ޖެމްސްގެ ހިދުމަތް ކަނޑާލަން އުއްތަމަ ފަނޑިޔާރު އެންގެވި: ހެކި

ސަރުކާރުގެ އިދާރާތަކުން ސުޕްރީމް ކޯޓަށް ފޮނުވާ ލިޔުންތައް އެ ކޯޓަށް ނުލިބޭ ގޮތަށް، ގަވަމެންޓް އީލެޓާރ މެނޭޖުމަންޓް ސިސްޓަމް (ޖެމްސް)ގެ ހިދުމަތް މެދުކަނޑާލަން އުއްތަމަފަނޑިޔާރު އަބްދުﷲ ސައީދު އެންގެވި ކަމަށް ސުޕްރީމް ކޯޓުގެ އިސް މުވައްޒަފަކު ކްރިމިނަލް ކޯޓުގައި ހެކިބަސް ދީފި އެވެ.

ކާކުކަން ނޭނގޭ ގޮތަށް، އަޑު ބަދަލުކޮށްގެން ސުޕްރީމް ކޯޓުގެ އިސް މުވައްޒަފަކު، ކްރިމިނަލް ކޯޓުގެ ޝަރީއަތުގައި އެގޮތަށް ހެކިބަސް ދީފައި ވަނީ އުއްތަމަ ފަނޑިޔާރުގެ މައްޗަށް އުފުލާފައިވާ ދައުލަތުގެ މަސައްކަތަކަށް ހުރަސް އެޅި ކަމުގެ ދައުވާއާ ގުޅިގެންނެވެ.

އެ ދައުވާއާ ގުޅިގެން ހެކިބަސް ދެމުން ހެކިވެރިޔާ ބުނީ ޖެމްސްގެ ހިދުމަތް މެދުކަނޑާލުމަށްފަހު، އަލުން ހިދުމަތް ދިނުމަށް ވެސް އުއްތަމަފަނޑިޔާރު އެންގެވި ކަމަށެވެ. އެ "އިންސްޓްރަކްޝަން" ދެއްވާފައި ވަނީ ފޯނުންނާއި "ފޭސް ޓު ފޭސްކޮށް" ކަމަށް ހެކިވެރިޔާ ބުންޏެވެ.

އެގޮތުން މިއަހަރުގެ ފެބްރުއަރީ މަހުގެ ހަތަރު ވަނަ ދުވަހު އުއްތަމަ ފަނޑިޔާރު އޭނާގެ ފޯނަށް ގުޅުއްވި ކަމަށާއި ޖެމްސްގެ ސާވާ ޑައުން ކުރުމަށް އެމަނިކުފާނު އެންގެވި ކަމަށެވެ. އުއްތަމަ ފަނޑިޔާރު އެންގެވި ގޮތަަށް ކަމާބެހޭ ސެކްޝަނަށް އަންގައި، މިދިޔަ ފެބްރުއަރީ މަހުގެ ހަތަރު ވަނަ ދުވަހާއި ފަސް ވަނަ ދުވަހު ޖެމްސްގެ ހިދުމަތް މެދުކަނޑާލާފައިވާނެ ކަމަށް ހެކިވެރިޔާ ބުންޏެވެ. އެގޮތަށް އަމަލު ކުރެއްވީ އުއްތަމަފަނޑިޔާރު އެންގެވުމުން ކަމަށާއި އެކަން ކުރިއިރު، އެއީ މަނާ ކަމެއްކަން ނޭނގޭ ކަމަށް ހެކިވެރިޔާ ބުންޏެވެ.

އޭނާ ބުނި ގޮތުގައި ފެބްރުއަރީ މަހުގެ ފަސް ވަނަ ދުވަހުގެ ހެނދުނު ސުޕްރީމް ކޯޓުގައި "ފޭސް ޓު ފޭސްކޮށް" ވާހަކަ ދައްކަވަމުން ވެސް، ޖެމްސްގެ ހިދުމަތް މެދުކަނޑާލަން އުއްތަމަފަނޑިޔާރު އެންގެވި އެވެ. އުއްތަމަފަނޑިޔާރު އެގޮތަށް އެންގެވިއިރު، އެ ވަގުތު އެތަނުގައި ފަނޑިޔާރު އަލީ ހަމީދާއި ފަނޑިޔާރު އަބްދުﷲ އަރީފުގެ އިތުރުން ޖުޑީޝަލް އެޑްމިނިސްޓްރޭޓަރ ހަސަން ސައީދު ވެސް ހުންނެވި ކަމަށް ހެކިވެރިޔާ ބުންޏެވެ.

އުއްތަމަ ފަނޑިޔާރުގެ މައްޗަށް އުފުލާފައިވާ ދައުލަތުގެ މަސައްކަތަކަށް ހުރަސް އެޅި ކަމުގެ ދައުވާ އޭނާގެ މައްޗަށް ސާބިތު ކުރުމަށް ދައުލަތުން ހުށަހެޅި ހަތަރު މީހެއްގެ ހެކިބަސް ކޯޓުގައި ބުރާސްފަތި ދުވަހު ނަގާފައިވެއެވެ. އެގޮތުން ތިން މީހަކު ހެކިބަސް ދީފައި ވަނީ ވީޑީއޯ ކޮންފަރެންސް މެދުވެރިކޮށް، ކާކުކަން ނޭނގޭ ގޮތަށް އަޑު ބަދަލުކޮށްގެންނެވެ.

ސިއްރުން ހެކި ބަސް ދިން މީހުންގެ ތެރޭގައި ޖެމްސްގެ ހިދުމަތް ކަނޑާލަން އަމަލީ ގޮތުން މަސައްކަތް ކުރި ސުޕްރީމް ކޯޓުގެ އައިޓީ ޑިޕާޓްމަންޓުގެ މުވައްޒަފަކު ވެސް ހިމެނެއެވެ. ހެކިބަސް ދެމުން އޭނާ ބުނީ ނެޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) މެދުވެރިކޮށް، ސުޕްރީމް ކޯޓަށް ގުޅާފައިވާ ޖެމްސްގެ ހިދުމަތް ލިބޭ ސިސްޓަމްގެ ވާގަނޑު އުފުރާލީ އޭނާ ކަމަށާއި އެގޮތަށް އަމަލު ކުރެއްވީ ސުޕްރީމް ކޯޓުގެ އިދާރީ އިސް މުވައްޒަފެއްގެ އެންގެވުމަށް ކަމަށެވެ. އޭނާ ބުނި ގޮތުގައި ޖެމްސްގެ ހިދުމަތް މެދުކަނޑާލަން ސީދާ އުއްތަމަ ފަނޑިޔާރު އަންގަވާފައެއް ނުވެއެވެ.

ބުރާސްފަތި ދުވަހު ބޭއްވި ޝަރީއަތުގައި އެންސީއައިޓީގެ މުވައްޒަފަކު ވެސް ސިއްރުން ހެކިބަސް ދީފައިވެއެވެ. ދައުލަތުގެ ވަކީލުން ކުރެއްވި ސުވާލުތަކަށް ޖަވާބު ދެމުން އެންސީއައިޓީގެ މުވައްޒަފު ބުނީ ފެބްރުއަރީ ހަތަރެއް، އަދި ފަސް ވަނަ ދުވަހު ސުޕްރީމް ކޯޓުން ޖެމްސްގެ ހިދުމަތް މެދުކެނޑުނުކަން އެނގިގެން، އެ ކޯޓުގައި އެކަމަށް ކަނޑައަޅާފައިވާ ފޯކަލް ޕޮއިންޓަށް ގުޅައި، ވެގެން އުޅޭ ގޮތް ސާފު ކުރި ކަމަށެވެ. ޖަވާބުގައި "ޖެމްސްގެ ހިދުމަތް މެދުކެނޑުނީ ނޫން ކަމަށާއި މެދުކަނޑާލީ ކަމަށް" އެ ކޯޓުގެ ފޯކަލް ޕޮއިންޓު ބުނެފައިވާ ހެކިވެރިޔާ ބުންޏެވެ. "ވެގެން އުޅޭ ގޮތް އަންޑަސްޓޭންޑުވާނެ" ކަމަށް އުންމީދު ކުރާ ކަމަށް ވެސް އޭނާ ބުނި ކަމަށް ވެސް ހެކިވެރިޔާ ބުންޏެވެ.

އުއްތަމަފަނޑިޔާރުގެ މައްޗަށް އުފުލާފައިވާ ދައުވާއާ ގުޅިގެން، ދެން އޮންނަ ޝަރީއަތެއްގައި އޮންނާނީ ދިފާއީ ހެކި ނެގުމެވެ. އެ މައްސަލާގައި އުއްތަމަފަނޑިޔާރުގެ ދިފާއުގައި ކޯޓުގައި ވަކާލާތު ކުރައްވާ ގާނޫނީ ވަކީލުންގެ ޓީމުގައި ހިސާން ހުސައިން އާއި ނޫރުއްސަލާމް އަބޫބަކުރު ހިމެނިވަޑައިގަންނަވައެވެ.

އުއްތަމަ ފަނޑިޔާރުގެ މައްޗަށް އުފުލާފައިވާ ދައުލަތުގެ މަސައްކަތަކަށް ހުރަސް އެޅި ކަމުގެ ދައުވާ ސާބިތުވެއްޖެނަމަ، ހަތަރު މަހާއި 24 ދުވަހުގެ ޖަލު ހުކުމެއް އަންނާނެއެވެ. އެ ހުކުމް އެ މަނިކުފާނުގެ މައްޗަށް ސާބިތުވެ، ނިހާއީ ހުކުމެއްގެ ގޮތުގައި ކަނޑައަޅައިފިނަމަ އެމަނިކުފާނުގެ ފަނޑިޔާރުކަން ގެއްލޭނެއެވެ.