އެމްޑީޕީގެ ޕްރައިމަރީ މެއި 30 ވަނަ ދުވަހު ބާއްވަން ގާރަރެއް ފާސްކޮށްފި
3 މެއި 2018 | ބުރާސްފަތި 12:10މި މަހުގެ 15 ވަނަ ދުވަހު ވާދަކުރައްވާ ކެނޑިޑޭޓުންނަށް ކުރިމަތިލުމުގެ ފުރުސަތު ހުޅުވާލަނީ
އެމްޑީޕީގެ ގައުމީ މަޖިލީހުގެ 162 ވަނަ ބައްދަލުވުމުގެ ތެރެއިން
މި އަހަރު ބާއްވާ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ފަރާތުން ވާދަކުރާނެ ކެނޑިޑޭޓަކު ހޮވުމަށް ބާއްވާ ޕްރައިމަރީ މިމަހުގެ 30 ވަނަ ދުވަހު ބާއްވަން އެޕާޓީގެ ގައުމީ މަޖިލީހުން ފާސްކޮށްފިއެވެ.
އެމްޑީޕީގެ ޕްރައިމަރީ އާއި ގުޅޭގޮތުން މުހިންމު ނިންމުންތަކެއް ނިންމާފައި ވަނީ ބުދަ ދުވަހުގެރޭ މާބުލް ހޮޓަލްގައި ބޭއްވި އެޕާޓީގެ 162 ވަނަ ބައްދަލުވުމުގައެވެ. އެ ބައްދަލުވުން ބާއްވާފައި ވަނީ މީޑިއާތަކަށް ނުވަދެވޭގޮތަށް، ސިއްރު މަޖިލީހެއްގެ ގޮތުގައެވެ.
ފަހުގެ ތާރީހެއްގައި މިހާތަނަން އެންމެ ގިނަ އަދަދެއްގެ މެމްބަރުން ބައިވެރި ގައުމީ މަޖިލީހުގެ ޖަލްސާގައި ރައީސް ނަޝީދުގެ ފަރާތުން ހުށައެޅި" ރިޔާސީ އިންތިހާބްގައި އެމްޑީޕީން ކަނޑައަޅާ ކެނޑިޑޭޓެއް ކަނޑައެޅުމުގައި އަމަލުކުރާނެ ގޮތުގެ ގަރާރު" ހުށައަޅުއްވާފައި ވަނީ އެޕާޓީގެ ނައިބް ރައީސް މުހައްމަދު ޝިފާޒްއެވެ. އެގަރާރު ހުށައަޅާފައި ވަނީ ވެސް އެޕާޓީގެ ގައުމީ މަޖިލީހުގެ 20 މެމްބަރުންނަން ވެރެ ގިނަ މެމްބަރުންގެ ތާއިދާއެކުގައެވެ. ގަރާރަށް ބަހުސް ކުރުމަށް ފަހު އެ ޖަލްސާއަށް ހާޒިރުވި 85 މެމްބަރުންގެ ތެރެއިން 72 މެމްބަރުންގެ ވޯޓާއެކު އެމްޑީޕީގެ ޕްރައިމަރީ މި މަހުގެ 30 ވަނަ ދުވަހު ބޭއްވުމަށާއި، ޕްރައިމަރީގައި ވާދަކުރައްވާ ކެނޑިޑޭޓުންނަން ކުރިމަތިލުމުގެ ފުރުސަތު މި މަހުގެ 15 ވަނަ ދުވަހު ހުޅުވާލަން ވަނީ ފާސްކޮށްފައެއެވެ. އެހެންނަމަވެސް މިކަމާއި ގުޅިގެން އެމްޑީޕީގެ ރަސްމީ ބަހެއް އަދި ނުލިބެއެވެ.
ރައީސް ނަޝީދުގެ ގަރާރު ޝިފާޒު ގައުމީ މަޖިލީހަށް އިއްވަނީ
އެމްޑީޕީން ފާސްކޮށްފައިވާ ގަރާރުގައި ބުނެފައި ވަނީ އެމްޑީޕީން އެއްބަސްވެ އިގްރާރުވަނީ، މި ހިނގާ 2018 ވަނަ އަހަރުގެ މެއި މަހުގެ 15 ވަނަ ދުވަހު، އެ ޕާޓީގެ ރިޔާސީ ޕްރައިމަރީއަށް ނަން ހުށައެޅުމުގެ ފުރުސަތު ހުޅުވާލުމަށާއި، އަދި 2018 ވަނަ އަހަރުގެ 30 މެއި ވަނަ ދުވަހުގައި ޕްރައިމަރީގައި ވޯޓަށް އެހުމަށާއި، އެ ވޯޓްއިން ޕާޓީގެ ރިޔާސީ ކެންޑިޑޭޓް ކަޑައެޅުމަށާއި، 2008 ވަނަ އަހަރުގެ ރިޔާސީ އިންތިހާބްގައި އެޕާޓީގެ ފަރާތުން ވާދަކުރާނެ ކެނޑިޑޭޓެއް ކަނޑައެޅުމަށް ބޭއްވުނު ޕްރައިމަރީއާއި، އަދި 2013 ވަނަ އަހަރު ގެ ރިޔާސީ އިންތިހާބުގެ ކެންޑިޑޭޓެއް ކަނޑައެޅުމުގެ ޕްރައިމަރީ ބެއްވުމުގައި އަމަލުކުރެވުނު ގޮތާއި، އަދި އެޕާޓީގެ ރައީސްގެ ރައީސް ކަމުގެ ޝަރުތުތައް ހަމަ ކަމަށް އެޕާޓީން ބަލައިގަނެ، ކުރިއަށް ގޮސްފައިވާ ގޮތާއި އަދި އެޕާޓީގެ މެމްބަރުންގެ ދަފްތަރަކީ އެ ޕާޓީން ކަނޑައަޅާ ހަމަތަކެއްގެ މަތީން ނިންމާ ދަފްތަރަކަށް ވުމަށާއި، އަދި އެފަދަ އެތައް އެ ބާވަތުގެ ކަންކަމާއި އެކު އެ ޕާޓީގެ ގައުމީ މަޖިލީސް އިތުރަށް އެއްބަސްވެ އިގުރާރު ވަނީ އެ ޕާޓީގެ އިންތިހާބާއިގުޅޭ ގަވައިދުގާ ހިމެނޭ އެންމެހާ ކަންކަން މާނަކޮށް ހިންގާނީ އިސްވެ ދެންނެވެނު، އިހުވެސް އެޕާޓީން އަމަލުކޮށްފައިވާ އުސޫލްތަކާއި ހަމަ ތަކުގެ މަތީންކަމަށާއި، އަދި އެއާއިކު، ގައުމީ މަޖިލީސް އެއްބަސްވެ އިގްރާރު ވަނީ ޕްރަމަރީއިން ކަނޑައެޅޭ އެޕާޓީގެ ރިޔާސީ ކެންޑިޑޭޓަށް އިންތިހާބުގައި ބައިވެރިނުވެވޭނެ އެއްވެސް ސަބަބެއް މެދުވެރިވެއްޖެނަމަ، ދެން އެޕާޓީން ކަންކުރާނެ ގޮތެއް ނިންމާނީ ގައުމީ މަޖިލީހުން ކަމަށެވެ.
އެމްޑީޕީގެ ގައުމީ މަޖިލީހުގެ 162 ވަނަ ބައްދަލުވުމުގެ ތެރެއިން
މި ގަރާރަށް އެޕާޓީގެ ލީޑަރޝިޕްގައި ހިމެނިވަޑައިގަންނަވާ ބޭފުޅުންނާއި ރައްޔިތުންގެ މަޖިލީހުގެ ގިނަ މެމްބަރުން ވާހަކަ ދެއްކެވިކަން ފާހަގަކުރެއެވެ. ގަރާރަށް ބަހުސް ކުރުމަށް ފަހު، ކުރެންދޫ ދާއިރާގެ ރައްޔިތުންގެ މަޖިލީހުގެ މެމްބަރު އަބްދުﷲ ބަރީ އެ ގަރާރަށް ހުށައެޅި އިސްލާހު ފާހެއް ނުވެއެވެ. ބާރީ ހުށައެޅުއްވި އިސްލާހުގައި ބުނެފައި ވަނީ އެޕާޓީގެ ރިޔާސީ ކެނޑިޑޭޓަށް އިންތިހާބުގައި ބައިވެރިނުވެވޭ އެއްވެސް ސަބަބެއް މެދުވެރިވެއްޖެނަމަ، ޖުލައި މަސް ނިމުމުގެ ކުރިން އަލުން ޕްރައިމަރީއެއް ބޭއްވުމަށެވެ.
އެމްޑީޕީގެ ގައުމީ މަޖިލީހުގެ 162 ވަނަ ބައްދަލުވުމުގެ ތެރެއިން
މިފަދަ ނިންމުމެއް އެމްޑީޕީގެ ގައުމީ މަޖިލީހުގެ ޖަލްސާއިން ނިންމިއިރު، އެޕާޓީގެ ރިޔާސީ ޕްރައިމަރީގައި ރައީސް ނަޝީދު ވާދަކުރައްވާނެކަން ވަނީ އިއުލާން ކުރައްވާފައެވެ. އެމަނިކުފާނު މިހާރު ހުންނެވި ޖަލު ޙުކުމެއްގައިކަމުން، އެ އިންތިޚާބުގައި ވާދަކުރެއްވުމުގެ ފުރުޞަތު، މި ހާލަތުގައި އެމަނިކުފާނަން ލިބިއެއް ނުލައްވާނެއެވެ. ކަންމިހެން އޮތް ނަމަވެސް، ސްރީލަންކާގެ ދަ ކެޕިޓަލް މަހާރާޖާ އޯގަނައިޒޭޝަން (ޓީސީއެމްއޯއެލް)ގެ އަހަރީ ޖަލްސާގައި ދެއްވި ތަގުރީރަކަށް ފަހު ރައީސް ނަޝީދު ވަނީ، ފަހުވަގުތު އެމަނިކުފާނަށް އިތިޚާބުގައި ވާދަ ކުރެވޭނެ ކަމަށް ނިންމާނެ ކަމަށް ވިދާޅުވެފައެވެ.
މި އަހަރުގެ ސެޕްޓެމްބަރު މަހު ރިޔާސީ އިންތިޚާބު ބާއްވާނެ ކަމާއި، ޖޫން މަހު ކެނޑިޑަސީ ހުށަހެޅުމުގެ ފުރުޞަތު ހުޅުވާލާނެކަން އިލެކްޝަން ކޮމިޝަނުން އިޢުލާނު ކޮށްފައިވާއިރު، ގުޅިފައިވާ ޕާޓީތަކުގެ ރޫޙު ހުރީ ވެސް ރައީސް ޔާމީން އާއި ދެކޮޅަށް ރިޔާސީ އިންތިޚާބުގައި އެއް ކެނޑިޑޭޓަކު ނެރުމަށެވެ. ނަމަވެސް އެފަރާތްތަކުން ވަނީ މިހާރު އޮތް އިލެކްޝަން ކޮމިޝަނާއި އެކު އިންސާފުވެރި އިންތިޚާބެއް ބޭއްވިދާނެ ކަމާއިމެދު ސުވާލު އުފައްދާފައެވެ.
