މޯލްޑިވްސް ކޮންސިއުމަރ ފެއަރ ފަށައިފި

މޯލްޑިވްސް ކޮންސިއުމަރ ފެއަރ ނެޝެނަލް އާރޓް ގެލަރީގައި ފަށައިފިއެވެ.

މި ފެއަރ ކުރިއަށްދާނީ އޭޕްރިލް 19 ވަނަ ދުވަހުން ފެށިގެން އޭޕްރިލް 21 ވަނަ ދުވަހާ ހަމައަށް ކޮންމެ ދުވަހަކު ހަވީރު 04:00 އިން ރޭގަނޑު 11:00 އަކަށެވެ.

ފެއަރ އިންތިޒާމްކުރާ ބްލަކް ޕްރައިވެޓް ލިމިޓެޑްގެ މެނޭޖިންގް ޑައިރެކްޓަރ އިސްމާއިލް ހުޝާމް ވިދާޅުވީ މި ފެއަރއަކީ ޝޮޕިންގ ފެސްޓިވަލެއްގެ ސިފައިގައި ކުރިއަށްދާ ފެއަރއެއް ކަމަށާއި ފެއަރ މެދުވެރިކޮށް ވިއްކާ ސާމާނުތަކުން ބޮޑު ޑިސްކައުންޓެއް ލިބިގެންދާނެ ކަމަށެވެ.

މި ފަހަރުގެ ފެއަރގައި 11 ކުންފުންޏަކުން ވަނީ ބައިވެރިވެފައެވެ.

1. ބީއެޗްއެމް ޓްރޭޑަސް
2. ޓޭސްޓް
3. ބެސްޓް ބައި މޯލްޑިވްސް
4. ދިރާގު
5. ސިނަފް
6. ސްޓެޓިކް ކޮމްޕެނީ
7. ޓްރޭޑެކްސް
8. ކޮމްޕިއުޓަރ ޕްލަސް
9. އެސްޓްރަބޮން
10. ގައިޑެންސް އިމްޕްރޫވްމަންޓް
11. ލަ ސޫކް

މިއީ ހޯލްސޭލް ވިޔަފާރިވެރިންނާއި ރީޓެއިލް ވިޔަފާރިވެރިންނާއި ސަޕްލަޔަރުންނާއި މެނުފެކްޓްޗަރުންނަށް ޚާއްޞަ ފެއަރ އެކެވެ.

މިފެއަރގައި ރާއްޖެއަށް މުޅިން އަލަށް އުފެއްދުންތައް ތަޢާރަފްކުރުމާއި ސްޓޯލްތަކުން ވިޔަފާރި ކުރުމުން ހާއްސަ ޑިސްކައުންޓާއި ކާބޯތަކެތީގެ ރަހަ ބެލުމުގެ ފުރުޞަތާއި، ތަފާތު އެކި ވައްތަރުގެ މުދާ އެއްތަނަކުން ލިބިގެންދާނެއެވެ.

އަދި ޢާންމުކޮށް ގޭތެރޭގައި ގެންގުޅޭ ސާމާނާއި އިލެކްޓްރޯނިކް ސާމާނާއި ކާބޯތަކެތީގެ ބާވަތްތައްވެސް ސްޓޯލްތަކުން ދެއްކުމަށް ވަނީ ހަމަޖެހިފައެވެ.

ބްލަކް ޕްރައިވެޓް ލިމިޓެޑުން ބުނީ މިފަހަރުގެ ފެއަރއަށް ޒިޔާރަތްކުރާ މީހުންގެ މެދުގައި ކޮންމެ ގަޑިއަކު އެއްފަހަރު ލަކީޑްރޯއެއް ނެގުމަށާއި އަދި ކޮންމެ ދުވަހަކު ގްރޭންޑް ޕްރައިޒް ވިނަރއެއް ހޮވުމަށް ހަމަޖެހިފައި ކަމަށެވެ.

މިއީ، މޯލްޑިވްސް ކޮންސިއުމަރ ފެއަރ ބާއްވާ 6 ވަނަ ފަހަރެވެ.