ޗެމްޕިއަންސް ލީގު: ފައިނަލްގައި ރެއާލްއާ ދެކޮޅަށް ނުކުންނާނީ ލިވަޕޫލް

ޔުއެފާ ޗެމްޕިއަންސް ލީގުގެ ފައިނަލުގައި ސްޕެއިންގެ ރެއާލް މެޑްރިޑާއި ދެކޮޅަށް ނުކުންނާނީ އިނގިރޭސިވިލާތުގެ ލިވަޕޫލްކަން ކަށަވަރުވެއްޖެއެވެ.

ލިވަޕޫލް ފައިނަލުގެ ޖާގައެއް ކަށަވަރުކުރީ 7-6 ގެ އެގްރިގޭޓް ނަތީޖާއަކުން އިޓަލީގެ ރޯމާގެ މައްޗަށް ކުރި ހޯދައިގެންނެވެ. މި ދެ ޓީމު ލިވަޕޫލްގެ ދަނޑުގައި ކުޅުނު ފުރަތަމަ ލެގުގެ މެޗު 5-2 އިން ލިވަޕޫލް ކާމިޔާބުކުރި ނަމަވެސް އެ ޓީމު ވަނީ ރޯމާގެ ދަނޑުގައި ކުޅުނު ދެވަނަ ލެގުގެ މެޗުން 4-2 ގެ ނަތީޖާއަކުން ބަލިވެފައެވެ. ޗެމްޕިއަންސް ލީގުގެ ފައިނަލްގެ އުއްމީދުގައި ނުކުތް ދެ ޓީމުން ވެސް ވަނީ މި މެޗުގައި ވަރުގަދަ ފުރަތަމަ އެގާރައެއް ކުޅެން ނެރެފައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މި މެޗުގެ ފުރަތަމަ ލަނޑު ޖަހާ ލީޑު ނެގީ ލިވަޕޫލްއިންނެވެ. ރޯމާގެ މެދުތެރެއިން ގެއްލުނު ބޯޅައެއްގެ ފައިދާ ނަގައިގެން ލިވަޕޫލްއަށް ފުރަތަމަ ލަނޑު ޖަހައި ލީޑު ނަގައިދިނީ މާނޭއެވެ.

މި ލަނޑަށްފަހު ރޯމާއިން އެ ޓީމުގެ ކުޅުން ރަނގަޅު ކުރުމުގެ ނަތީޖާއެއްގެ ގޮތުން މެޗުގެ 15 ވަނަ މިނެޓުގައި އެ ޓީމުން ވަނީ ލަނޑެއް ޖަހާ ނަތީޖާ ހަމަހަމަކޮށްފައެވެ. މި ލަނޑަކީ ލިވަޕޫލްގެ ޑިފެންސުން ހެދުނު ގޯހެއްގައި އެ ޓީމުގެ މިލްނާ އަތުން ބައިކޮޅަށް ވަން ލަނޑެކެވެ. ރޯމާގެ ކުޅުން އިތުރަށް ވަރުގަދަކުރިއިރު ލިވަޕޫލްއިން ކުޅެފައިވަނީ ކައުންޓާއަށް ވިސްނައިގެންނެވެ. މެޗުގެ 25 ވަނަ މިނެޓުގައި ލިވަޕޫލްއިން ވަނީ އަނެއްކާ ވެސް މެޗުގެ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ ޖޯޖީނިއޯ ވައިނާލްޑަމްއެވެ.

އެއް ލަނޑުގެ ލީޑެއްގައި އޮވެ ލިވަޕޫލްއިން ފުރަތަމަ ހާފު ނިންމާލިއިރު ދެވަނަ ހާފުގައި ރޯމާއިން ވަނީ މެޗުގެ ކޮންޓްރޯލާ ނަގާފައެވެ. އެގޮތުން މެޗުގެ 52 ވަނަ މިނެޓުގައި އެޑިން ޒެކޯ ވަނީ ލަނޑެއް ޖަހާ އެ ޓީމަށް ނަތީޖާ ހަމަހަމަކޮށްދީފައެވެ. ރޯމާއިން ފުލުފުލުގައި ލިވަޕޫލްގެ ގޯލަށް ނުރައްކާތެރި ހަމަލާތައް ފޮނުވާލަމުންދިޔައިރު ލިވަޕޫލްގެ ކީޕަރު ލޯރިއަސް ކާރިއަސް ވަނީ ގިނަ ސޭވްތަކެއް މި މެޗުގައި ކޮށްފައެވެ.

މެޗުގެ 86 ވަނަ މިނެޓުގައި ނައިންގޮލަން ވަނީ ހިތްގައިމު ލަނޑެއް ޖަހާ ރޯމާއަށް މެޗުގައި ފުރަތަމަ ފަހަރަށް ލީޑު ނަގައިދީ ފައިނަލްގެ އުއްމީދު އާކޮށްދީފައެވެ. ރޯމާގެ އުއްމީދުތައް އިތުރަށް ބޮޑުވެގެންދިޔައީ މެޗުގެ އިތުރު ވަގުތުގެ ތެރޭގައި ލިބުނު ޕެނަލްޓީއާއެކުއެވެ. މި ޕެނަލްޓީ ވެސް ނައިންގޮލަން ކާމިޔާބުކުރިއިރު އެ ޓީމަށް މެޗު އިތުރު ވަގުތައް ގެންދެވިފައެއް ނުވެއެވެ.

މި ދެ ޓީމު ކުޅުނު ސެމީ ފައިނަލް ވެގެންދިޔައީ ދެ ލެގުގެ އެގްރިގޭޓަށް ބަލާއިރު އެންމެ ގިނަ ލަނޑު ފެނިގެންދިޔަ ޗެމްޕިއަންސް ލީގުގެ ސެމީ ފައިނަލަށެވެ. ލިވަޕޫލް ވެގެންގޮސްފައިވަނީ 2013 ވަނަ އަހަރުގެ ޗެމްޕިއަންސް ލީގުގައި ރަށުން ބޭރުގައި ރެއާލް މެޑްރިޑް 20 ލަނޑު ޖެހިފަހުން އެއަދަދަށް ރަށުން ބޭރުގައި ލަނޑު ޖެހި ފުރަތަމަ ޓީމަށެވެ. މިއަހަރުގެ ފައިނަލް ވެގެންދާނީ ލިވަޕޫލް ޗެމްޕިއަންސް ލީގުގެ ފައިނަލުން ފެނިގެންދާނެ އަށްވަނަ ފަހަރަށެވެ. މި އަދަދަށް އިނގިރޭސިވިލާތަށް ނިސްބަތްވާ އެހެން އެއްވެސް ޓީމަކަށް ފައިނަލްގައި ވާދަކުރެވިފައެއް ނުވެއެވެ.

މިދިޔަ ދެ އަހަރުގެ ވެން ޗެމްޕިއަނުން ކަމަށްވާ ރެއާލް މެޑްރިޑާއި ދެކޮޅަށް ލިވަޕޫލް ފައިނަލްގައި ނުކުންނާނީ މި މަހުގެ 26 ވަނަ ދުވަހު ޔޫކްރެއިންގެ ކިއޭވްގައި ހުންނަ އޮލިމްޕިކް ސްޓޭޑިއަމްގައެވެ.