ޔުއެފާ ޗެމްޕިއަންސް ލީގުގެ ސެމީ ފައިނަލުގައި ސްޕެއިންގެ ރެއާލް މެޑްރިޑް އަދި ޖަރުމަނުގެ ބަޔާން މިއުނިކް ވާދަކުރަން ޖެހިއްޖެއެވެ.

ސްވިޓްޒަލޭންޑުގެ ނިޔޯންގައި ހުންނަ ޔޫރަޕުގެ ފުޓްބޯޅައިގެ މައި އިދާރާ ޔުއެފާގެ ހެޑްކުއާޓަރގައި ކުރިޔަށްދިޔަ ގުރު ނެގުމުގައި ބަޔާން މިއުނިކް ލައްވާލާފައިވަނީ މިދިޔަ ދެ އަހަރުވެސް މި މުބާރާތުގެ ޗެމްޕިއަންކަން ހޯދި ރެއާލް މެޑްރިޑާއި ދެކޮޅަށެވެ. ހަމައެހެންމެ 10 އަހަރަށްފަހު މުބާރާތުގެ ސެމީ ފައިނަލުން ޖާގަ ހޯދި ލިވަޕޫލް ސެމީގައި ނުކުންނާނީ އިޓަލީގެ އޭއެސް ރޯމާއާ ދެކޮޅަށެވެ.

ބަޔާންގައި ސެމީއަށް ދަތުރުކުރީ ކުއާޓާ ފައިނަލުގައި 2-1 ގެ އެގްރިގޭޓް ނަތީޖާއަކުން ސްޕެއިންގެ ސެވިއްޔާ ބަލިކޮށްގެންނެވެ. މި ދެ ޓީމު ސެވިއްޔާގެ ދަނޑުގައި ކުޅުނު ފުރަތަމަ ލެގުގެ މެޗު 2-1 އިން ބަޔާން ކާމިޔާބުކުރިއިރު ބަޔާންގެ ދަނޑުގައި ކުޅުނު ދެވަނަ ލެގުގެ މެޗު ނިމިފައިވަނީ 0-0 އިން އެއްވަރުވެގެންނެވެ. ރެއާލް ސެމީއަށް ދަތުރުކުރީ ކުއާޓާގައި އިޓަލީގެ ޔުވެންޓަސް 4-3 ގެ އެގްރިގޭޓް ނަތީޖާއަކުން ބަލިކޮށްގެންނެވެ. މި ދެ ޓީމު ޔުވެންޓަސްގެ ދަނޑުގައި ކުޅުނު ފުރަތަމަ ލެގުގެ މެޗު 3-0 އިން ރެއާލް ކާމިޔާބުކުރި ނަމަވެސް ޔުވެންޓަސްއިން ވަނީ ރެއާލްގެ ދަނޑުގައި ކުޅުނު ދެވަނަ ލެގު 3-1 އިން ކާމިޔާބުކޮށްފައެވެ.

ލިވަޕޫލް ސެމީއަށް ދަތުރުކުރީ މެންޗެސްޓާ ސިޓީގެ މައްޗަށް 5-1 ގެ އެގްރިގޭޓް ނަތީޖާއަކުން ކުރި ހޯދައިގެންނެވެ. މި ދެ ޓީމު ލިވަޕޫލްގެ ދަނޑުގައި ކުޅުނު ކުއާޓާގެ ފުރަތަމަ ލެގު 3-0 އިން ލިވަޕޫލް ކާމިޔާބުކުރިއިރު އެ ޓީމުން ވަނީ ސިޓީގެ ދަނޑުގައި ކުޅުނު ދެވަނަ ލެގު ވެސް 2-1 ގެ ނަތީޖާއަކުން ކާމިޔާބު ކޮށްފައެވެ. ހަމައެހެންމެ ރޯމާ ސެމީގެ ޖާގައެއް ހޯދީ ވަރުގަދަ ބާސެލޯނާ ސިއްސުވާލައި 4-4 ގެ އެގްރިގޭޓް ނަތީޖާއަކުން އެއްވަރުކޮށް ރަށުން ބޭރުގައި ޖެހި ލަނޑުން ކުރި ހޯދައިގެންނެވެ. ބާސާގެ ދަނޑުގައި ކުޅުނު ފުރަތަމަ ލެގުގެ މެޗު 4-1 އިން ބާސާ ކާމިޔާބުކުރިއިރު ރޯމާގެ ދަނޑުގައި ކުޅުނު ދެވަނަ ލެގުގެ މެޗު ރޯމާއިން ކާމިޔާބުކުރީ 3-0 ގެ ނަތީޖާއަކުންނެވެ.

ސެމީ ފައިނަލުގެ ފުރަތަމ ލެގުތައް މި މަހުގެ 24 ވަނަ ދުވަހު ކުޅުމަށް ހަމަޖެހިފައިވާއިރު ދެވަނަ ލެގުތައް ކުޅުމަށް ހަމަޖެހިފައިވަނީ މޭ މަހުގެ ފުރަތަމަ ދުވަހުއެވެ. ފުރަތަމަ ލެގު ބަޔާންގެ ދަނޑުގައި ކުޅޭއިރު ލިވަޕޫލް ވެސް ފުރަތަމަ ލެގު ކުޅޭނީ އަމިއްލަ ދަނޑުގައެވެ. ޗެމްޕިއަންސް ލީގުގެ ފައިނަލް ކުޅުމަށް ހަމަޖެހިފައިވަނީ އަންނަ މޭ މަހުގެ 26 ވަނަ ދުވަހުއެވެ.