ނޫސްވެރިކަމުގެ މިނިވަން ކަމުގައި ރާއްޖެ އަނެއްކާވެސް ތިން ދަރަޖަ ފަހަތަށް ސޮއްސާލައިފިއެވެ.

ރިޕޯޓާސް ވިތައުޓް ބޯޑާސް އިން ނެރޭ ވޯލްޑް ޕްރެސް ފްރީޑަމް އިންޑެކްސްގައި މިއަހަރު ރާއްޖެ އޮތީ އަފްގާނިސްތާނާއި ނައިޖީރިއާއަށްވުރެވެސް ފަހަތުގައި 120 ގައެވެ. 2017 ވަނަ އަހަރު ރާއްޖެ އޮތީ 117 ވަނާގައެވެ.

ނޫސްވެރިކަމުގެ މިނިވަންކަމުގެ ލިސްޓުގައި ރާއްޖެ ތިން ދަރަޖަ މިއަހަރު ފަހަތަށް ޖެހުނު އިރު ނޫސްވެރިކަމާއި ނޫސްވެރިންނަށް މިއަހަރުވެސް ވަނީ ރާއްޖޭގައި އެތައް ދަތިތަކެއް ކުރިމަތިވެފައެވެ.

ރިޕޯޓާސް ވިތައުޓް ބޯޑާސް އިން ނެރޭ ވޯލްޑް ޕްރެސް ފްރީޑަމް އިންޑެކްސްގައި ރާއްޖެ މިދިޔަ އަހަރަށް ވުރެ މިއަހަރު ތިން ދަރަޖަ ފަހަތަށް ދިޔައިރު، ފްރީޑަމް ހައުސްއިން ނެރޭ ޕްރެސްފްރީޑަމް ލިސްޓްގައި ރާއްޖެ މިދިޔަ އަހަރު ހިމަނާފައިވަނީ އެއްވެސް ވަރަކަށް ނޫސްވެރިކަމުގެ މިނިވަންކަން ނެތް ގައުމެއްގެ ގޮތުގައެވެ. ފްރީޑަމް ހައުސްއިން ޕޮއިންޓް ދޭ އުސޫލުގައިވާ ގޮތުން އެންމެ ގިނަ ޕޮއިންޓް ލިބޭ ގައުމަކީ ނޫސްވެރިކަމުގެ މިނިވަންކަން އެންމެ ކުޑަކޮށް ލިބިދީފައިވާ ގައުމެވެ. އެ ލިސްޓުގައިވާ ގޮތުން ރާއްޖޭގައި ނޫސްވެރިކަމުގެ މިނިވަންކަން ލިބިދީފައި ވަނީ ސައުތު ސޫދާނާއި، ކޮންގޯ، ސާބިއާ، ބޮލީވިއާ އަދި ހަންގޭރީއާ އެއް ހަމައެއްގަ އެވެ.

އެ ޖަމިއްޔާ އިން ސިފަކޮށްފައިވާ ގޮތުގައި 2016 ވަނަ އަހަރަކީ ފާއިތުވެދިޔަ 13 އަހަރުގެ ތެރޭގައި ނޫސްވެރިކަމުގެ ހާލަތު އެންމެ ދަށަށް ދިޔަ އަހަރެވެ. އެގޮތުން ނޫސްވެރިންނަށް ދީފައިވާ މަރުގެ ހަމަލާތަކާއި މީޑިއާތައް ނައްތާލުމަށް ދުނިޔޭގެ އެކިކަންކޮޅުތަކުގައި ދިން ހަމަލާތަކުގެ ސަބަބުން މިދިޔަ އަހަރު ފާހަގަވަނީ ނޫސްވެރިކަމުގައި ކަޅު އަހަރެއްގެ ގޮތުގައި ކަމަށް އެ ޖަމިއްޔާ އިން ވަނީ ބުނެފައެވެ.

ރިޕޯޓާސް ވިތައުޓް ބޯޑާސް އިން ނެރޭ ވޯލްޑް ޕްރެސް ފްރީޑަމް އިންޑެކްސްގައި ނޫސްވެރިކަމުގެ މިނިވަންކަން އެންމެ ބޮޑު ޤައުމެއްގެ ގޮތުގައި ފާހަގަ ކޮށްފައިވަނީ ނޯވޭއެވެ.

ނޫސްވެރިކަމުގެ މިނިވަންކަމުގެ މިންގަޑުން ރާއްޖެ ތިން ދަރަޖަ ފަހަތަށް ސޮއްސާލިއިރު، މިދިޔަ އަހަރުވެސް އަދި މި އަހަރުވެސް އެކި ގޮތްގޮތުން ރާއްޖޭގެ މީޑިއާތަކާއި ނޫސްވެރިންނަށް ގޮންޖެހުންތަަކާ ކުރިމަތިލާންޖެހުނެވެ. އެގޮތުން ރާއްޖެޓީވީގެ ނޫންވެރިން ހިފާ ހައްޔަރުކުރުމާއި، ލާއިންސާނީ އަނިޔާދީ ނޫސްވެރިންގެ މައްޗަށް ޖިނާއީ ދައުވާ ކުރުމާއި، އަބުރުގެ ގާނޫނު ފާސްކުރުމާއި، މި ނޫނަސް އެތަކެއް ގޮންޖެހުންތައް ނޫސްވެރިންނަށް ދަނީ ކުރިމަތިވަމުންނެވެ.

ރިޕޯޓާސް ވިތައުޓް ބޯޑާސް އިން މި ބަޔާން ނެރެފައި މިވާ ދަނޑިވަޅަކީ ރާއްޖެ ޓީވީގެ ޗީފް އޮޕަރޭޓިން އޮފިސަރ ހުސެއިން ފިޔާޒް މުސާއަށް ވަޅިން ހަމަލާދޭން ރާއްޖޭގެ ބޮޑު ސިޔާސީ ޕާޓީ އަކަށް ނިސްބަތްވާ ބަޔަކު ކޮންޓްރެކްޓަށް ޒުވާނަކަށް ހަވާލު ކުރި ކަމުގެ ކަށަވަރު މައުލޫމާތު ލިބިފައިވާ ދަނޑިވަޅެއްގައެވެ.