ބުންޑެސްލީގާ: އޮގްސްބާގް ބަލިކޮށް ޖެހިޖެހިގެން ހަވަނަ ފަހަރަށް ބަޔާން އިން ތަށި ޔަގީންކޮށްފި

ޖަރުމަނު ބުންޑެސްލީގާގައި އެފްސީ އޮގްސްބާގްއާ ދެކޮޅަށް ކުޅުނު މެޗު ކާމިޔާބުކޮށް ޖެހިޖެހިގެން ހަވަނަ ފަހަރަށް ބަޔާން މިއުނިކް އިން ލީގު ޗެމްޕިއަންކަން ކަށަވަރުކޮށްފިއެވެ.

ރަށުން ބޭރުގައި އޮގްސްބާގްއާ ދެކޮޅަށް ކުޅުނު މެޗު ބަޔާން އިން ކާމިޔާބުކުރީ ފަހަތުން އަރާ 4-1 ގެ ނަތީޖާއަކުންނެވެ. ބަޔާންގެ ފުރަތަމަ އެގާރައިން ގިނަ ބަދަލުތަކެއް ފެނިގެންދިޔައިރު ހަމޭސް ރޮޑްރިގޭޒް އާއި ކޮރެންޓިން ޓޮލީސޯ އަދި އަރުތޫރޯ ވިދާލްގެ އިތުރުން ސެންޑްރޯ ވެގްނަރ ވަނީ މި މެޗުގައި އެ ޓީމުގެ ފުރަތަމަ އެގާރާގައި ހިމެނިގެން ކުޅެފައެވެ. މި މެޗާއި ބަޔާން އިން ކުރިމަތިލީ ޖެހިޖެހިގެން ހަވަނަ ފަހަރަށް ބުންޑެސްލީގާގެ ތަށި ޔަގީންކުރުމުގެ އުއްމީދުގައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު ލަނޑު ޖެހުމާ ގާތަށް އޮގްސްބާގް އިން ގޮސްފައެވެ. މެޗުގެ 16 ވަނަ މިނެޓުގައި އޮގްސްބާގްގެ ހަމަލާއެއް ބަޔާންގެ ގޯލުގެ ދަނޑީގައި ޖެހުނުއިރު އެ ޓީމުން ވަނީ އޭގެ ދެ މިނެޓު ފަހުން މެޗުގެ ލީޑު ނަގާފައެވެ. މި ލަނޑަކީ ބަޔާންގެ ނިކޮލަސް ސޫލޭ އަތުން ބައިކޮޅަށް ވަން ލަނޑެކެވެ. މި ލަނޑަށް ފަހު ބަޔާން އިން އެ ޓީމުގެ ކުޅުން ރަނގަޅުކުއިރު އެ ޓީމުން ވަނީ މެޗުގެ 32 ވަނަ މިނެޓުގައި ލަނޑެއް ޖަހާ ނަތީޖާ ހަމަހަމަކޮށްފައެވެ. ޖޯޝުއާ ކިމިޗް ތަނަވަސްކޮށްދިން ފުރުސަތަކުން ބަޔާންއަށް އެއްވަރުކޮށްދިނީ ޓޮލީސޯއެވެ. އޭގެ ހަ މިނެޓު ފަހުން ހަމޭސް ވަނީ ލަނޑެއް ޖަހައި ބަޔާންއަށް ލީޑު ނަގައިދީފައެވެ.

އެއް ލަނޑުގެ ލީޑެއްގައި އޮވެ ބަޔާން އިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް މޮޅު ކުޅުމެއް ދައްކާފައެވެ. އެގޮތުން ބަޔާންގެ ތިންވަނަ ލަނޑު މެޗުގެ 62 ވަނަ މިނެޓުގައި އެ ޓީމަށް ޖަހައިދިނީ އާޔެން ރޮބެންއެވެ. މި ލަނޑަށް ފަހު ވެސް ބަޔާން އަށް ވަނީ ލީޑު ފުޅާކުރުމަށް އިތުރު ފުރުސަތުތައް ލިބި ބޭކާރުވެފައެވެ. އެހެން ނަމަވެސް 87 ވަނަ މިނެޓުގައި ސެންޑްރޯ ވެގްނަރ ވަނީ ބަޔާންގެ ހަތަރު ވަނަ ލަނޑު ޖަހައި އެ ޓީމަށް ތަށި ޔަގީންކޮށްދީފައެވެ.

މިއީ ބަޔާންގެ ތާރީހުގައި ވެސް އެ ޓީމުން ކާމިޔާބުކުރި 28 ވަނަ ބުންޑެސްލީގާ ތައްޓެވެ. ހަމައެހެންމެ ވޭތުވެދިޔަ ހަ ސީޒަނުގައި ވެސް ބުންޑެސްލީގާގެ ތަށި ކާމިޔާބުކުރީ ބަޔާން މިއުނިކްއެވެ. ބަޔާންގެ ހަ ބުންޑެސްލީގާ ތަށީގެ ތެރެއިން ތިން ތަށި ޕެޕް ގާޑިއޯލާގެ އިރުޝާދުގެ ދަށުން ކާމިޔާބުކޮށްފައިވެއެވެ. ހަމައެހެންމެ ދެ ތަށި ޖުޕް ހެއިންކޭސްގެ އިރުޝާދުގެ ދަށުން ކާމިޔާބުކުރި އިރު މިދިޔަ ސީޒަނުގެ ތަށި އެ ޓީމުން ކާމިޔާބުކުރީ ކާލޯ އަންޗެލޯޓީގެ ކޯޗު ކަމުގެ ދަށުންނެވެ.

ކުޅުނު 29 މެޗުން ބަޔާން 72 ޕޮއިންޓް ހަމަކޮށްފައިވާއިރު އެ ޓީމުގެ ފަހަތުން ދެވަނައިގައި އޮތް ޝާލްކޭއަށް ލިބިފައި ވަނީ 53 ޕޮއިންޓްއެވެ.