަރުދަނާ ކުރުމާ ގުޅޭ ބައެއް ތަޖުރިބާތައް ހިއްސާކޮށް އަދި އެހީތެރިކަން ހޯދިދާނެ ދާއިރާތަކާ ގުޅޭ ގޮތުން މަޝްވަރާ ކުރާނެ ކަމަށް ޕީޕީއެމުން ބުންޏެވެ. މީގެ އިތުރުން، ޓޫރިޒަމާއި ސިއްހީ ދާއިރާ އަދި ތައުލީމީ ދާއިރާ އިން ޗައިނާގެ އެހީތެރިކަން ރާއްޖެ އަށް ހޯދޭނެ ގޮތްތަކާ ބެހޭ ގޮތުންނާއި ދެ ގައުމުގެ ތަޖުރިބާ އެ ދާއިރާތަކުން ހިއްސާ ކުރާނެ ކަމަށް ޕީޕީއެމުން ބުނެ އެވެ.
ރައީސް ޔާމީންގެ ސަރުކާރާއި ޗައިނާއާއި އެކު ގާތް ގުޅުމެއް އޮތް އިރު ރާއްޖޭގެ ތަރއްގީގެ ބޮޑެތި ބިޔަ މަޝްރޫއިތައް ވަނީ ޗައިނާއަށް ދީފައެވެ. ޗައިނާއާއި އެކު ރާއްޖެއިން ގުޅުން ބަދަހިކުރާ ވަރަކަށް އިންޑިއާއިން ރާއްޖެއާއި އެކު އޮންނަ ގުޅުން ހީނަރުވަމުންދާކަމަށް ގިނަ ބަޔަކު ބުނެއެވެ.
