ރާއްޖެ މިވަނީ ހިއުމަންރައިޓްސް ކްރައިސަސްއެއްގެ ތެރޭގައި: ގުޅިފައިވާ ޕާޓީތައް
12 އެޕްރީލު 2018 | ބުރާސްފަތި 13:47ލާއިންސާނީ އަމަލުތައް ހުއްޓުވުމަކީ ގާނޫނުން އެޗްއާރުސީއެމަށް ލާޒިމް ކަމެއް
ރައްޔިތުންގެ މަޖިލީހުގެ މެމްބަރު އަދި އެމްޑީޕީގެ ސްޕޯކްސްޕާސަން އިމްތިޔާޒު ފަހުމީ
ދިވެހިރާއްޖެ މިވަގުތު މިވަނީ ހިއުމަންރައިޓްސް ކްރައިސަސްއެއްގެ ތެރޭގަައި ކަމަށް ގުޅިފައިވާ ސިޔާސީ ޕާޓީތަކުން ބުނެފި އެވެ.
އެކިއެކި ތުހުމަތު ތަކުގައި ޖަލަށްލާފައި ތިއްބެވި ދައުލަތުގެ އިސްވެރިންނާއި ސިޔާސީ ފަރާތްތަކާމެދު ޖަލުގައި ލާއިންސާނީ އަމަލުތައް ހިންގަމުންދާތީ ހިއުމަންރައިޓްސް ކޮމިޝަން އޮފް ދަ މޯލްޑިވްސްގެ މެމްބަރުންނާ އެކަންކަން ހިއްސާ ކުރެއްވުމަށް ގުޅިފައިވާ ސިޔާސީ ޕާޓީތަކުގެ އިސްބޭފުޅުން ވަޑައިގެންނެވުމަށް ފަހު ނޫސްވެރިންނަށް މައުލޫމާތު ދެއްވަމުން އެމްޑީޕީގެ ސްޕޯކްސްޕާސަން އިމްތިޔާޒު ފަހުމީ (އިންތި) ވިދާޅުވީ މޯލްޑިވްސް ކަރެކްޝަނަލް ސާރވިސްއިން ޖަލުގައި ތިބޭ މީހުންނާމެދު އަމަލު ކުރަނީ ގާނޫނާ ހިލާފަށް ކަމަށާއި އެފަރާތްތަކަށް ދޭންޖެހޭ ހިދްމަތްތައް ނުދޭ ކަމަށެވެ.
"އަޅުގަނޑުމެން ދެކޭ ގޮތުގައި ރާއްޖެމިވަނީ ހިއުމަންރައިޓްސް ކްރައިސަސްއެއްގެ ތެރޭގައި. ހިއުމަންރައިޓްސް ކްރައިސަސްއެއްގެ ތެރޭގައިވާއިރު، ހިއުމަންރައިޓްސް ކޮމިޝަން ރަނގަޅަށް ހިނގަންޖެހޭނެ. ކޮމިޝަނުގެ މެމްބަރުން އަބަދުވެސް މިކަމުގައި ތިއްބަވަންޖެހޭނެ. ކަންކަން ހިނގާގޮތް ބެލުމަށް އެލާރޓްގައި ކޮމިޝަނުގެ މެމްބަރުން ތިއްބަވަންޖެހޭނެ،" އިންތި ވިދާޅުވި އެވެ.
މީގެއިތުރުން އިންތި ވިދާޅުވީ ހައްޔަރުކޮށްފައިވާ ފަރާތްތަކުން ހުށަހަޅާފައިވާ ޝަކުވާތަކާއި އެބޭފުޅުންގެ ގާނޫނީ ވަކީލުންނާއި އެބޭފުޅުންގެ އާއިލާއިން އަދި ގުޅިފައިވާ ސިޔާސީ ޕާޓީތަކުން ހުށަހަޅާފައިވާ ސަކުވާތައް ބައްލަވާ، ހިއުމަންރައިޓްސް ކޮމިޝަނުން ވަގުތުން އެކަންކަން ބައްލަވާ، ޖަލުތަކުގެ ހާލަތު ބެއްލުވުމަށް ފަހު ކަންކަން ރަނގަޅު ކުރުމަށް މަސައްކަތް ކުރަންޖެހޭ ކަމަށެވެ.
"މިވަގުތު ހަމަ ސިސްޓަމެޓިކް އުސޫލުން ވަރަށް ބޮޑަށް އަނިޔާވެރިވަމުންދާތީއާއި ނުހައްގުން ޖަލަށް ވަރަށް ގިނަ ފަރާތްތަކެއް ލެވިފައި މިވަނީ. ހާއްސަގޮތެއްގައި ދައުލަތުގެ މުހިއްމު މަގާމުތަކުގައި ތިއްބެވި ބޭފުޅުންނާއި ދައުލަތުގެ އިސް މަގާމުތައް ފުރުއްވާފައިވާ ފަރާތްތަކެއް ގާނޫނާއި ބައިނަލް އަގްވާމީ މިންގަނޑުތަކާ އެއްގޮތަކަށް ނޫން. އަދި އެބޭފުޅުން ޖަލަށްލުމަށް ފަހު ގާނޫނާ ހިލާފަށް ގިނަ ކަންކަން ހިންގަމުންދާ ކަމަށާއި އަނިޔާވެރި އަމަލުތައް ވެސް ހިންގަމުން އެދަނީ،" އިންތި ވިދާޅުވި އެވެ.
ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރުކަން ވެސް ކުރައްވާ އިންތި ވިދާޅުވީ ރާއްޖޭގައި ހިނގާ ލާއިންސާނީ އަމަލުތައް ހުއްޓުވުމަކީ ގާނޫނުން ހިއުމަންރައިޓްސް ކޮމިޝަނަށް ލާޒިމް ކަމެއް ކަމަށެވެ. އަދި އެގޮތުން ޖަލުގައި މިހާރު ހިންގާ ލާއިންސާނީ އަމަލުތައް ހުއްޓުވުމަށް ހިއުމަންރައިޓްސް ކޮމިޝަނުން އެކަށީގެންވާ މަސައްކަތްތަކެއް ނުކުރައްވާނަމަ އެބޭފުޅުންނާ ވެސް ގާނޫނު އަރާ ހަމަ ކުރާނެ ދުވަހެއް އަންނާނެ ކަމަށެވެ.
