ކުއްލި ނުރައްކަލުގައި ހައްޔަރު ކުރި ބައެއް މީހުން ދޫކޮށްލިއިރު، ފޯނެއް ދުލެއް ނުކުރޭ!
ކޯޓު އަމުރަކާ ނުލައި ފޯނުތައް ނުހިފެހެއްޓޭނެ: އަނަސް
ކުއްލި ނުރައްކަލުގެ ހާލަތުގެ ދަށުން ހައްޔަރު ކުރި ބައެއް ފަރާތްތައް
ކުއްލި ނުރައްކަލުގެ ހާލަތުގެ ދަށުން ހައްޔަރު ކުރި މީހުންނާއެކު، އެ މީހުންގެ ފޯނުތައް ފުލުހުން އަތުލުމަށްފަހު، ދޫކޮށްފައި ނުވާތީ ބައެއް ފަރާތްތަކުން ކަންބޮޑުވުންފާޅުކޮށްފިއެވެ.
ކުއްލި ނުރައްކަލުގެ ހާލަތުގެ ދަށުން ކޯޓު އަމުރަކާ ނުލައި ފުލުހުންގެ ބެލުމުގެ ދަށަށް ގެންދިޔަ ފޯނުތައް ފުލުހުން ދޫނުކުރާތީ، އެކަމުގެ ކަންބޮޑުވުން ފާޅުކުރަމުން ދަނިކޮށް، އެމްޑީޕީގެ ސެކަރެޓަރީ ޖެނަރަލް އަނަސް އަބްދުއްސައްތާރު "ރާއްޖެއެމްވީ"އަށް ވިދާޅުވީ ފުލުހުންގެ ބެލުމުގެ ދަށަށް ގެންދިޔަ، ފޯނުތައް ދޫކުރިކަމުގެ ޚަބަރު ލިބިފައި ނުވާ ކަމަށެވެ. އޭނާ ވިދާޅުވީ އެކަން ހިނގާފައިވާ ގޮތް އެ ޕާޓީން ބަލަމުންދާ ކަމަށެވެ.
އަނަސް ވިދާޅުވި ގޮތުގައި ކުއްލި ނުރައްކަލުގެ ހާލަތުގެ ދަށުން ހިފެހެއްޓި ފޯނުތައް ކޯޓު އަމުރަކާ ނުލައި، އެ ފޯނުތަކާ ގުޅޭ ތަހުގީގުތައް ކުރިއަށް ނުގެންދެވޭނެ އެވެ.
ކުއްލި ނުރައްކަލުގެ ހާލަތުގެ ދަށުން، ފުލުހުން ހައްޔަރު ކުރި މީހުން ޝަރުތަކާ ނުލައި ފުލުހުންގެ ބަންދުން ވީއްލާފައިވާއިރު، ބައެއް ބޭފުޅުންގެ ފޯނުތައް ހިފަހައްޓާފައިވާތާ މަސް ދުވަހަކަށް ވުރެ ގިނަ ދުވަސް ވަނީ ވެފައެވެ. އަދި ބައެއް ބޭފުޅުންގެ ފޯނުތައް ކޯޓު އަމުރަކާއެކު 30 ދުވަހުގެ މުއްދަތަށް ވަނީ ހިފަހައްޓާފައެވެ.
ކުއްލި ނުރައްކަލުގެ ހާލަތުގެ ދަށުން ހައްޔަރު ކުރި ފަރާތްތަކުންގެ ތެރެއިން 11 ބޭފުޅަކު ވަނީ ޝަރީއަތް ނިމެންދެން ބަންދުކޮށްފައެވެ.
