އެންމެ ފަހުން ޕިޓް ފެނިގެން ގޮސްފައިވަނީ ހޮލީވުޑްގެ ފިލްމު ވޯރ މެޝިން އިންނެވެ. އޭނާ އޭގެ ފަހުން ފިލްމު ކުޅުމަށް ސޮއިކޮށްފައިވާކަން ރަސްމީކޮށް ހާމަކޮށްފައެއް ނުވެއެވެ.
މުނިފޫހި ފިލުވުމުގެ ދާއިރާތަކުގެ ޚަބަރުތައް ގެނެސްދޭ ނޫހެއް ކަމަށްވާ އީ ނިއުސްއިން ރިޕޯޓުކޮށްފައިވާ ގޮތުގައި ކުއެންޓަން ޓެރެންޓީނޯ ޑައިރެކްޓް ކުރާ ވަންސް އަޕޮން އަ ޓައިމް އިން ހޮލީވުޑްއިން ބްރެޑް ޕިޓް ފެންނާނެ ކަމަށް މިހާރު ވަނީ ކަށަވަރު ވެފައެވެ.
ޕިޓް މި ފިލްމާއި އެކީގައި އޭނާގެ ގިނަ ދުވަސްވީ ފިލްމީ ކެރިއަރ ދޫކޮށްލާނެކަމަށް ވެސް ވަނީ އަޑުތައް ފެތުރިފައެވެ.
ބައެއް ޚަބަރުތައް ބުނާ ގޮތުގައި ޕިޓް މިހާރު ރައްޓެހިވެގެން އުޅޭ ކަމަށް މީޑިއާތަކުން ބުނާ ޕްރޮފެސަރު/އާކިޓެކްޓް ނެރީ އޮޒްމާން އާއި އެކީ ދިރިއުޅުމެއް ފަށަން އޭނާގެ ނުފޫޒުން ފިލްމު ކުޅުމާއި ދުރަށް ގޮސްދާނެއެވެ. އެހެން ނަމަވެސް އޭނާ ފިލްމު ކުޅުން ހުއްޓާލިއަސް ކެމެރާގެ ފުރަގަހުން ފެންނާނެކަމަށް ވެސް ޚަބަރުތައް ވަނީ ބުނެފައެވެ. އެހެން ނަމަވެސް މިއީ ހުސް "ގޮސިޕް"އެވެ. ބްރެޑްޕިޓް މިކަމާއި ގުޅިގެން އަދި އެއްވެސް އެއްޗެއް ބުނެފައެއް ނުވެއެވެ.
ބްރެޑް ޕިޓް މީގެ ކުރިން ވަނީ ދެކައިވެންޏެއްކޮށް އެ ދެކައިވެނި ވެސް ރޫޅިފައެވެ. އެއީ އެންޖެލީނާ ޖޮލީ އާއި ޖެނިފާ އެނިސްޓަންއާ ކުރި ކައިވެންޏެވެ.
