މަޝްހޫރު ލަވަކިޔުންތެރިޔާ ޓެއިލާ ސްވިފްޓަށް މަރުގެ އިންޒާރު ދިން ފްރޭންކް އެންޑްރިވް އަށް 10 އަހަރުގެ ޕްރޮބޭޝަނެއް ރަނގަޅުވާން  ދީފިއެވެ.

އޭނާއަށް ޕްރޮބޭޝަނެއް ދީފައިވަނީ 2016 ވަނަ އަހަރުގެ އޮކްޓޯބަރު މަހުގައި ބޭއްވި ފޯމިއުލާ ރޭސް މުބާރާތް  ފަށަން ބޭއްވި ހަފުލާގައި ޓެއިލާ ޕާފޯމް ކުރި ފަހުން ޓެއިލާއަށް މަރުގެ އިންޒާރުދީ ހަމަލާދޭން މަސައްކަތް ކުރުމުންނެވެ. އަދި 2016 ވަނަ އަހަރުގެ އޮގަސްޓުން ފެށިގެން ފްރޭންކް ވަނީ ޓެއިލާއަށް މަރުގެ އިންޒާރުދީ އޭނާގެ އާއިލާއާއި އޭނާ މަރާލާނެ ކަމަށްބުނެ އެތަށް އީމެއިލެއް ޓެއިލާއަށް ފޮނުވާފައެވެ.

ދިހަ އަހަރުގެ ތެރޭގައި ފްރޭންކަށް ވަނީ އެއްއަހަރު ދުވަހުގެ ޝަރުތުތަކެއް ކޮށްފައެވެ. އޭގެ ތެރޭގައި ބަރާބަރަށް މަސްތުވާތަކެތީގެ ޓެސްޓު ހެދުމާއި އިޖްތިމާއީ ބޭނުން ރަނގަޅުގޮތުގައި ހިފުމަށް ހިތްވަރުދޭ ކްލާސްތަކަށް ދިއުމާއި ނަފުސާނީ މައްސަލަތަކަށް ފަރުވާ ހޯދުން އަދި ސައިކޮލޮޖީ ޓެސްޓު ބަރާބަރަށް ހެދުން ހިމެނެއެވެ. މިއިން އެއްވެސް ކަމަކަށް ފްރޭންކް ފަރުވާކުޑަކޮށްފި ނަމަ ނުވަތަ ނުކޮށްފިނަމަ އޭނާއަށް ޖަލުހުކުމެއް އަންނާނެކަމަށް ވެސް ވަނީ ކޯޓުން ހުކުމްކޮށްފައެވެ.

 ކުޅަދާނަ ލަވަކިޔުންތެރިޔާ ޓެއިލާގެ އާ އަލްބަމް ރެޕިއުޓޭޝަން ނެރެފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. ރެޕިއުޓޭޝަން ނެރުނުތާ 24 ގަޑިއިރު ތެރޭގައި އެ އަލްބަމުގެ ހަތް ލައްކައަށް ވުރެ ގިނަ ކޮޕީ ވަނީ ވިކި ހުސްވެފައެވެ. މި އަލްބަމް ޕްރޮޑިއުސްކޮށްފައި ވަނީ ޓެއިލާގެ އިތުރުން ޖެކް އެންޓޮނޮފް، މެކްސް މާޓިން އަދި ޝެލްބެކްއެވެ. މުޅިއެކު 15 ލަވަ ހިމެނޭ މި އަލްބަމުގެ ދިގުމިނަކީ 58.33 މިނެޓެވެ.

ރެޕިއުޓޭޝަންގެ ކުރިން ނެރުނު އަލްބަމް ޓެއިލާގެ 1989 ނެރެފައިވަނީ 2014 ވަނަ އަހަރުގައެވެ. ހަފްތާއެއްގެ ތެރޭގައި މި އަލްބަމްގެ ވެސް 1.29 މިލިއަން ކޮޕީ ވިކި އެއަހަރު އެންމެ ގިނައިން ވިކުނު އަލްބަމުގެ ރެކޯޑް ހޯދާފައިވެ އެވެ.