ޗައިނާ އިން ރާއްޖެއާ ގުޅުން ބަދަހި ކުރުން ޕެންޓަގަންއަށް މައްސަލައަކަށް ވެއްޖެ!
7 އެޕްރީލު 2018 | ހޮނިހިރު 11:39އިންޑޯ ޕެސިފިކް ސަރަހައްދަކީ ނުފޫޒުން އެއްކިބާވެފައިވާ ސަރަހައްދަކަށް ހަދަންޖެހޭ
ރައީސް ޔާމީން ޗައިނާގެ ރައީސް ޝީ ޖިންގ ޕިންއާ ސަލާމް ކުރައްވަނީ
ރާއްޖެއިން ޗައިނާއާ އެކު ގުޅުން ބަދަހިކޮށް، އިންޑިއާ ކަނޑުގެ ސަހަރައްދުގައި އަތްގަދަ ކުރުމަކީ ކަންބޮޑުވާ މައްސަލައެއް ކަމަށް ޕެންޓަގަން އިން ބުނެފިއެވެ.
އިންޑޯ ޕެސިފިކް ސަރަހައްދަކީ ފުރިހަމަ މިނިވަންކަމާ އެކު އެއްވެސް ބައެއްގެ ނުފޫޒެއް ނެތި އޮތްތަނެއް ކަމަށް ހަދަންޖެހޭ ކަމަށް ޑެޕިއުޓީ އެސިސްޓެންޓް ސެކްރެޓަރީ އޮފް ޑިފެންސް ފޯ ސައުތު އެންޑް ސައުތުއީސްޓް އޭޝިއާ ޖޯއީ ފެލްޓާ ވިދާޅުވެފައިވާ ކަމަށް އިންޑިޔާގެ ބައެއް ނޫސްތަކުގައި ހާމަކޮށްފައިވެއެވެ.
ޕެންޓަގަންގެ އިސް އޮފިޝަލަކާ ހަވާދީ ނޫސްތަކުގައި ބުނެފައިވާ ގޮތުގައި ޗައިނާ އިން ރާއްޖެ ސަރަހައްދުގައި ބާރު ގަދަކުރަމުންދާ ކަމީ އިންޑިޔާ އިން ކަންބޮޑުވާ މައްސަލައެއް ކަމަށާއި އެހެން ކަމުން މިއީ އެމެރިކާ އިން ވެސް ވަރަށް ބޮޑަށް ކަންބޮޑުވާ މައްސަލައެއް ކަމަށެވެ. އަދި ކުރިއަށް އޮތްތަނުގައި ކަންކަން ވަމުންދާ ގޮތް ކައރިން ބަދަލުމުންދާނެ ކަމަށް އޮފިޝަލް ބުނެފައިވެއެވެ.
ރާއްޖޭގައި ޗައިނާ އިން އަތްގަދަ ކުރަމުންދާ މައްސަލައާ ގުޅިގެން، އެމެރިކާ އިން ކަންބޮޑުވުން ފާޅުކޮށްފައިވާ އިރު ޗައިނާ އިން ދަނީ ރާއްޖޭގައި ތަރައްގީގެ ބޮޑެތި މަޝްރޫއުތަކެއް ހިންގަމުންނެވެ. އަދި ރާއްޖޭގެ އިގްތިސާދާ ނުބައްދަލު ލޯނުތަކެއް ޗައިނާ އިން ވަނީ ދީފައެވެ. އެގޮތުން ޗައިނާ-މޯލްޑިވްސް ޕްރެންޑްޝިޕް ބްރިޖްގެ މަސައްކަތުގެ އިތުރުން ވެސް ޗައިނާގެ ކުންފުންޏަކަށް ހަތަރު މިލިއަން ޑޮލަރަށް ފޭދޫ ފިނޮޅު ދީފައިވެއެވެ. އަދި އިތުރު ރަށްތަކެއް ވެސް ޗައިނާ އަށް ދީފައި ވެއެވެ. މީގެ އިތުރުން ރާއްޖެ އާއި ޗައިނާ އިން ވަނީ މިނިވަން ވިޔަފާރީގެ އެއްބަސްވުމުގައި ވެސް ސޮއިކޮށްފައެވެ.
