ޔުއެފާ ޗެމްޕިއަންސް ލީގުގެ ސެމީ ފައިނަލުން 10 އަހަރަށް ފަހު އިނގިރޭސިވިލާތުގެ ލިވަޕޫލް ޖާގަ ހޯދައިފިއެވެ.
ލިވަޕޫލް ސެމީއަށް ދަތުރު ކުރީ ކުއާޓާ ފައިނަލުގައި 5-1 ގެ އެގްރިގޭޓް ނަތީޖާއަކުން މެންޗެސްޓާ ސިޓީ ބަލިކޮށްގެންނެވެ. މި ދެ ޓީމު ލިވަޕޫލްގެ ދަނޑުގައި ކުޅުނު ކުއާޓާގެ ފުރަތަމަ ލެގު 3-0 އިން ލިވަޕޫލް ކާމިޔާބުކުރިއިރު އެ ޓީމުން ވަނީ ސިޓީގެ ދަނޑުގައި ކުޅުނު ދެވަނަ ލެގު ވެސް 2-1 ގެ ނަތީޖާއަކުން ކާމިޔާބު ކޮށްފައެވެ. ސިޓީގެ ފުރަތަމަ އެގާރައިން ބޮޑު ބަދަލުތަކެއް ފެނިގެންދިޔަ މި މެޗުގައި އެ ޓީމުގެ ފުރަތަމަ އެގާރައިން ފުރުސަތު ދީފައިވަނީ އެންމެ ތިން ޑިފެންޑަރުންނަށެވެ. އެޓޭކަށް ވިސްނައިގެން ނުކުތް ސިޓީގެ ޓީމުން ލެރޯއި ސާނޭ އާއި ބަނާޑޯ ސިލްވާ އަދި ރަހީމް ސްޓާލިން ފެނިގެންދިޔައިރު ލިވަޕޫލްގެ ފުރަތަމަ އެގާރައިން ހަތަރު ބަދަލެއް ވަނީ ފެނިގެންގޮސްފައެވެ.
ފުރަތަމަ ހާފު ފެށިގެން ސިޓީގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު އެ ޓީމުން ވަނީ ދެވަނަ މިނެޓުގައި މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. ރަހީމް ސްޓާލިން ތަނަވަސްކޮށްދިން ފުރުސަތަކުން އެ ޓީމަށް މެޗުގެ ފުރަތަމަ ލަނޑު ޖަހާ ލީޑު ނަގައިދިނީ ގެބްރިއެލް ޖީސަސްއެވެ. މި ލަނޑަށް ފަހު ވެސް ސިޓީއިން ލިވަޕޫލްގެ ގޯލާއި އަމާޒުކޮށް ފުލުފުލުގައި ހަމަލާ އުފައްދަމުންދިޔައިރު ލިވަޕޫލްގެ ޑިފެންސުން ވަނީ އެ ހަމަލާތައް ހުއްޓުވުމަށް ބުރަ މަސައްކަތްތަކެ އްކޮށްފައެވެ. ފުރަތަމަ ހާފުގެ ފަހު ވަގުތުކޮޅުގެ ތެރޭގައި ބަނާޑޯ ސިލްވާގެ ހަމަލާއެއް ލިވަޕޫލްގެ ގޯލުގެ ދަނޑީގައި ޖެހުނުއިރު ލެރޯއި ސާނޭ ޖެހި ލަނޑެއް ރެފްރީ ވަނީ އޮފްސައިޑް ލަނޑެއްގެ ގޮތުގައި ނިންމާފައެވެ. އެހެން ނަމަވެސް އެ ލަނޑު ޖެހިއިރު އޭނާހުރީ އޮފްސައިޑް މަގާމެއްގައި ނޫންކަން ރިޕްލޭތަކުން ފެނިގެންދެއެވެ.
އެއް ލަނޑުގެ ލީޑެއްގައި އޮވެ ސިޓީއިން ފުރަތަމަ ހާފު ނިންމާލިއިރު ދެވަނަ ހާފުގައި އެ ޓީމުގެ ކޯޗު ޕެޕް ގާޑިއޯލާއަށް ބެންޗުން ފުރުސަތު ދީފައެއް ނުވެއެވެ. އޭނާ ބެންޗުން ފޮނުވާލީ ފުރަތަމަ ހާފަށް ފަހު ރެފްރީއާ ޒުވާބު ކުރުމާއި ގުޅިގެންނެވެ. މި ހާފުގައި ލިވަޕޫލްއިން އެ ޓީމުގެ ކުޅުން ރަނގަޅުކޮށް ކައުންޓާގައި ސިޓީގެ ގޯލަށް ނުރައްކާކުރިއެވެ. ނަތީޖާއެއްގެ ގޮތުން މެޗުގެ 56 ވަނަ މިނެޓުގައި މުހައްމަދު ސަލާހު ވަނީ ލަނޑެއް ޖަހާ ލިވަޕޫލްއަށް ނަތީޖާ ހަމަހަމަ ކޮށްދީފައެވެ. ސިޓީއިން އަލުން އަނބުރާ މެޗުގެ ލީޑު ހޯދުމަށް ގިނަ މަސައްކަތްތަކެއް ކުރަމުންދަނިކޮށް ލިވަޕޫލްއިން ވަނީ އިތުރު ލަނޑެއް ޖަހާ ސިޓީގެ އުއްމީދުތައް ފުނޑުފުނޑު ކޮށްލާފައެވެ. މި ލަނޑު އެ ޓީމަށް ޖަހައިދިނީ ރޮބާޓޯ ފިރްމީނޯއެވެ.
މި މެޗުގައި ޖެހި ލަނޑާއެކު ސަލާހު އަދި ފިރްމީނޯ ވަނީ ޗެމްޕިއަންސް ލީގުގައި އަށް ލަނޑު ޖަހާފައެވެ. އެ ދެ ކުޅުންތެރިންނާއި އެއް އަދަދަކަށް ލިވަޕޫލްގެ ތާރީހުގައި ވެސް އެހެން އެއްވެސް ކުޅުންތެރިންތަކަކަށް އެއް ސީޒަނެއްގައި ޗެމްޕިއަންސް ލީގުގައި މިވަރަށް ލަނޑު ޖެހިފައެއް ނުވެއެވެ. ހަމައެހެންމެ މި ސީޒަނުގެ ޗެމްޕިއަންސް ލީގުގައި މިހާތަނަށް 33 ލަނޑު ޖަހައި ލިވަޕޫލްއިން ވަނީ 2003 ވަނަ އަހަރު މެންޗެސްޓާ ޔުނައިޓެޑްއިން ގާއިމުކުރި ރެކޯޑު މުގުރާލާފައެވެ. ހަމައެހެންމެ މިއީ ޗެމްޕިއަންސް ލީގުގެ ސެމީ ފައިނަލުން ލިވަޕޫލް ޖާގަ ހޯދި 10 ވަނަ ފަހަރެވެ.
ލިވަޕޫލްގެ އިތުރުން ރޯމާއިން ވެސް ވަނީ ސެމީ ފައިނަލުގެ ޖާގައެއް ހޯދާފައެވެ.
