ދެކުނުން މަސް ގަންނަ މިންވަރު މިފްކޯ އިން އިތުރު ކުރަނީ
9 އެޕްރީލު 2018 | ހޯމަ 17:16ތިން ދުވަހުގެ ތެރޭގައި އެވެރެޖްކޮށް 600 ޓަނުގެ މަސް ކިރުވާފައިވޭ
ބަޔަކު މަސް ބާނަނީ: މިދުވަސްވަރު މަސްވެރިކަން ވަނީ ރަނގަޅުވެފައި
ރާއްޖޭގެ ދެކުނުގެ މަސްވެރިކަން އާދަޔާޚިލާފަށް ރަނގަޅުވެފައިވާތީ އެ ސަރަހައްދުން މަސް ގަންނަ މިންވަރު އިތުރުކުރަމުން އަންނަ ކަމަށް މިފްކޯއިން ހޯމަ ދުވަހު ބުނެފިއެވެ.
އެ ކުންފުނިން ބުނީ ވޭތުވެދިޔަ ހަ މަސް ދުވަހު 150 ޓަނުގެ މަސް ކިރިއިރު، ވޭތުވެދިޔަ ތިން ދުވަހުގެ ތެރޭގައި އެވެރެޖްކޮށް 600 ޓަނުގެ މަސް ކިރުވާ ކަމަށެވެ.
މިފްކޯއިން ނެރުނު ނޫސް ބަޔާނެއްގައި ބުނީ ދެކުނުން މަސް ކިރާ ކެޕޭސިޓީ އިތުރު ކުރުމަށް، އުތުރުގައި މަސް ކިރަން ހަރަކާތްތެރިވި އެކުންފުނީގެ "ކަލަމިންޖާ 402" ބޯޓް ދެކުނަށް ގޮސް މަސް ގަންނަން ފަށާފައިވާ ކަމަށެވެ. އަދި ގއ. ކޫއްޑޫގެ ކެޕޭސިޓީ އިތުރު ކުރުމަށް ކެރިއާ ބޯޓެއް ހޯދުމުގެ މަސައްކަތް ވެސް ކުރަމުން އަންނަ ކަމަށް މިފްކޯއިން ބުންޏެވެ.
މަސްވެރިންނަށް އައިސް ލިބުމުގެ ދަތިތައް ހައްލު ކުރުމަށް ދެކުނުގެ އައިސް ޕްލާންޓްތައް 24 ގަޑިއިރު މަސައްކަތް ކުރާ ގޮތް ބަދަލުކޮށްފައިވާ ކަމަށް ވެސް މިފްކޯއިން ބުންޏެވެ.
އެކުންފުނިން މިހެން ބުނެފައި މިވަނީ މަސްވެރިކަން ރަނގަޅުވެފައިވާއިރު މަސްނުކިރުވުމާއި އައިސް ލިބުމުގެ ދަތިކަމުގެ ސަބަބުން މަސްވެރިން ޝަކުވާ ކުރަމުންދަނިކޮށެވެ.
އެ ކުންފުނިން ބުނީ ކުރިއާ އަޅާބަލާއިރު މަސްގަތުމުގެ ކެޕޭސިޓީ 400 ޓަނުން 720 ޓަނަށް އިތުރުކޮށްފައިވާ ކަމަށެވެ. މަސް ފިނި ކުރުމުގެ ކެޕޭސިޓީ 216 ޓަނުން 612 ޓަނަށް އިތުރު ކޮށްފައިވާއިރު 2014 ވަނަ އަހަރުން ފެށިގެން އައިސް އުފައްދާ މިންވަރު 355 ޓަނުން 630 ޓަނަށް އިތުރު ކޮށްފައިވާ ކަމަށް ވެސް މިފްކޯއިން ބުންޏެވެ.
