އަމިއްލަ ދަނޑުގައި ފަސޭހަކަމާއެކު މެންޗެސްޓަރ ސިޓީ ބަލިކޮށް، ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރުޞަތު ލިވަޕޫލް އިން ބޮޑުކޮށްފި އެވެ.

ޔުއެފާ ޗެމްޕިއަންސް ލީގުގެ ކުއާޓަރ ފައިނަލްގެ ފުރަތަމަ ލެގުގައި ބުދަ ދުވަހުގެރޭ، އަމިއްލަ ދަނޑުގައި މެންޗެސްޓަރ ސިޓީގެ މައްޗަށް ލިވަޕޫލް ކުރިހޯދީ 3-0 ންނެވެ.

މިމެޗުގައި ލިވަޕޫލް ޖެހި ތިން ލަނޑުވެސް ޖަހާފައިވަނީ ފުރަތަމަ ހާފްގެ ތެރޭގައެވެ.

މެޗުގެ 12 ވަނަ މިނެޓުގައި ރޮބާޓޯ ފަރމީނޯ ދިން ބޯޅައަކުން ލިވަޕޫލްގެ ފުރަތަމަ ލަނޑު ޖަހައިދިނީ މިސްރުގެ ފޯވާޑް މުޙައްމަދު ސަލާހް އެވެ. މިލަނޑަކީ މިސީޒަނުގައި ސަލާހް ޖެހި 38 ވަނަ ލަނޑެވެ.

މެޗުގެ 20 ވަނަ މިނެޓުގައި ލިވަޕޫލް އަށް ލީޑު ފުޅާ ކޮށްދިނީ އިނގިރޭސި ފޯވާޑް އެލެކްސް އޮކްސްލޭޑް ޗެމްބަލައިން އެވެ. ޖޭމްސް މިލްނަރ ދިން ބޯޅައަކުން މިލަނޑު އޭނާ ޖެހީ، ޕެނަލްޓީ އޭރިއާ ބޭރުގައި ހުރެ ފޮނުވާލި ބާރު ހަމަލާއަކުންނެވެ.

ލިވަޕޫލްގެ ތިންވަނަ ލަނޑު، 31 ވަނަ މިނެޓުގައި ޖަހައިދިނީ ސެޑިއޯ މަނޭ އެވެ. މިއީ މެންޗެސްޓަރ ސިޓީގެ އޭރިއާ ތެރެއިން ސަލާހް ނަގައިދިން ހުރަހެއް މަނޭ ބޮލުން ގޯލްގެ ތެރެއަށް ފޮނުވާލައިގެން ކާމިޔާބު ކުރި ލަނޑެކެވެ.

އިނގިރޭސި ޕްރިމިއަރ ލީގުގައި 16 ޕޮއިންޓުގެ ލީޑަކާއެކު ތާވަލްގެ ކުރީގައިވާ މެންޗެސްޓަރ ސިޓީ އަށް މިމެޗުގައި ލިވަޕޫލްގެ ގޯލަށް އަމާޒުކޮށް އެންމެ ހަމަލާއެއްވެސް ފޮނުވާލެވިފައެއްނުވެއެވެ.

މިނަތީޖާ އާއެކު ޗެމްޕިއަންސް ލީގުގެ ސެމީ ފައިނަލްގެ ޖާގައަކާއި ގާތަށް ލިވަޕޫލް ޖެހިލިއިރު، ސެމީގެ ފުރުސަތު ހޯދުމަށް މެންޗެސްޓަރ ސިޓީ އަށް އޮތީ، އެޓީމުގެ ދަނޑުގައި އަންނަ އަންގާރަ ދުވަހު ކުޅޭ ދެވަނަ ލެގު 3 ލަނޑަށްވުރެ ބޮޑު ތަފާތަކުން ކާމިޔާބު ކުރުމެވެ.