ދިވެހިރާއްޖޭގެ ކަންކަމާ އިންޑިއާ އިން ނުބެހޭނެ ކަމަށާއި ހަމަ އެގޮތަށް ޗައިނާ އިން ވެސް އަމަލު ކުރާނެ ކަމަށް އުންމީދު ކުރާ ކަމަށް އިންޑިއާ އިން ބުނެފިއެވެ.
އިންޑިއާގެ ދުވަހު ނޫހެއް ކަމަށްވާ ދަ އިންޑިއަން އެކްސްޕްރެސް އަށް ދެއްވި އިންޓަވިއުއެއްގައި އިންޑިއާ ސަރުކާރުގެ އިސް އޮފިޝަލަކު ވިދާޅުވީ ދެކުނު އޭޝިއާއަކީ އެގައުމުގެ މައި ނުފޫޒު އޮންނަ ސަރަހައްދުގެ ގޮތުގައި ގަބޫލު ކުރި ދުވަސް ހިނގައްޖެ ކަމަށާއި އަދި ޗައިނާ ހިމެނޭ ގޮތުން އެހެން ބާރުތަކަަށް ދެކުނު އޭޝިއާ އަށް ނުފޫޒު ގަދަކުރުން ހުއްޓުވޭނެ ކަމަށް ދެކުނު ދުވަސް ވެސް ހިނގައްޖެ ކަމަށެވެ.
އޭނާ އިތުރަށް ވިދާޅުވީ ސަރަހައްދުގެ ހަމައެކަނި ބާރަކީ އިންޑިއާއޭ ނުބެނެވޭނެ ކަމަށާއި ޗައިނާ އިން ދިވެހިރާއްޖެ ނޫނީ ނޭޕާލުގައި ކުރާ ކަމެއް ނުހުއްޓުވޭނެ ކަަމަށާއި އެހެނަސް އިންޑިއާ އިން ކަންބޮޑުވާ ނުވަތަ އިންޑިއާ އިން ގަބޫލުކުރާ ހަމަތައް ފާޅުކުރެވޭނެ ކަމަށެވެ. އަދި މިކަންކަމާ ޗައިނާ އިން ހިލާފުވާ ނަމަ އެކަންކަމާ ޒިންމާވާން ޖެހޭނީ ޗައިނާ އިން ކަމަށް ވެސް އޭނާ ވިދާޅުވިއެވެ.
ދަ އިންޑިއަން އެކްސްޕްރެސް ނޫހުން ބުނެފައި ވަނީ އިންޑިއާގެ ފޮރިން ސެކްރެޓަރީ ވިޖޭ ގޯކްލޭ، ކައިރި މުސްތަގުބަލެއްގައި ސްރީ ލަންކާއަށާއި ބަނގްލަދޭޝް އަށް ރަސްމީ ދަތުރުފުޅެއް ކުރައްވާނެ ކަމަށެވެ. އެހެންނަމަވެސް މަސްދަރުތައް ބުނާ ގޮތުން މި ދަތުރުފުޅުގައި ރާއްޖެއެއް ނުހިމެނެއެވެ.
އިންޑިއާއާ މެދު ރާއްޖޭގެ ރައީސް އަބްދުﷲ ޔާމިން ގެންގުޅުއްވަނީ ބީރައްޓެހި ސިޔާސަތެކެވެ. އިންޑިއާ އަށް ބަދުބަސް ނުބުނަން ރައީސް ޔާމީން އިލްތިމާސްކުރައްވާ އިރު ސަރުކާރުން ޚާރިޖީ ސިޔާސަތު ބައްޓަންކޮށްފައި ވަނީ އިންޑިއާ ހިތުގައި ޖެހޭ ގޮތަށެވެ. މި ސަރަހައްދުގައި އިންޑިއާއާ އެންމެ ވާދަވެރި ޗައިނާއަށް ރާއްޖެ އިން ގިނަ ފުރުސަތުތަކެއް ދިނުމާއި މި ސަރަހައްދުގެ ސަލާމަތަށް ނުރައްކާވާ ފަދަ ބާރުތަކެއް ރާއްޖޭގެ ތެރެއިން ޗައިނާ އަށް ދިނުމަކީ އިންޑިއާ އިން ކޮށްދޭ ކަންކަމުގައި ކޮޅުފައިން ޖެހުން ކަމަށް ބައެއް ފަރާތްތަކުން ސިފަކުރެއެވެ. އެހެނަސް ރައީސް ޔާމިން ވިދާޅުވަމުން ގެންދަވަނީ ރާއްޖެ އިން ގެންގުޅެނީ "އިންޑިއާ ފަސްޓް ޕޮލިސީ" ކަމަށެވެ.
ރާއްޖޭގައި ދާދިފަހުން ނެރުނު ކުއްލި ނުރައްކަލުގެ ހާލަތު އުވާލުމާ ގުޅިގެން މަރުޙަބާ ކިޔުމަށް އަވަށްޓެރި އިންޑިއާގެ އެކްސްޓަރނަލް އެފެއަރޒް މިނިސްޓްރީން ބުރާސްފަތި ދުވަހު ނެރުނު ބަޔާނުގައި ބުނީ ސުޕްރީމް ކޯޓުން 1 ފެބްރުއަރީގެ އަމުރު ސަރުކާރުން ތަންފީޒު ކުރަން ޖެހޭ ކަމަށެވެ. ސުޕްރީމް ކޯޓުން މިދިޔަ މަހު ކޮށްފައިވާ ހުކުމް ތަންފީޒު ކުރުމަށް ފަހު އިދިކޮޅު ސިޔާސީ ޙަރަކާތްތަކަށް ފުރުސަތުދީ، ޕާޓީތަކާ މަޝްވަރާ ކުރުމަށް ވެސް އިންޑިއާގެ ބަޔާނުގައި ވަނީ ގޮވާލާފައެވެ. އެކަމާ ގުޅިގެން ރާއްޖެއިން ބުނެފައި ވަނީ އެއީ ރާއްޖޭގެ ދާޚިލީ ކަމެއް ކަމަށާއި އެކަން ހައްލުކުރާނީ ދިވެހިން އަމިއްލަ އަށް ކަމަށެވެ.