މުއްދަތު ހަމަވާ 20 ގަވާއިދަކަށް އަމަލު ކުރުން އަންނަ އަހަރުގެ އެޕްރީލަށް އިތުރުކޮށްފި
މިއީ އެގޮތަށް މުއްދަތު އިތުރު ކުރާ 10 ވަނަ އަހަރު
މަޖިލީހުގެ ޖަލްސާއެއްގެ ތެރެއިން
އާންމު ގަވާއިދުތަކާ ބެހޭ ގާނޫނުގެ ދަށުން ހަދާފައިވާ 20 ގަވާއިދަކަށް އަމަލު ކުރުމުގެ މުއްދަތު ހޯމަ ދުވަހަށް ހަމަވާތީވެ، އެ ގަވާއިދުތަކަށް އަމަލު ކުރުމުގެ މުއްދަތު އަހަރު ދުވަހަށް އަނެއްކާ ވެސް އިތުރުކޮށްފި އެވެ.
މިއީ އާންމު ގަވާއިދުތަކާ ބެހޭ ގާނޫނުގެ ދަށުން ހަދާފައިވާ ހަދާފައިވާ ގަވާއިދުތަކަށް އަމަލު ކުރުމުގެ މުއްދަތު އިތުރު ކުރި 10 ވަނަ އަހަރެވެ. ދެހާސްއަށްވަނަ އަހަރު އާންމު ގަވާއިދުތަކާ ބެހޭ ގާނުނު ވުޖޫދަށް އައިއިރު، 83 ގަވާއިދަށް އަމަލު ކުރުމުގެ ބާރު އެ ގާނޫނުން ވަނީ ދީފައެވެ. ނަމަވެސް އެ ގަވާއިދުގައި ހިމެނޭ ބައެއް ކަންކަމާ ގުޅޭ ގޮތުން ގާނޫނުތައް ހަދާފައިވުމުން 63 ގަވާއިދެއް ވަނީ އުވިގެން ގޮސްފައެވެ.
އެ ގާނޫނުން ބާރު ލިބިދީފައިވާ މާލޭ ޕްލޭނިން ގަވާއިދާއި ހުޅުމާލޭ ޕްލޭނިން އަދި އިމާރާތް ކުރުމުގެ ގަވާއިދާއި ގާނޫނީ ވަކީލުކަމުގެ ހުއްދަ ދިނުމުގެ ގަވާއިދު ވެސް މިދިޔަ އަހަރު ވަނީ އުވާލާފައެވެ. އެގޮތުން 10 ގަވާއިދެއް މިދިޔަ އަހަރު ވަނީ އުވާލާފައެވެ.
އާންމު ގަވާއިދުތަކާ ބެހޭ ގާނުނުގެ ދަށުން މުއްދަތު އިތުރު ކުރި ގަވާއިދުތަކުގެ ތެރޭގައި ދިވެހިރާއްޖޭގެ ތަފާސް ހިސާބާއި އިންޝުއަރެންސާ ބެހޭ ގަވާއިދު ވެސް ހިމެނެއެވެ.
އެ ގަވާއިދުތަކަށް އަމަލު ކުރުމުގެ މުއްދަތު ހޯމަ ދުވަހަށް ހަމަވާތީ، އަންނަ އަހަރުގެ އެޕްރީލް 30ގެ ނިޔަލަށް އެ މުއްދަތު ވަނީ އިތުރު ކޮށްފައެވެ. އެގޮތަށް މުއްދަތު އިތުރުކޮށްފައި ވަނީ މަޖިލީހުގެ ޖަލްސާއަށް ހާޒިރުވެވަޑައިގެންނެވި 35 މެމްބަރުންގެ އަގުލަބިއްޔަތުންނެވެ.
