މަޖިލީހަށް ސަލާމް ފޮނުއްވެވި ނުވަ މެމްބަރަކު، ކޮމެޓީއަށް ހާޒިރުވެ ވަޑައިގެންނެވި
24 އެޕްރީލު 2018 | އަންގާރަ 14:3628 މެމްބަރަކު ސަލާމް ފޮނުއްވެވި
މަޖިލީހުގެ ކޮމެޓީއެއްގައި އިދިކޮޅު ބައެއް މެމްބަރުން: ސަލާމް ފޮނުވީ އިދިކޮޅު މެމްބަރުން
އެންޓި ޑިފެކްޝަންގެ ގާނޫނު މަޖިލީހުން ފާސްކުރި ދުވަހު މަޖިލީހަށް ސަލާމް ފޮނުއްވެވި ނުވަ މެމްބަރަކު، ހަމަ އެ ދުވަހު މަޖިލީހުގެ ކޮމެޓީތަކަށް ހާޒިރުވެވަޑައިގެންނެވިކަން ސުޕްރީމް ކޯޓުގެ ހުކުމުން ހާމަވެއްޖެއެވެ.
އެކަން ހާމަވެގެން ދިޔައީ ގުޅިފައިވާ ޕާޓީތަކުގެ ފަރާތުން އެންޓި ޑިފެކްޝަންގެ ބިލު ބާތިލުކުރަން ހުށަހެޅުއްވި މައްސަލައިގައި ކުރި ހުކުމުންނެވެ. އެ ހުކުމްގައި ފާހަގަކޮށްފައިވާ ގޮތުން މިހާރަކަށް އައިސް، ގަސްތުގައި ބައެއް މެމްބަރުން މަޖިލީހުގެ ޖަލްސާއަށް ހާޒިރުވެވަޑައި ނުގަންނަވައެވެ. އަދި މަޖިލީހުގެ ޖަލްސާތަކުގައި އެ މެމްބަރުން ބައިވެރިވެވަޑައި ނުގަންނަވަނީ ގަބޫލު ނުކުރެވޭ ކަންތައްތަކެއް މަޖިލީހުގައި ހިނގަމުންދާތީ ކަމަށް މައްސަލަ ހުށަހެޅުއްވި މަޖިލިސް މެމްބަރުންގެ އަމިއްލަ އިއުތިރާފުން އެނގޭ ކަމަށް ހުކުމްގައިވެއެވެ.
ހުކުމްގައި ފާހަގަކޮށްފައިވާ ގޮތުގައި އެންޓި ޑިފެކްޝަންގެ ބިލު މަޖިލީހުން ފާސްކުރި ދުވަހު، މާޗު 13، 2018، ގައި 28 މެމްބަރަކު ސަބަބު ބަޔާން ކުރުމެއް ނެތި މަޖިލީހަށް ސަލާމް ފޮނުވާފައިވާ ކަމަށެވެ. ނަމަވެސް ސަލާމް ފޮނުއްވެވި ބައެއް މެމްބަރުން އެ ދުވަހު މަޖިލީހަށް ވަޑައިގެން ކޮމެޓީތަކުގެ ބައްދަލުވުންތަކުގައި ބައިވެރިވެވަޑައިގެންނެވިއެވެ. އަދި މަޖިލިސް ކުރާ މާލަމަށް ވަޑައިނުގެން، ސަލާމް ފޮނުއްވެވި ބައެއް މެމްބަރުން މަޖިލީހުގެ ގޯތިތެރޭގައި ތިއްބެވި ކަމަށް ހުކުމްގައިވެއެވެ.
މަޖިލީހުގައި އެންމެ ފަހުން ނެގި 13 ވޯޓެއްގައި ތަކުރާރުކޮށް، 43 މެމްބަރަކު ބައިވެރިވެވަޑައި ނުގަންނަވާ ކަމަށް ވެސް ސުޕްރީމް ކޯޓުގެ ހުކުމްގައިވެއެވެ. އަދި އެންޓި ޑިފެކްޝަންގެ ބިލު މަޖިލީހުން ފާސްކުރި ދުވަހު 39 މެމްބަރަކު މަޖިލީހުގެ ޖަލްސާއަށް ހާޒިރުވި ކަމަށެވެ.
މައްސަލަތަކެއްގައި މަޖިލިސް ހުއްޓުމުން، އެ ކަމަށް ގާނޫނީ ހައްލެއް ނުބިއްޖެ ހާލަތެއްގައި ސިޔާސީ ހައްލެއް ހޯދުމަކީ ރައީސުލްޖުމްހޫރިއްޔާގެ މަސްއޫލިއްޔަތެއް ކަމަށް ވެސް އެ ހުކުމްގައިވެއެވެ. މަޖިލީހުގެ ޖަލްސާތަކަށް ހާޒިރުވެވަޑައި ނުގަންނަވާ މެމްބަރުންނާމެދު ފިޔަވަޅު އެޅޭނެ އުސޫލެއް ގާއިމު ކުރެވިފައިނުވާ ކަމަށް ބުނެ، އެކަމަށް ހައްލު ހޯދުމަށް ހުކުމްގައި ވަނީ ބާރު އަޅާފައެވެ.
މަޖިލިސް ހުއްޓި، ގާނޫނީ މަސައްކަތް ނުކުރޭ ހާލަތެއްގައި އިޔާދަ ނުކުރެވޭ ވަރުގެ ގެއްލުމެއް ލިބިދާނެތީ، "ޑޮކްޓަރިން އޮފް ނެސަސިޓީ" ނުވަތަ "ހާލަތުލް ޟަރޫރާ"ގެ ދަށުން އަމަލު ކުރެވިދާނެ ކަމަށެވެ. އެންޓި ޑިފެކްޝަންގެ ގާނޫނު ފާސްކުރި ވޯޓުގައި 43 މެމްބަރުން ބައިވެރިވެވަޑައިގަންނަވަން ޖެހޭނެ ކަމަށާއި ނަމަވެސް އެ ބިލު ފާސްކޮށްފައި ވަނީ ހާލަތުލް ޟަރޫރާގެ ދަށުން ކަމަށްވާތީ، އެއީ ކުރެވޭނެ ކަމެއް ކަމަށް ސުޕްރީމް ކޯޓުން ވަނީ ކަނޑައަޅާފައެވެ.
