ފީފާ ރޭންކިންގައި ރާއްޖެއިން ތިން ދަރަޖައިގެ ކުރިއެރުމެއް ހޯދިއިރު އަވަށްޓެރި އިންޑިއާ ދުނިޔޭގެ 97 ވަނަ މަގާމަށް ޖެހިލައިފިއެވެ.

ދުނިޔޭގެ ފުޓްބޯޅައިގެ މައި އިދާރާއިން ކޮންމެ މަހަކު އެއްފަހަރު ނެރޭ ފީފާ ރޭންކިންގައި ރާއްޖެއިން ވަނީ ތިން ދަރަޖައިގެ ކުރިއެރުމަކާއެކު ދުނިޔޭގެ 147 ވަނަ މަގާމަށް ޖެހިލާފައެވެ. މިދިޔަ މަހު ދުނިޔޭގެ 99 ވަނަ މަގާމުގައި ރޭންކް ކުރެވުނު އިންޑިއާއިން ވަނީ ދެ ދަރަޖައިގެ ކުރިއެރުމަކާއެކު 97 ވަނައަށް ޖެހިލާފައެވެ. މި މަހުވެސް ސާފް ސަރަހައްދުގެ އެއްވަނަ މަގާމު ހޯދާފައިވަނީ އިންޑިއާއިންނެވެ. ސަރަހައްދުގެ ދެވަނަ 142 ވަނައިގައި ރޭންކް ކުރެވިފައިވާ އަފްޣާނިސްތާން ހޯދިއިރު ނޭޕާލް ރޭންކް ކުރެވިފައިވަނީ 162 ވަނައިގައެވެ. ބޫޓާނަށް 184 ވަނަ ލިބޭއިރު ބަންގްލަދޭޝް ރޭންކް ކުރެވިފައިވަނީ 197 ވަނައިގައެވެ. ސްރީ ލަންކާއަށް 200 ވަނަ ލިބޭއިރު މިފަހަރު ވެސް އެންމެ ދަށުން ރޭންކް ކުރެވިފައި ވަނީ ޕާކިސްތާނެވެ.

ރާއްޖެއަށް މި މަހުގެ ރޭންކިންގައި ކުރިއެރުން ލިބިފައިވަނީ ބައިނަލްއަގްވާމީ މެޗުތަކެއް ކުޅެފައިވުމާއެކުއެވެ. އެގޮތުން ސިންގަޕޫރާ ދެކޮޅަށް ކުޅުނު އެކުވެރި ކަމުގެ މެޗުން ރާއްޖެ 3-2 ގެ ނަތީޖާއަކުން ބަލިވިއިރު އޭޝިއަން ކަޕް ކޮލިފައިންގައި ރާއްޖެއިން ވަނީ 7-0 އިން ބޫޓާން ބަލިކޮށްފައެވެ. މި މެޗުތަކުގެ ސަބަބުން ރާއްޖެއަށް ވަނީ 22 ޕޮއިންޓްގެ ކުރިއެރުމެއް ލިބިފައެވެ.

ފީފާ ރޭންކިންގެ އެއްވަނަ 1533 ޕޮއިންޓާއެކު ޖަރުމަނުން ދިފާއުކުރިއިރު ދެވަނައިގައި އޮތީ ބްރެޒިލްއެވެ. ޕޯޗުގަލް އަށް ހަތަރުވަނަ މަގާމު ގެއްލިފައިވާއިރު އެ ޓީމު ފަހަތަށް ޖައްސާލުމަށްފަހު ބެލްޖިއަމްއިން ވަނީ ތިންވަނަ މަގާމަށް ޖެހިލާފައެވެ. އާޖެންޓީނާ ފަސްވަނައަށް ވެއްޓުނުއިރު ސްވިޓްޒަލޭންޑް ވަނީ ހަވަނައަށް ޖެހިލާފައެވެ. ދެ ދަރަޖައިގެ ކުރިއެރުމަކާއެކު ފްރާންސް ހަތްވަނައަށް ޖެހިލިއިރު ސްޕެއިން ވަނީ އަށްވަނައަށް ވެއްޓިފައެވެ. ޗިލީ ނުވަވަނައަށް ޖެހިލިއިރު ގަދަ 10 އެއްގައި ދެން ހިމެނެނީ ޕޮލެންޑްއެވެ.

އެފްރިކާ ބައްރުގެ ގައުމުތަކުގެ ތެރެއިން އެންމެ މަތީގައި ރޭންކް ކުރެވިފައި ވަނީ 14 ވަނަ ލިބުނު ޓިއުނީޝިއާއެވެ. އުތުރު އެމެރިކާގެ ގައުމުތަކުގެ ތެރެއިން އެންމެ މަތީގައި ރޭންކުރެވިފައި ވަނީ 15 ވަނައިގައި އޮތް މެކްސިކޯއެވެ. ހަމައެހެންމެ ދެކުނު އެމެރިކާގެ އެންމެ މަތީ ރޭންކިން ދެވަނައިގައި އޮތް ބްރެޒިލްއަށް ލިބޭއިރު އޭޝިއާގެ އެންމެ މަތީގައި ރޭންކް ކުރެވިފައި ވަނީ 36 ވަނައިގައި ރޭންކް ކުރެވިފައިވާ އީރާނެވެ. އޯޝޭނިއާގެ ގައުމުތަކުގެ ތެރެއިން އެންމެ މަތީގައި ރޭންކް ކުރެވިފައި ވަނީ 133 ވަނައިގައި ރޭންކް ކުރެވިފައި އޮތް ނިއުޒިލޭންޑެވެ.

މިފަހަރުގެ ރޭންކިންގައި އެންމެ ބޮޑު ކުރިއެރުމެއް ހޯދީ މެދުތެރޭ އޭޝިއާގެ ގައުމެއް ކަމަށްވާ ކިރްގިސްތާންއެވެ. އެ ޓީމުން ވަނީ 42 ދަރަޖައިގެ ކުރިއެރުމަކާއެކު ދުނިޔޭގެ 75 ވަނައަށް ޖެހިލާފައެވެ. މިއީ އެ ގައުމުގެ ތާރީހުގައި ވެސް އެންމެ މަތިން ރޭންކް ކުރެވުނު ފަހަރެވެ. މިފަހަރުގެ ރޭންކިންގައި 23 ދަރަޖައިގެ ވެއްޓުމަކާއެކު އެންމެ ބޮޑު ވެއްޓުމެއް ލިބުނީ ހައިޓީއަށެވެ. މިފަހަރުގެ ރޭންކިންގައި ހައިޓީއަށް ލިބިފައިވަނީ 108 ވަނައެވެ.

ފީފާއިން ހާމަކޮށްފައިވާ ގޮތުގައި އަންނަ މޭ މަހުގެ 17 ވަނަ ދުވަހު އާ ރޭންކިން ޝާއިއުކުރުމަށް ވަނީ ހަމަޖެހިފައެވެ.