ވީރޭ ދި ވެޑިން ޓްރެއިލާ ނެރުމާ އެކު ސަޕޯޓަރުން އުފަލުން
މި ފިލްމު ރިލީޒް ކުރާނީ އަންނަ ޖޫން 1 ގައި
ވީރޭ ދި ވެޑިންގެ ޕޯސްޓަރ
މި އަންނަ ޖޫން މަހުގެ 1 ގައި ސިނަމާތަކަށް އަންނަ ފިލްމު "ވީރޭ ދި ވެޑިން"ގެ ޓްރެއިލާ އާންމު ކޮށްފައި ވަނީ ބުދަ ދުވަހުގައެވެ.
މި ޓްރެއިލާ ނެރުމާ އެކު ޓްވިޓާގައި މި ޓްރެއިލާއަށް ދަނީ ތައުރީފު އޮހެމުންނެވެ. އެގޮތުން މި ފިލްމުގެ ޓްރެއިލާގައި ކަރީނާ ކަޕޫރުގެ އެކްޓިންއަށް ގިނަ ބަޔަކު ވަނީ ތައުރީފުކޮށްފައެވެ.
ކަރީނާ ކަޕޫރާއި ސޯނަމް ކަޕޫރާއި ސްވަރާއި ބާސްކަރު އަދި ޝިކާ ތަލްސާނިއާ އެކީގައި ފެނިގެންދާ މިފިލްމަކީ ކަރީނާ ވިހެއުމަށް ފަހު އެނބުރި އަންނަ ފުރަތަމަ ފިލްމެވެ. އަދި މިއީ މި ހަތަރު ތަރިން ވެސް އެކީގައި ފެންނާނެ ފުރަތަމަ ފިލްމެވެ. މި ފިލްމުގެ ޑައިރެކްޓަރަކީ ޝަޝަންކާ ގޯޝްއެވެ.
"ވީރޭ ދީ ވެޑިން"ގައި ދައްކަނީ ކަރީނާގެ ކައިވެންޏަށް ހާޒިރުވާ އަންހެނުންތަކެއްގެ ވާހަކައެވެ. އެތަނުގައި މި އަންހެނުންނަށް ދިމާވާ މައްސަލަތަކަކާ ގުޅިގެން އެމީހުންގެ މެދުގައި ބޮޑެތި ކަންތައްގަނޑެއް ހިނގައެވެ. އެއީ ކަރީނާގެ އެންމެ ގާތް އެކުވެރިންނެވެ.
"ވީރޭ ދި ވެޑިން" އަކީ ކަރީނާ ބަލިވެއިނުމުގެ ކުރިން ފަށަން ހަމަޖެހިފައި އޮތް ފިލްމެކެވެ. އެ ފިލްމު ފަސްކުރީ ފިލްމުގެ ސްކްރިޕްޓް ތައްޔާރުވެ ފައިސާ ހަމަޖެހި ޝޫޓްކުރަން ފަށަން ތައްޔާރުވެފައިވަނިކޮށް އޭނާ ބަލިވެއިންކަން އެނގުނު ހިސާބުންނެވެ. ކަރީނާ މީގެ ކުރިން ބުނެފައި ވަނީ އޭނާ ބަލިވެ އިންކަން އެނގުމުން ފިލްމުގެ ޕްރޮޑިއުސަރ ރިއާ ކަޕޫރު ކިބައިން އެފިލްމަށް އެހެން މީހަކު ހަމަޖެހުމަށް އެދުނު ކަމަށާއި އެހެން ނަމަވެސް ކަރީނާ ނޫން އެހެން މީހަކާ އެކު ފިލްމު ކުރިޔަށް ގެންދަން ބޭނުން ނޫން ކަމަށް ރިއާ ބުނި ކަމަށެވެ.
ކަރީނާ ވިހެމަށް ފަހު އޭނާ ވަނީ "ވީރޭ ދި ވެޑިން" ކުޅުމަށް ވަރަށް ބޮޑަށް ބަރުދަން ލުއިކޮށްފައެވެ.
