ފްރެންޗް ލީގް ކަޕްގެ ފައިނަލްގައި މޮނާކޯ ބަލިކޮށް، ލީގް ކަޕްގެ ޗެމްޕިއަންކަން ޖެހިޖެހިގެން 5 ވަނަ ފަހަރަށް ޕެރިސް ސެއިންޓް ޖަމައިން (ޕީއެސްޖީ) ހޯދައިފި އެވެ.

ފްރެންޗް ލީގް ކަޕްގެ ފައިނަލްގައި މޮނާކޯގެ މައްޗަށް ޕީއެސްޖީ ކުރިހޯދީ 3-0 ންނެވެ.

ލީގް ކަޕް ފައިނަލް މެޗުގެ 8 ވަނަ މިނެޓުގައި ޕީއެސްޖީގެ ފޯވާޑް ކީލިއަން އެމްބާޕޭ އަށް ކުރި ފައުލަކާއި ގުޅިގެން ލިބުނު ޕެނަލްޓީ އަކުން ޕީއެސްޖީ އަށް ކުރިހޯދައިދިނީ އުރުގުއާއީގެ ފޯވާޑް އެޑިންސަން ކަވާނީ އެވެ. މޮނާކޯ އަށް ކުރި ކުޅުނު އެމްބާޕޭ އަށް ކުރި ފައުލަށް ޕެނަލްޓީ ދީފައިވަނީ ވީޑިއޯ އެސިސްޓެންޓް ރެފްރީ ނުވަތަ ވީޑިއޯ ރިޕްލޭ އަށް ބެލުމަށްފަހުއެވެ.

މެޗުގެ 21 ވަނަ މިނިޓުގައި އެމްބާޕޭ ދިން ބޯޅައަކުން ޕީއެސްޖީ އަށް ލީޑު ފުޅާ ކޮށްދިނީ އާޖެންޓީނާގެ ފޯވާޑް އެންޚެލް ޑި މަރިއާ އެވެ.

މިމެޗުގެ ފުރަތަމަ ހާފް ނިމުމުގެ ކުރިން މޮނާކޯ އަށް ކުޅޭ ކޮލަމްބިއާގެ ފޯވާޑް ރަޑަމެލް ފަލްކާއޯ ލަނޑެއް ޖެހުމާއި ގާތަށް ދިޔައެވެ. އެހެން ނަމަވެސް ފަލްކާއޯގެ ލަނޑަކީ އޮފްސައިޑް ލަނޑެއް ކަމަށް ނިންމާފައިވަނީ ވެސް ވީޑިއޯ އެސިސްޓެންޓް ރެފްރީ (ވީއޭއާރު) ގެ އެހީތެރިކަމާއެކުގައެވެ.

ޕީއެސްޖީގެ ފަހު ލަނޑު މެޗުގެ 85 ވަނަ މިނިޓުގައި ޖަހައިދިނީ ކަވާނީ އެވެ.

ފްރެންޗް ލީގު ކަޕްގެ ޗެމްޕިއަން ކަމާއެކު، ގަތަރުގެ މަހުޖަނަކު ހިންގާ ޕީއެސްޖީ އިން ވަނީ ފާއިތުވި ފަސް ސީޒަނުގައި އެ ކްލަބު ވާދަކުރި ފްރާންސްގެ 13 މުބާރާތުގެ ތެރެއިން 11 މުބާރާތެއް ކާމިޔާބު ކޮށްފައެވެ. މީގެ އިތުރުން ފްރެންޗް ލީގާއި، ފްރެންޗް ކަޕް ކާމިޔާބު ކޮށްގެން، ފްރާންސްގެ ހުރިހާ މުބާރާތެއް ތިންވަނަ އަހަރު ކާމިޔާބު ކުރުމުގެ ފުރުޞަތު އެކްލަބަށް އެބައޮތެވެ.

ފްރެންޗް ލީގުގެ އެއްވަނާގައިވާ ޕީއެސްޖީ އަށް ދެވަނާގައިވާ މޮނާކޯގެ މައްޗަށް 17 ޕޮއިންޓުގެ ލީޑެއް އޮތްއިރު، ފްރެންޗް ލީގު ޗެމްޕިއަންކަން ޕީއެސްޖީ އަށް ވަނީ ގާތްގަނޑަކަށް ކަށަވަރުވެފައެވެ.

މީގެ އިތުރުން ފްރެންޗް ކަޕްގެ ފައިނަލުން ޖާގަ ހޯދުމަށް ޕީއެސްޖީ އަށް ބޭނުން ވަނީ ސެމީ ފައިނަލްގެ ދެވަނަ ލެގުގައި މޮނާކޯ އަތުން މޮޅެއް ހޯދުމެވެ. މި ދެ ޓީމް ބައްދަލު ކުރި ސެމީ ފައިނަލްގެ ފުރަތަމަ ލެގު ނިމިފައިވަނީ 1-1 ން ދެ ޓީމް އެއްވަރު ވެގެންނެވެ.