ސަރުކާރު ގާނޫނާ ހިލާފުވުމުން ސުޕްރީމް ކޯޓުން އެކަމަކާއި މެދު ގޮތެއް ނިންމަވަން ޖެހޭ ކަމަށް މައްޗަންގޯޅި އުތުރު ދާއިރާގެ މެމްބަރު މާރިޔާ އަހުމަދު ދީދީ ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން މާރިޔާ ވިދާޅުވީ ސަރުކާރާއި ރައްޔިތުންގެ މަޖިލީހާއި ދެމެދު މައްސަލައެއް ޖެހުނު ކަމުގައި ވިޔަސް ނުވަތަ މަޖިލީހުގެ ތެރޭގައި އުފެދޭ މައްސަލަތަކުގެ ވެސް އިސްތިޝާރީ ލަފާ ހޯދުމަށް އެދެނީ ސުޕްރީމް ކޯޓުގައި ކަމަށެވެ. ހަމައެހެންމެ ސަރުކާރު ވެސް ގާނޫނާ ހިލާފު ވެއްޖެ ނަމަ އެކަމާއި ގުޅޭގޮތުން ސުޕްރީމް ކޯޓުން ގޮތެއް ނިންމަވަން ޖެހޭ ކަމަށާއި އެބޭފުޅުންނާއި ހަވާލުކުރެވިފައި ވަނީ އުނދަގޫ ކަންތައްތަކެއް ކަމަށް ވިދާޅުވިއެވެ. އަދި މިކަންކަން އެހެން އޮތުމާއެކު އެ ބޭފޫޅުންނަށް ސަލާމަތާއި ރައްކާތެރިކަން ދެއްވަން ޖެހޭ ކަމަށް މާރިޔާ ވިދާޅުވިއެވެ.  

"ސަރުކާރުން ވެސް ގާނޫނާ ހިލާފުވެއްޖެ ކަމަށް ވަންޏާ ސުޕްރީމް ކޯޓުގެ ބޭފުޅުން އެކަމާއި މެދު ގޮތެއް ނިންމަވަން ޖެހޭ. މެމްބަރުންގެ ގޮނޑިއާ މެދު ވެސް ހިލާފު އުފެދި މިހެން ގޮސް ކިތަންމެ ބައިވަރު އުނދަގޫ ކަންތައްތަކެއް އެ ބޭފުޅުންނާއި މި އޮންނަނީ ހަވާލު ކުރެވިފައި"

މި ޕްރޮގްރާމްގައި ވާހަކަ ދައްކަވަމުން މާރިޔާ ވިދާޅުވީ ރައީސް ޔާމީން ހިތްޕުޅާ ހަމަނުވާ ގޮތަށް ކަންކުރައްވާ ކޮންމެ މީހަކު ޓެރަރިސްޓަކަށްވާ މަންޒަރު މިހާރު ފެންނަ ކަމަށާއި އެއީ ރާއްޖޭގެ ގާނޫނު އަސާސީ އަދި ގާނޫންތައް ވެސް ބޭނުންވާ ގޮތެއް ނޫން ކަމަށެވެ. ފުލުހުން ވެސް ކަންކަން ކުރައްވަން ޖެހޭނީ ހަމަހަމަކޮށް ކަމަށާއި އެހެން ނަމަވެސް މިއަދު މި ރާއްޖެއިން ހަމަހަމަކަމާއެކު ކަންކަން ކުރަމުންދާ މަންޒަރު ފެންނަމުންނުދާ ކަމަށް މާރިޔާ ވިދާޅުވިއެވެ.

"ރުމާލު 2 ޖަގަހައާ އެމްޑީޕީ ހަރުގެއާ ކުނޫޒްގަ ވެސް އެއީ ރައްޔިތުން. ހަމަހަމަކަމާއެކު އެ ބޭފުޅުން ކަންކަން ކުރައްވަން ޖެހޭނެ. މާތް ރަސްކަލާނގެ ގަންދީ ހުވާކުރައްވާފައިވާ ގޮތަށް އެކަންކަން ކުރައްވަން ޖެހޭނީ. އެކަމަކު މިހާރު މި ރާއްޖޭގެ އެންމެން ހެކިވާނެ ހަމަހަމަކަމެއް ނެތްކަން."

ރާއްޖޭގެ ރައްޔިތުން ބޭނުންވާ ގޮތް ގާނޫނު އަސާސީގައި ލިޔެވިފައިވާ ކަމަށް މާރިޔާ ވިދާޅުވިއެވެ.