ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ވަރުގަދަ ބާސެލޯނާ ސިއްސުވާލައި އިޓަލީގެ އޭއެސް ރޯމާއިން ސެމީ ފައިނަލުގެ ޖާގައެއް ކަށަވަރު ކޮށްފިއެވެ.

ރޯމާ ސެމީއަށް ދަތުރުކުރީ 4-4 ގެ އެގްރިގޭޓް ނަތީޖާއަކުން ދެ ޓީމު އެއްވަރުވުމާއެކު ރަށުން ބޭރުގައި ޖެހި ލަނޑުން އެ ޓީމަށް ކުރި ލިބޭތީއެވެ. ބާސާގެ ދަނޑުގައި މިދިޔަ ހަފްތާގައި ކުޅުނު ފުރަތަމަ ލެގު 4-1 އިން ބާސާއިން ކާމިޔާބުކުރި ނަމަވެސް އަންގާރަ ދުވަހުގެ ރޭ ރޯމާގެ ދަނޑުގައި ކުޅުނު މެޗު މުޅި ދުނިޔެ ސިއްސުވާލައި އެ ޓީމުން ކާމިޔާބު ކުރީ 3-0 ގެ ނަތީޖާއަކުންނެވެ. މިދިޔަ ހަފްތާގައި ލެގާނޭސް އަތުން މޮޅުވި ބާސާގެ ޓީމުން ހަތަރު ބަދަލެއް ފެނިގެންދިޔައިރު ފިއޮރެންޓީނާ އަތުން ބަލިވި ރޯމާގެ ޓީމުން ވެސް ވަނީ ހަތަރު ބަދަލެއް ފެނިގެންގޮސްފައެވެ.

ފުރަތަމަ ހާފު ފެށިގެން ބާސާއިން ލަނޑު ޖެހުމާ ގާތަށް ދިޔަ ނަމަވެސް ރޯމާއިން ވަނީ ވަކި ހިސާބަކުން މެޗުގެ ކޮންޓްރޯލް ނަގާފައެވެ. އެ ޓީމުން ފުލުފުލުގައި ބާސާގެ ގޯލަށް ނުރައްކާތެރި ހަމަލާ އަމާޒުކުރިއިރު ބާސާގެ ކީޕަރު ވަނީ މި ހަމަލާތައް ދިފާއުކުރުމަށް ގިނަ މަސައްކަތްތަކެއް ކޮށްފައެވެ. އެހެން ނަމަވެސް ރޯމާއިން ވަނީ މެޗުގެ ހަވަނަ މިނެޓުގައި ބާސާގެ ގޯލު ހުޅުވާލާފައެވެ. ޑެނިއެލޭ ޑެރޯސީ ދިން ބޯޅައަކުން މި ލަނޑު ރޯމާއަށް ޖަހައިދިނީ ބޮސްނިއާގެ ފޯވާޑް އެޑިން ޒެކޯއެވެ. މި ލަނޑަށް ފަހު ވެސް ރޯމާއަށް އެ ޓީމުގެ ލީޑު ފުޅާކުރުމަށް ގިނަ ފުރުސަތުތަކެއް ލިބިގެންދިޔައިރު ބާސާއިން ކުޅެފައިވަނީ ޑިފެންސަށް ވިސްނައިގެންނެވެ. ފުރަތަމަ ހާފުގައި ރޯމާއިން 10 ހަމަލާއެއް ބާސާގެ ގޯލަށް އަމާޒުކުރިއިރު އެހެން އެއްވެސް ޓީމަކަށް ބާސާގެ ގޯލާއި އަމާޒުކޮށް މިވަރަށް ހަމަލާ ފޮނުވާލެވިފައެއް ނުވެއެވެ.

އެއް ލަނޑުގެ ލީޑެއްގައިއޮވެ ރޯމާއިން ފުރަތަމަ ހާފު ނިންމާލިއިރު ދެވަނަ ހާފުގައި ވެސް އެ ޓީމުން ވަނީ މޮޅު ކުޅުމެއް ދައްކައި ބާސާގެ ހާފަށް ބާރުބޮޑުކޮށްފައެވެ. ބާސާއަށް ހަމަލާ އުފެއްދިފައިނުވާއިރު ރޯމާއަށް ސެމީގެ އުއްމީދު އާވެގެންދިޔައީ މެޗުގެ 57 ވަނަ މިނެޓުގައި އެ ޓީމަށް ލިބުނު ޕެނަލްޓީއާއެކުއެވެ. ކެޕްޓަން ޑެނިއެލޭ ޑެރޮސީ ވަނީ މި ޕެނަލްޓީ ގޯލަށް ވައްދާލައި ރޯމާއަށް ސެމީގެ އުއްމީދު ދަމަހައްޓައިދީފައެވެ. ބާސާގެ ފަރާތުން މި ލަނޑަށްފަހު ވެސް އެންމެ އެދެވޭ ކުޅުން ދެއްކިފައިނުވާއިރު އެ ޓީމަށް ނުރައްކާތެރި ހަމަލާއެއް ވެސް އުފެއްދިފައެއް ނުވެއެވެ. ބާސާގެ ކީޕަރަށް ނުކުޅަދާނަވާ ވަރަށް ރޯމާއިން ހަމަލާ އުފެއްދިއިރު 82 ވަނަ މިނެޓުގައި ރޯމާއިން ވަނީ ތިންވަނަ ލަނޑެއް ޖަހާފައެވެ. މި ލަނޑު ސެންގިޒް އަންޑަރ ނަގައިދިން ކޯނަރަކުން ޖަހައިދިނީ އެ ޓީމުގެ ޑިފެންޑަރު ކޮންސްޓަންޓީނޯސް މަނޯލާސްއެވެ.

މި މެޗު ވެގެން ގޮސްފައިވަނީ ތިން ލަނޑުގެ ލީޑަކާއެކު ދެވަނަ ލެގާއި ކުރިމަތިލާ ބާސާ ކޮލިފައިނުވި ފުރަތަމަ ފަހަރަށެވެ. ހަމައެހެންމެ ރޯމާ ވެގެންގޮސްފައި ވަނީ ތިން ލަނޑުގެ ތަފާތެއް ބަދަލު ކޮށްލައިގެން ސެމީއަށް ކޮލިފައިވި ތިންވަނަ ޓީމަށެވެ. ހަމައެހެންމެ މިއީ 1984 ވަނަ އަހަރުގެ ފަހުން ޗެމްޕިއަންސް ލީގުގެ ސެމީ ފައިނަލުން ރޯމާ ޖާގަ ހޯދި ފުރަތަމަ ފަހަރެވެ.

ސެމީގެ ޖާގައެއް ރޯމާގެ އިތުރުން އިނގިރޭސިވިލާތުގެ ލިވަޕޫލްއިން ވެސް ވަނީ ހޯދާފައެވެ.