އިޓަލީގެ ކޯޗުގެ މަގާމަށް މަންޗިނީ ގެންނަނީ!

އިޓަލީގެ ކޯޗުގެ މަގާމު ހުސްވެފައިވަނީ 1958 ވަނަ އަހަރުގެ ފަހުން އެ ޓީމަށް ވޯލްޑް ކަޕުގެ ޖާގައެއް ގެއްލުމާއި ވިދިގެން އޭރު ކޯޗުގެ ގޮތުގައި ހުރި ޖިއަން ޕިއެރޯ ވެންޗޫރާ އެ މަގާމުން ވަކިކުރުމުންނެވެ. ކޮލިފައިންގެ ގްރޫޕުގެ ދެވަނަ ލިބުމާއި ވިދިގެން ކުޅުނު ޕްލޭއޮފް މެޗުތަކުގައި އިޓަލީ ވަނީ 1-0 ގެ އެގްރިގޭޓް ނަތީޖާއަކުން ބަލިވެފައެވެ. މި ނަތީޖާގެ ސަބަބުން 59 އަހަރުތެރޭ އެ ޓީމަށް ވަނީ ފުރަތަމަ ފަހަރަށް ވޯލްޑް ކަޕުގެ ޖާގައެއް ގެއްލިފައެވެ.

މީޑިއާތަކުން ރިޕޯޓުކޮށްފައިވާ ގޮތުގައި އިޓަލީގެ ގައުމީ ޓީމުގެ ކޯޗުގެ މަގާމަށް އައުމަށް މަންޗީނީއާއެކު އިޓަލީގެ ފުޓްބޯޅަ ފެޑެރޭޝަނުން ވަނީ މަޝްވަރާތަކެއް ކުރިޔަށް ގެންގޮސްފައެވެ. މަންޗީނީ އެ މަގާމަށް ގެންނަން އިޓަލީގެ ފުޓްބޯޅަ ފެޑެރޭޝަނުން ބޭނުންވަނީ އޭނާއަކީ އެ ގައުމަށް ނިސްބަތްވާ މީހަކަށްވުމާއެކު އޭނާއަކީ ކާމިޔާބު ގެނެވޭނެ ކޯޗެއް ކަމަށް އެ ގައުމުގެ ފުޓްބޯޅަ ފެޑެރޭޝަނަށް ގަބޫލުކުރެވޭތީ ކަމަށް ރިޕޯޓުތައް ބުނެއެވެ.

މަންޗިނީ މިހާރު ފުރަމުން އަންނަނީ ރަޝިއާގެ ޒެނިތު ސެއިންޓް ޕީޓާސްބާގްގެ ކޯޗުގެ ވަޒީފާއެވެ. އެ ޓީމު މިވަގުތު އޮތީ ރަޝިއަން ޕްރިމިއާ ލީގުގެ ހަތަރު ވަނައިގައެވެ. މަންޗިނީގެ ކާމިޔާބު ކެރިއަރުގައި އޭނާ ވަނީ އިނގިރޭސިވިލާތުގެ މެންޗެސްޓާ ސިޓީ އާއި ތުރުކީގެ ގަލަޓަސަރޭ އަދި އިޓަލީގެ އިންޓަ މިލާނާއި ލާޒިއޯ އަދި ފިއޮރެންޓީނާގައި ކާމިޔާބު ދުވަސްތަކެއް ހޭދަކޮށްފައެވެ. އޭނާ ވެގެންދިޔައީ 2012 ވަނަ އަހަރު މެންޗެސްޓާ ސިޓީއަށް އެ ޓީމުގެ ތާރީހުގައި ވެސް ފުރަތަމަ ފަހަރަށް ޕްރިމިއާ ލީގެއް ހޯދައިދިން ކޯޗަށެވެ.

އިޓަލީގެ ކޯޗުގެ މަގާމަށް ޗެލްސީގެ ކޯޗު އެންޓޯނިއޯ ކޮންޓޭ ގެންނަން އުޅޭ ކަމަށް ވެސް މީޑިއާތަކުން ރިޕޯޓު ކޮށްފައިވެއެވެ. މީގެކުރިން ވެސް ކޮންޓޭ ވަނީ އިޓަލީގެ ކޯޗުގެ މަގާމު އަދާކޮށްފައެވެ. ކޮންޓޭ ވަނީ 2016 ވަނަ އަހަރުގެ ޔޫރޯ ފުޓްބޯޅަ މުބާރާތަށް އެ ޓީމު ކޮލިފައި ކޮށްދީ ރަނގަޅު ނަތީޖާތަކެއް އެ ޓީމަށް ހޯދައިދީފައެވެ. އެގޮތުން ފްރާންސްގައި ބޭއްވި ޔޫރޯގައި ކޮންޓޭ ވަނީ އެވެރެޖް ކުޅުންތެރިން ތިބި ސްކޮޑަކާއެކު އިޓަލީ ކުއާޓާ ފައިނަލަށް ގެންގޮސްދީފައެވެ.

ކޮންޓޭ އަދި މަންޗިނީގެ އިތުރުން ކާމިޔާބު ކޯޗު ކާލޯ އަންޗެލޯޓީ އަދި ޔުވެންޓަސްގެ ކޯޗު މަސިމިލިއާނޯ އަލެގްރީ ވެސް އެ މަގާމުން ފެނުމަކީ އެކަށީގެންވާ ކަމެކެވެ. އެހެން ނަމަވެސް ބޮޑަށް ބެލެވޭ ގޮތުގައި 2020 ވަނަ އަހަރު އޮންނަ ޔޫރޯގެ ކޮލިފައިންގައި އެ ޓީމަށް އިރުޝާދު ދޭނީ މަންޗިނީއެވެ.

ވެންޗޫރާގެ ބަދަލުގައި އައު ކޯޗެއް އިޓަލީއިން ހޯދަމުން އަންނައިރު އެ ޓީމުގެ ސީނިއާ ބައެއް ކުޅުންތެރިން ވަނީ ގައުމީ ޓީމަށް ކުޅުން ހުއްޓާލާފައެވެ. އިޓަލީގެ ފުޓްބޯޅަ ފެޑެރޭޝަންގެ ރައީސް ކާލޯ ޓަވޭޗިއޯ ބުނެފައިވަނީ ދެން އެ ގައުމުގެ ގައުމީ ޓީމުގެ ކޯޗުގެ މަގާމަށް ގެންނަނީ ތަޖުރިބާކާރު އަދި ނަން މަޝްހޫރު ކޯޗެއް ކަމަށެވެ.

މަންޗިނީ އެ މަގާމާއި ހަވާލުވާން އުޅޭ ކަމުގެ އަޑުތައް ގަދަވެފައިވާއިރު އޭނާގެ 17 އަހަރުގެ ކެރިއަރުގައި މަންޗިނީ ވަނީ އެކި ޓީމުތަކަށް 725 މެޗުގައި އިރުޝާދު ދީފައެވެ. އޭނާވަނީ މި ޓީމުތަކާއެކު 13 ތަށްޓެއް ކާމިޔާބުކޮށްފައެވެ.