ހުކުމްތަކެއް ކުރެއްވީ ބައެއްގެ ނުފޫޒުން ކަމަށް ދެ ގާޒީއަކު އިއުތިރާފު ވެވަޑައިގެންފައިވާ ބަޔާންތަކެއް ލީކުވެފައި ވާތީ، އެ ގާޒީން ކުރައްވާފައިވާ ހުކުމްތައް އަލުން ބަލަން ޖެހޭނެ ކަމަށް ގާނޫނީ ވަކީލު ހުސެއިން ޝަމީމް ވިދާޅުވެއްޖެއެވެ.

ޝަމީމް އެހެން ވިދާޅުވެފައި ވަނީ ކްރިމިނަލް ކޯޓާއި ސިވިލް ކޯޓުގެ ބައެއް ނިންމުންތައް ނިންމާފައި ވާނީ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދު އަންގަވަމުން ގެންދެވި ގޮތަށް ކަމަށް ގާޒީ އާދަމް އާރިފާއި ގާޒީ މުހައްމަދު ހަލީމް އިއުތިރާފުވެވަޑައިގެންފައިވާ ބަޔާންތަކެއް ލީކުވެފައިވަނިކޮށެވެ.

ރާއްޖެޓީވީގެ "ބޮޑުންގެ ޝަރީޝަމީމް ވިދާޅުވި ގޮތުގައި އެ ބާޔާންތަކަކީ ސައްހަ ބަޔާންތަކަކަށްވާނަމަ، އެ ބަޔާންތަކުގައިވާ ކަންތައްތައް ޖިނާއީ މައްސަލައެއްގެ ގޮތުގައި ތަހުގީގު ކުރަން ޖެހޭނެއެވެ. އެ ބަޔާންތަކުގައި ބުނާ ގޮތުން އެބޭފުޅުން ކުރެއްވި ހުކުމްތަކަކީ އިންސާފުން ބޭރުން ކުރެއްވި ހުކުމްތަކެއް ކަމަށް އަމިއްލަފުޅަށް ވިދާޅުވެފައިވާތީ އެ ހުކުމްތައް އަލުން ރިވިއު ކުރަންޖެހޭނެ ކަމަށް ވެސް ޝަމީމް ވިދާޅުވި އެވެ. އޭނާ ވިދާޅުވީ ސްޕްރީމް ކޯޓުން ވެސް އެކަން ހިނގާފައިވާ ގޮތް ބަލައި އަލުން މުރާޖާ ކުރަންވާނެ ކަމަށެވެ.

"އެގޮތަށް ނިންމާފައިވާ ކަމަށް އެ ބުނާ މައްސަލަތައް   އަޅުގަނޑު ދެކޭ ގޮތުގައި އަލުން ބެލެންޖެހޭނެ.  ކަށަވަރުން ވެސް އިންސާފުގާއިމުވެފައި ނެތް ކަމަށް  ތުހުމަތުކޮށް،  ޝުބުހާ އުފެދޭ ކަހަލަ ކަންތައްތަކެއް  އެހެރީ ދިމާވެފައި. ޝައްކުތައް ފިލައިގެންދާ ވަރަކަށް ފަނޑިޔާރުން އަމިއްލަފުޅަށް އެ ވާހަކަ ދައްކަވާފަ އެހެރީ،" ޝަމީމް ވިދާޅުވިއެވެ.

އޭނާ ވިދާޅުވީ ޝަރުއީ ދާއިރާގެ އިތުބާރު ދެމެހެއްޓުމަށްޓަކާ އެކަން ހިނގާފައި އޮތީ ކިހާ މިންވަރުލަށްތޯ ބަލަން ޖެހޭނެ ކަމަށެވެ. އެގޮތުން އެހެން ބަޔަކު ފަނޑިޔާރުންނަށް ނުފޫޒު ފޯރުވައި، ވަކި ގޮތަކަށް ހުކުމްތަކެއް ނެރުމަށް އަންގާފައިވޭތޯ ބަލަން ޖެހޭނެ ކަމަށް ޝަމީމް ވިދާޅުވިއެވެ.

"އެހެން ފަނޑިޔާރުންނަށް ވެސް މިކަލަ ނުފޫޒެއް އައިސްފައި އޮއްތޯ؟ އެހެން ފަނޑިޔާރުން ވެސް އެ ނުފޫޒަށް ބޯ ލަނބަންކަމަށް ބުނެ،  ކންތައްތަކެއްކޮށްފައި ހުރިތޯ؟ ނުވަތަ  ނޫންތޯ  ބަލަންޖެހޭ. ހަމައެކަނި ފަނޑިޔާރުން [ސުޕްރީމް ކޯޓުގެ ދެ ފަނޑިޔާރުން] ތޯ ނުފޫޒު ފޯރުވައިގެން އުޅެނީ.  މިސާލަކަށް އެހެންތަނަކުން އެހެން މީހަކު އެބަހުރިތޯ ބޭބޭފުޅުންނަށް ގުޅާފަ ވަކިގޮތަކަށް ކަންތައްތަކެއް ކުރަން ބުނެފަ. މި މައްސަލައިގެ ތަހުގީގު ހިނގަންޖެހޭ. މި ހިސާބުން  އަދި ނުއެއް ނިމޭ،" ޝަމީމް ވިދާޅުވިއެވެ.

ލީކުވެފައިވާ ބަޔާންތަކުން ހާމަވެފައިވާ ވާހަކަތަކަކީ ރާއްޖޭގެ ތާރީހުގައި ފަނޑިޔާރުންނާ ގުޅުވައިގެން މިހާތަނަށް ހިނގައިފައި ނެތް ވަރުގެ ކަމެއް ކަމަށް ޝަމީން ވިދާޅުވި އެވެ. އޭނާ ވިދާޅުވީ އެކަންތައްތަކާ ގުޅިގެން އެކަމުގައި ޝާމިލުވާ ދެ ފަނޑިޔާރުން މަގާމުން އިސްތިއުފާ ދެއްވަން ޖެހޭނެ ކަމަށެވެ.

ލީކުވެފައިވާ ބަޔާންތަކުން އެނގޭ ގޮތުގައި ކްރިމިނަލް ކޯޓު ހިންގެވުމާ ހަވާލުވެވަޑައިގެން ހުންނެވި ގާޒީ އާދަމް އާރިފް، އެ ކޯޓުން ބައެއް އަމުރުތައް ނެރުއްވާފައި ވާނީ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު އެންގެވި ގޮތަށެވެ. އެ ދެ ބޭފުޅުން އެންގެވި ގޮތަށް ހުކުމްތަކެއް ނެރެދެއްވި ކަމަށް ސިވިލް ކޯޓުގެ ގާޒީ މުހައްމަދު ހަލީމް ފުލުހުންގެ ތަހުގީގަށް ދެއްވާފައިވާ ބަޔާނުގައި ވެސް ވިދާޅުވެފައިވެއެވެ. ހަލީމް ވިދާޅުވެފައިވާ ގޮތުގައި ޕީޕީއެމްގެ ލީޑަޝިޕްގެ މައްސަލައަކާއި "ހަވީރު" ނޫހުގެ މުވައްޒަފުންގެ މައްސަލަ އާއި ވިލާ ގްރޫޕުގެ ބައެއް މައްސަލަތައް ނިންމާފައި ވާނީ އަބްދުﷲ ސައީދާއި އަލީ ހަމީދު އެންގެވި ގޮތަށެވެ.

ލީކުވެފައިވާ ބަޔާންތަކަކީ ފެބްރުއަރީ 1ގެ އަމުރާ ގުޅިގެން ފުލުހުން ހިންގި ތަހުގީގަށް ހޯދާފައިވާ ބަޔާންތަކެކެވެ. އެ ބަޔާންތައް ލީކުކޮށްލި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ފުލުހުން ބުންޏެވެ.