ޔުއެފާ ޗެމްޕިއަންސް ލީގު އަދި ޔުއެފާ ޔުރޮޕާ ލީގުގެ ގަވާއިދަށް ޔޫރަޕުގެ ފުޓްބޯޅައިގެ މައި އިދާރާއިން ބަދަލު ގެނެސްފިއެވެ.

ޔުއެފާއިން ނިންމާފައި ވަނީ އަންނަ ސީޒަނާ އެކު ފިނި މޫސުމުގެ ޓްރާންސްފާގައި ކްލަބް ބަދަލުކުރާ ކުޅުންތެރިންނަށް އެ ކުޅުންތެރިޔަކު ބަދަލުވާ ޓީމަށް ކުޅެވޭ ގޮތަށެވެ. މިހާރު އޮންނަ ގަވާއިދުގެ ދަށުން ޖެނުއަރީގައި ކްލަބް ބަދަލުކުރާ ކުޅުންތެރިޔަކަށް އެ ކުޅުންތެރިޔަކު ބަދަލުވާ ޓީމަކަށް ނުކުޅެވެއެވެ. ހަމައެހެންމެ ނޮކްއައުޓް ބުރުތަކުގެ އިތުރު ވަގުތުގައި ހަތަރު ވަނަ ކުޅުންތެރިޔަކަށް ބަދަލު ކުޅުންތެރިޔެއްގެ ގޮތުގައި ނުކުމެވޭ ގޮތަށް ހަދާފައިވާއިރު ފައިނަލުގައި ބެންޗުގައި 12 ކުޅުންތެރިންނަށް ތިބެވޭ ގޮތަށް ގަވާއިދު ވަނީ ބަދަލުކޮށްފައެވެ. މީގެ އިތުރުން ބައެއް މެޗުތައް ވަނީ ހަވީރުގެ ވަގުތުތަކުގައި ފެށުމަށް ނިންމާފައެވެ.

ކްލަބަށް ގެންނަ އާ ތިން ކުޅުންތެރިޔަކު ރެޖިސްޓަރ ކުރުމަށް ފުރުސަތު ދޭނެ ކަމަށް ޔުއެފާއިން ބުނެފައިވެއެވެ. ޔުއެފާއިން ބުނެފައި ވަނީ މިއީ ގައުމުތަކުގެ ލީގުތަކުގައި ކަންކަން ކުރާ އުސޫލު ކަމަށާއި ފިނި މޫސުމުގެ ޓްރާންސްފާ މާކެޓުގައި ކްލަބް ބަދަލުކުރުމަކީ ޗެމްޕިއަންސް ލީގުގައި ނުކުޅެވެންވީ ސަބަބެއް ކަމަށް ގަބޫލުނުކުރާ ކަމަށެވެ. މި ސީޒަނުގެ ޗެމްޕިއަންސް ލީގުގައި ބާސެލޯނާއަށް ބަދަލުވި ފިލިޕޭ ކުޓީނިއޯ އަދި ޔުރޮޕާ ލީގުގައި ޕިއޭ އެމެރިކް އޮބަމަޔަންގއަށް ނުކުޅެވޭނެއެވެ. ޗެމްޕިއަންސް ލީގުގެ ގްރޫޕް ސްޓޭޖުގައި ލިވަޕޫލްއަށް ކުޓީނިއޯ ކުޅެފައިވާއިރު އޮބަމަޔަންގ ވަނީ ޔުރޮޕާ ލީގުގެ ގްރޫޕް ސްޓޭޖުގައި ބޮރޫޝިއާ ޑޯޓްމަންޑަށް ކުޅެފައެވެ.

ބައެއް މެޗުތައް އަވަހަށް ކުޅޭއިރު އެންމެ ފަހު ގްރޫޕް ސްޓޭޖުގެ ހުރިހާ މެޗެއް ވެސް ކުޅުމަށް ނިންމާފައި ވަނީ އެއް ވަގުތެއްގައެވެ. މިހާރު މި ދެ މުބާރާތުގައި ވެސް ކުޅޭ ޓީމުތަކަށް ސްކޮޑުގައި ހިމެނެނީ 18 ކުޅުންތެރިންނެވެ. އެހެން ނަމަވެސް ގަވާއިދަށް ގެނައި ބަދަލާއެކު 23 ކުޅުންތެރިންގެ ސްކޮޑެއް ކޮންމެ ޓީމަކަށް ވެސް ހުށަހެޅޭނެ ކަމަށް ޔުއެފާއިން ބުނެއެވެ. އެ އިދާރާއިން މިހެން ނިންމާފައިވަނީ މި ދެ މުބާރާތަކީ ވެސް ޓީމުތަކުން އެންމެ ބޮޑު އިސްކަމެއް ދޭ ދެ މުބާރާތަށްވުމާ އެކު ސްކޮޑަށް ދިމާވާ މައްސަލަތައް ކުޑަކުރުމުގެ ބޭނުމުގައި ކަމަށް ބުނެފައިވެއެވެ.

މި ބަދަލުތައް އަންނަ ސީޒަނުގެ މުބާރާތްތަކުން ފެނިގެންދާނެ ކަމަށް ޔުއެފާއިން ބުނެފައިވެއެވެ.